തിരുവനന്തപുരം: രണ്ടാം പിണറായി സർക്കാരിൻ്റെ ഭരണകാലത്ത് സംസ്ഥാനം കണ്ട ഏറ്റവും വലിയ സാമ്പത്തിക ധൂർത്തും മാമാങ്കവുമായിരുന്ന ‘നവകേരള സദസ്സ്. 2023 നവംബർ 18-ന് കാസർകോട് നിന്ന് ആരംഭിച്ച് 36 ദിവസങ്ങളിലായി 140 മണ്ഡലങ്ങളിലൂടെ കടന്നുപോയ ഈ പരിപാടിക്കായി പിരിച്ചെടുത്ത തുകയുടെയോ, പണം നൽകിയ സ്പോൺസർമാരുടെയോ വിവരങ്ങൾ പുറത്തുവിടാത്ത മുഖ്യമന്ത്രിയായിരുന്നു പിണറായി വിജയൻ.
കോടികളുടെ ലക്ഷ്വറി ബസും മതിലുകൾ പൊളിച്ച വിവാദവും
മുഖ്യമന്ത്രിക്കും 20 ക്യാബിനറ്റ് മന്ത്രിമാർക്കും ഒന്നിച്ച് യാത്ര ചെയ്യാനായി നിർമ്മിച്ച അത്യാധുനിക ആഡംബര ഭാരത് ബെൻസ് ബസ് തന്നെ തുടക്കം മുതൽ വൻ വിവാദങ്ങൾക്ക് വഴിവെച്ചിരുന്നു. ലിഫ്റ്റും എയർകണ്ടീഷൻ സൗകര്യങ്ങളും മറ്റ് സൗകര്യങ്ങളും ഉൾപ്പെടെ ഒരുക്കിയതോടെ ബസിന്റെ മാത്രം ചെലവ് രണ്ട് കോടി രൂപ കവിഞ്ഞു. ചില മണ്ഡലങ്ങളിൽ ഈ ബസിന് സുഗമമായി കയറാനും പാർക്ക് ചെയ്യാനുമായി വിദ്യാലയങ്ങളുടെ മതിലുകൾ വരെ ഇടിച്ച് നിരത്തിയത് ജനരോഷത്തിന് ഇടയാക്കി.
പിരിവ് കോടികൾ, വിവരവകാശത്തിനും നിയമസഭയ്ക്കും മറുപടിയില്ല
ഓരോ മണ്ഡലങ്ങളിലും പ്രാദേശിക സംഘാടക സമിതികൾ രൂപീകരിച്ചാണ് പരിപാടിക്കായി വ്യാപകമായി പിരിവുകൾ നടത്തിയത്. തദ്ദേശ സ്വയംഭരണ സ്ഥാപനങ്ങൾ, സഹകരണ ബാങ്കുകൾ, വൻകിട വ്യാപാരികൾ, വ്യവസായികൾ തുടങ്ങിയവരിൽ നിന്ന് സ്പോൺസർഷിപ്പ് ഇനത്തിൽ വൻ തുകകൾ കൈപ്പറ്റി. എന്നാൽ ഈ തുക എത്രയാണെന്നോ, ആരെല്ലാമാണ് പദ്ധതിയുടെ യഥാർത്ഥ സ്പോൺസർമാർ എന്നതിനെക്കുറിച്ചോ യാതൊരുവിധ ഔദ്യോഗിക കണക്കുകളും പുറത്തുവിട്ടില്ല.
നിയമസഭയിൽ പ്രതിപക്ഷം ഉന്നയിച്ച ചോദ്യങ്ങൾക്കും, പൊതുപ്രവർത്തകരും മാധ്യമങ്ങളും നൽകിയ വിവരവകാശ (RTI) അപേക്ഷകൾക്കും സർക്കാരിൽ നിന്നും ലഭിച്ച സ്ഥിരം മറുപടി ഒന്ന് മാത്രമായിരുന്നു: “മണ്ഡലാടിസ്ഥാനത്തിലാണ് സംഘാടക സമിതികൾ പ്രവർത്തിച്ചത്. സ്പോൺസർഷിപ്പ് വഴിയാണ് പരിപാടി നടത്തിയത്, ഇതിന്റെ വിവരങ്ങൾ ക്രോഡീകരിച്ചിട്ടില്ല.”
രഹസ്യമായി തുടരുന്ന സ്പോൺസർമാർ
കോടികളുടെ പണപ്പിരിവ് നടത്തി ജനങ്ങളുടെ കണ്ണിൽ പൊടിയിടുകയും, അതേസമയം അതിനു പിന്നിലെ യഥാർത്ഥ സ്പോൺസർമാർ ആരാണെന്ന് വെളിപ്പെടുത്താതെ രഹസ്യമാക്കി വെക്കുകയും ചെയ്ത മുഖ്യമന്ത്രിയായിരുന്നു പിണറായി വിജയൻ.
