തിരുവനന്തപുരം: കേരളം ഉറ്റുനോക്കുന്ന മെയ് 4-ലെ തിരഞ്ഞെടുപ്പ് ഫലം എൽ.ഡി.എഫിന് തിരിച്ചടിയാകുമെന്ന് ഉറപ്പായതോടെ, കസേര സംരക്ഷിക്കാൻ തന്ത്രങ്ങളുമായി മുഖ്യമന്ത്രിയുടെ പ്രിൻസിപ്പൽ ചീഫ് സെക്രട്ടറി കെ.എം. എബ്രഹാം. യു.ഡി.എഫ് അധികാരത്തിൽ വന്നാൽ തന്നെ കഴുത്തിന് പിടിച്ചു പുറത്താക്കുമെന്ന കൃത്യമായ ഭയമാണ് ഫലം വരുന്നതിന് മുൻപേ രാജി കത്ത് തയ്യാറാക്കാൻ എബ്രഹാമിനെ പ്രേരിപ്പിച്ചത്.
നാണക്കേട് ഒഴിവാക്കാൻ രാജി; അണിയറയിൽ തിരക്കിട്ട നീക്കം
കിഫ്ബി സി.ഇ.ഒ പദവിയും കെ-ഡിസ്ക് വൈസ് ചെയർമാൻ സ്ഥാനവും ഇടതുപക്ഷത്തിന്റെ തണലിൽ എബ്രഹാം ആസ്വദിച്ച ‘വിഐപി’ അധികാരങ്ങളാണ്. എന്നാൽ, പ്രതിപക്ഷം അധികാരത്തിലെത്തിയാൽ ഈ പദവികളിൽ നിന്ന് തന്നെ ആദ്യമേ തെറിപ്പിക്കുമെന്ന് അദ്ദേഹം തിരിച്ചറിയുന്നു. യു.ഡി.എഫ് സർക്കാരിൽ നിന്ന് പുറത്താക്കൽ ഉത്തരവ് വാങ്ങുന്നതിനേക്കാൾ ഭേദം മാന്യമായി ഒഴിഞ്ഞുപോവുക എന്ന ‘സേഫ് ഗെയിം’ കളിക്കാനാണ് എബ്രഹാമിന് കിട്ടിയിരിക്കുന്ന രഹസ്യ ഉപദേശം.
കിഫ്കോണിൽ കടിച്ചുതൂങ്ങാൻ ചരടുവലി
പ്രധാന പദവികൾ രാജിവെക്കുന്നു എന്ന് പുറമേ പറയുമ്പോഴും, തനിക്ക് സ്വാധീനമുള്ള കിഫ്കോണിന്റെ (KIIFCON) തലപ്പത്ത് എങ്ങനെയെങ്കിലും തുടരാൻ എബ്രഹാം ആവനാഴിയിലെ സകല അസ്ത്രങ്ങളും പ്രയോഗിക്കുന്നുണ്ട്. മറ്റെല്ലാ പദവികളും ഉപേക്ഷിച്ചാലും കൺസൾട്ടൻസി രാജാവായി തുടരാൻ സാധിക്കുന്ന ഈ തസ്തിക വിട്ടുകൊടുക്കാൻ അദ്ദേഹം തയ്യാറല്ല. ഇതിനായി രാഷ്ട്രീയ തലത്തിൽ വലിയ ചരടുവലികളാണ് തിരുവനന്തപുരത്ത് നടക്കുന്നത്.
പിണറായിയുടെ ‘ഷാഡോ മുഖ്യമന്ത്രി’യുടെ വീഴ്ച
പിണറായി സർക്കാരിന്റെ കാലത്ത് ഐ.എ.എസ് ഉദ്യോഗസ്ഥർക്ക് മുകളിൽ ‘സൂപ്പർ പവർ’ ആയി വാണിരുന്ന എബ്രഹാമിന് യു.ഡി.എഫ് ഭരണത്തിൽ പിടിച്ചുനിൽക്കാൻ കഴിയില്ലെന്ന് രാഷ്ട്രീയ നിരീക്ഷകർ വിലയിരുത്തുന്നു. മെയ് 4-ന് എൽ.ഡി.എഫ് വീണാൽ, പിണറായിയുടെ വിശ്വസ്തന്റെ ഔദ്യോഗിക ജീവിതത്തിലെ ഏറ്റവും വലിയ തിരിച്ചടിയാകും അത്. പുറത്താക്കപ്പെടുന്നതിന് മുൻപേ ഇറങ്ങിപ്പോകാനുള്ള എബ്രഹാമിന്റെ ഈ നീക്കം സെക്രട്ടേറിയറ്റിൽ വലിയ ചർച്ചകൾക്ക് വഴിമരുന്നിട്ടിരിക്കുകയാണ്.
