കൊച്ചി: കേരള രാഷ്ട്രീയത്തിൽ മുഖ്യമന്ത്രി കസേരയെ ചൊല്ലിയുള്ള തർക്കങ്ങൾ മുറുകുന്നതിനിടെ, അപ്രതീക്ഷിത കേന്ദ്രങ്ങളിൽ നിന്ന് കരുനീക്കങ്ങൾ സജീവമാകുന്നു. മുൻപ് പിണറായി വിജയന്റെ കടുത്ത ആരാധകനായിരുന്ന റിപ്പോർട്ടർ ചാനൽ എം.ഡി ആന്റോ അഗസ്റ്റിൻ, ഇപ്പോൾ കെ.സി വേണുഗോപാലിനെ മുഖ്യമന്ത്രിയാക്കാൻ ‘അരയും തലയും മുറുക്കി’ രംഗത്തിറങ്ങിയിരിക്കുകയാണ്. വി.ഡി സതീശനെ ഒതുക്കി കെ.സിയെ മുൻനിരയിൽ എത്തിക്കാൻ ചാനലിനെ ആയുധമാക്കുകയാണെന്ന ആക്ഷേപം ശക്തമാണ്.
പിണറായി ഭക്തിയിൽ നിന്ന് കെ.സി ക്യാമ്പിലേക്ക്!
ഒരു കാലത്ത് പിണറായി സർക്കാരിന്റെ വീഴ്ചകളെ വെള്ളപൂശാൻ സദാ സന്നദ്ധനായിരുന്ന ആന്റോ അഗസ്റ്റിൻ, ഭരണവിരുദ്ധ വികാരം ശക്തമായതോടെ കളം മാറ്റി ചവിട്ടുകയാണ്. പിണറായി ഭരണത്തിൽ താൻ അനുഭവിച്ച സംരക്ഷണം തുടരണമെങ്കിൽ അടുത്ത മുഖ്യമന്ത്രി കെ.സി വേണുഗോപാൽ തന്നെയാകണമെന്ന വാശിയാണ് ഇതിന് പിന്നിലെന്ന് പറയപ്പെടുന്നു.
സതീശനെ പേടിക്കുന്നത് എന്തിന്?
പ്രതിപക്ഷ നേതാവ് വി.ഡി സതീശൻ മുഖ്യമന്ത്രി സ്ഥാനത്തേക്ക് വന്നാൽ തന്റെ ‘വിവാദ ഇടപാടുകൾ’ നടക്കില്ലെന്ന് ആന്റോ അഗസ്റ്റിൻ ഭയപ്പെടുന്നു. കർക്കശക്കാരനായ സതീശന്റെ അടുത്ത് പരിപ്പ് വേവില്ലെന്ന് കണ്ടതോടെയാണ്, താരതമ്യേന വഴങ്ങുന്ന സ്വഭാവക്കാരനായ കെ.സി വേണുഗോപാലിന് വേണ്ടി ചാനലിലൂടെ നിരന്തരം പിആർ വർക്കുകൾ നടക്കുന്നത്.
കേസുകളുടെ പെരുമഴയും ‘മെസി’ തട്ടിപ്പും
കേരളം ചർച്ച ചെയ്ത മുട്ടിൽ മരംമുറി കേസ് അടക്കം നിരവധി ക്രിമിനൽ കേസുകളിൽ പ്രതിയാണ് ആന്റോ അഗസ്റ്റിൻ. നിയമത്തിന്റെ പിടിയിൽ നിന്ന് രക്ഷപെടാൻ രാഷ്ട്രീയ സ്വാധീനം എന്നും ഇയാൾക്ക് ആവശ്യമാണ്.
മരംമുറി കേസ്: പൊതുമുതൽ കൊള്ളയടിച്ച കേസിൽ നിന്ന് രക്ഷപെടാൻ പഴയ ഭരണാധികാരികൾ നൽകിയ സഹായം പുതിയ കേന്ദ്രങ്ങളിൽ നിന്നും ഇയാൾ പ്രതീക്ഷിക്കുന്നു.
മെസി വിവാദം: ലോകപ്രശസ്ത ഫുട്ബോൾ താരം ലയണൽ മെസിയെ കേരളത്തിൽ എത്തിക്കുമെന്ന് പറഞ്ഞ് മലയാളി കായിക പ്രേമികളെ കബളിപ്പിച്ച ചരിത്രവും ഈ ‘ചാനൽ മുതലാളി’ക്കുണ്ട്.
