തിരുവനന്തപുരം: ലോകത്തിലെ ഏറ്റവും പ്രായം കുറഞ്ഞ ഓട്ടിസം ബാധിതനായ എഴുത്തുകാരനും തത്വചിന്തകനുമായ നയൻ എഴുതിയ ‘ഓട്ടിസം ഇൻ ആൻ ഓട്ടിസ്റ്റിക് മൈൻഡ്’ (Autism in an Autistic Mind) എന്ന പുസ്തകം പ്രകാശനം ചെയ്തു. തിരുവനന്തപുരത്ത് നടന്ന ചടങ്ങിൽ മുഖ്യമന്ത്രി വി. ഡി. സതീശനാണ് പുസ്തകം പ്രകാശനം ചെയ്തത്.
ഓട്ടിസത്തെക്കുറിച്ചുള്ള പരമ്പരാഗതമായ എല്ലാ പൊതുധാരണകളെയും തിരുത്തിക്കുറിച്ചുകൊണ്ടാണ് 17 വയസ്സുകാരനായ നയൻ ഈ പുസ്തകം രചിച്ചിരിക്കുന്നത്. മനുഷ്യന് ചിന്തിക്കാൻ കഴിയുന്നതിനും അപ്പുറമുള്ള ഒരു ലോകത്തെക്കുറിച്ചാണ് പുസ്തകത്തിൽ പ്രതിപാദിക്കുന്നത്. പ്രകൃതിയെ സ്വന്തം അമ്മയായി കാണണമെന്ന മഹത്തായ സന്ദേശമാണ് ഈ കൊച്ചു മിടുക്കൻ സമൂഹത്തിന് നൽകുന്നത്.
പുസ്തക പ്രകാശനത്തിന് ശേഷം തൻ്റെ സോഷ്യൽ മീഡിയ അക്കൗണ്ടിലൂടെ വി. ഡി. സതീശൻ പങ്കുവെച്ച കുറിപ്പ് ഏറെ ശ്രദ്ധ നേടി.
”പ്രകൃതിയെ അമ്മയായി കാണണമെന്നാണ് ഈ കുട്ടി നമ്മളെ പഠിപ്പിക്കുന്നത്. ഓട്ടിസത്തെ കുറിച്ചുള്ള എല്ലാ ധാരണകളെയും തിരുത്തിക്കുറിക്കുകയാണ്. നമുക്ക് ചിന്തിക്കാന്‍ കഴിയുന്നതിനും അപ്പുറമുള്ള ലോകത്തെ കുറിച്ചാണ് പറയുന്നത്. നയന്റെ അമ്മ, എന്തൊരു അമ്മയാണ്! ഈ അമ്മയാണ് മകനെ ചേര്‍ത്ത് പിടിച്ച് ഈ പുസ്തകങ്ങളൊക്കെ എഴുതിപ്പിച്ചത്. പുസ്തകം വായിച്ച് മടക്കി വച്ചപ്പോള്‍ ആ അമ്മയെ ഞാന്‍ നമസ്‌ക്കരിച്ചു പോയി. കേരളം മുഴുവന്‍ ഈ പുസ്തകം വായിക്കണം. എല്ലാവരെ കൊണ്ടും ഈ പുസ്തകം വായിപ്പിക്കണം.”
സംസാരിക്കാൻ ബുദ്ധിമുട്ടുള്ള നയൻ ലാപ്ടോപ്പ് ഉപയോഗിച്ച് ടൈപ്പ് ചെയ്താണ് തൻ്റെ ചിന്തകൾക്കും ആശയങ്ങൾക്കും രൂപം നൽകിയത്. കുട്ടിക്കാലത്ത് സ്കൂൾ പ്രവേശനത്തിന് അഭിമുഖീകരിച്ച വെല്ലുവിളികളെ മറികടന്ന്, അമ്മ പ്രിയങ്കയുടെ പൂർണ്ണ പിന്തുണയോടെയാണ് നയൻ ഈ നേട്ടം കൈവരിച്ചത്. ഓട്ടിസം ബാധിച്ച വ്യക്തികളെ പുറത്തുനിന്ന് നോക്കിക്കാണുന്നതിന് പകരം അവരുടെ ഉള്ളിലെ ലോകം മനസ്സിലാക്കാൻ ഈ പുസ്തകം ഏറെ സഹായിക്കുമെന്ന് ചടങ്ങിൽ അഭിപ്രായപ്പെട്ടു.
