തിരുവനന്തപുരം: കേരളത്തിൽ അടുത്ത നിയമസഭാ തെരഞ്ഞെടുപ്പിന്റെ ചൂട് ഉയരുമ്പോൾ ഭരണത്തുടർച്ചയ്ക്കായി ഏറ്റവും കൂടുതൽ ആഗ്രഹിക്കുന്നത് മുഖ്യമന്ത്രി പിണറായി വിജയൻ കഴിഞ്ഞാൽ ഒരുപക്ഷേ അത് ഡോ. കെ.എം. എബ്രഹാം ആയിരിക്കും. ലോക്സഭാ, തദ്ദേശ തെരഞ്ഞെടുപ്പുകളിൽ എൽ.ഡി.എഫ് നേരിട്ട ദയനീയ പരാജയവും ഭരണവിരുദ്ധ വികാരവും വരാനിരിക്കുന്ന നിയമസഭാ പോരാട്ടത്തിൽ പിണറായി 3.0 എന്ന സ്വപ്നത്തിന് മങ്ങലേൽപ്പിക്കുമ്പോൾ, അതിന്റെ പ്രത്യാഘാതം ഏറ്റവും കൂടുതൽ അനുഭവിക്കേണ്ടി വരിക മുഖ്യമന്ത്രിയുടെ ഈ ‘വിശ്വസ്തനായിരിക്കും’.
ആരാണ് ഡോ. കെ.എം. എബ്രഹാം?
സംസ്ഥാനത്തെ മുൻ ചീഫ് സെക്രട്ടറിയായ കെ.എം. എബ്രഹാം, പിണറായി വിജയൻ സർക്കാരിന്റെ കണ്ണിലുണ്ണിയായാണ് അറിയപ്പെടുന്നത്. 2018-ൽ ചീഫ് സെക്രട്ടറി സ്ഥാനത്തുനിന്നും വിരമിച്ച ഉടനെ തന്നെ അദ്ദേഹത്തെ കിഫ്ബി (KIIFB) സി.ഇ.ഒ ആയി നിയമിച്ചു. നിലവിൽ മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി എന്ന നിർണ്ണായക പദവിയും അദ്ദേഹം വഹിക്കുന്നു.
മാസം 6 ലക്ഷം കീശയിൽ; ശമ്പളക്കണക്കുകൾ ഞെട്ടിക്കുന്നത്
സാമ്പത്തിക പ്രതിസന്ധിയിൽ കേരളം നട്ടംതിരിയുമ്പോഴും കെ.എം. എബ്രഹാമിന് ലഭിക്കുന്ന ആനുകൂല്യങ്ങൾ രാഷ്ട്രീയ വൃത്തങ്ങളിൽ വലിയ ചർച്ചയാണ്:
- ആദ്യ ശമ്പളം: 2.75 ലക്ഷം രൂപ (2018-ൽ).
- ഇപ്പോഴത്തെ ശമ്പളം: നിരവധി തവണത്തെ വർദ്ധനവിലൂടെ കിഫ്ബി സി.ഇ.ഒ എന്ന നിലയിൽ ലഭിക്കുന്നത് ഏകദേശം 4.50 ലക്ഷം രൂപ.
- പെൻഷൻ: ചീഫ് സെക്രട്ടറി സ്ഥാനത്തുനിന്നും വിരമിച്ച വകയിൽ ലഭിക്കുന്ന 2 ലക്ഷത്തിലധികം രൂപ.
- ആകെ വരുമാനം: പെൻഷനും ശമ്പളവും മറ്റ് ആനുകൂല്യങ്ങളും ചേർത്ത് പ്രതിമാസം 6 ലക്ഷത്തിലധികം രൂപ കൈപ്പറ്റുന്ന ‘ലക്ഷപ്രഭു’വായി എബ്രഹാം തുടരുന്നു.
പിണറായി 3.0 എന്ന ‘രക്ഷാകവചം’
അടുത്തിടെ കിഫ്ബിയുടെ നേട്ടങ്ങളെക്കുറിച്ചും സർക്കാരിന്റെ ഇല്ലാത്ത വികസന നയങ്ങളെക്കുറിച്ചും എബ്രഹാം വാതോരാതെ സംസാരിക്കുന്നത് തന്റെ കസേര സംരക്ഷിക്കാനാണെന്ന ആക്ഷേപം ശക്തമാണ്. ഭരണവിരുദ്ധ വികാരം ആളിക്കത്തുമ്പോൾ, യു.ഡി.എഫ് അധികാരത്തിൽ വന്നാൽ എബ്രഹാമിന് നഷ്ടപ്പെടുന്നത് ലക്ഷങ്ങളുടെ ഈ ശമ്പളം മാത്രമല്ല.
”ഭരണമാറ്റം സംഭവിച്ചാൽ കിഫ്ബിയിലെ ശതകോടികളുടെ ഇടപാടുകളും മസാല ബോണ്ട് വിവാദവും ആഴത്തിൽ അന്വേഷിക്കപ്പെടുമെന്ന് ഉറപ്പാണ്. ഇത് എബ്രഹാമിനെ ജയിൽവാസം വരെ എത്തിച്ചേക്കാവുന്ന വലിയ പ്രതിസന്ധിയിലേക്കാണ് വിരൽ ചൂണ്ടുന്നത്.”
പിണറായി ഭരണത്തിന്റെ തണലിൽ അന്വേഷണങ്ങളിൽ നിന്നും രക്ഷപ്പെടാൻ സാധിക്കുമെങ്കിലും, ഒരു ഭരണമാറ്റം സംഭവിച്ചാൽ കസേര തെറിക്കുമെന്നും അന്വേഷണങ്ങൾ മുറുകുമെന്നും എബ്രഹാമിന് നന്നായറിയാം.
നികുതിക്കൊള്ളയും വിലക്കയറ്റവും കൊണ്ട് പൊറുതിമുട്ടിയ ജനങ്ങൾ ഭരണമാറ്റം ആഗ്രഹിക്കുമ്പോൾ, സ്വന്തം കസേരയും ശമ്പളവും നിലനിർത്താൻ പിണറായി 3.0 എന്ന സ്വപ്നത്തിനായി കാത്തിരിക്കുകയാണ് ഡോ. കെ.എം. എബ്രഹാം.
