തിരുവനന്തപുരം: ഹിമാചൽ പ്രദേശിൽ നിന്നുള്ള വൈദ്യുതി ലഭ്യതയുടെ പേരിൽ സംസ്ഥാനത്ത് നിർമ്മിത വൈദ്യുതി പ്രതിസന്ധി ചൂണ്ടിക്കാട്ടി മുഖ്യമന്ത്രി വി.ഡി. സതീശനെ തിടുക്കപ്പെട്ട് തീരുമാനമെടുപ്പിക്കാൻ കെ.എസ്.ഇ.ബി തലത്തിൽ നടന്ന വൻ ഗൂഢാലോചന പുറത്തായി. ഇല്ലാത്ത കരാറിന്റെ പേരിൽ മുഖ്യമന്ത്രിക്ക് മേൽ കെ.എസ്.ഇ.ബി ചെയർമാൻ രാജമാണിക്യം വിഭാവനം ചെയ്ത നീക്കങ്ങളാണ് മുഖ്യമന്ത്രിയുടെ കൃത്യമായ സമയബന്ധിത ഇടപെടലിൽ പൊളിഞ്ഞത്.
നവംബർ 1 മുതൽ സംസ്ഥാനത്ത് പവർകട്ട് ഉണ്ടാകുമെന്നും ഹിമാചലിൽ നിന്നുള്ള ഫയലിൽ മുഖ്യമന്ത്രി അടയിരിക്കുകയാണെന്നും കാണിച്ച് ചില പ്രമുഖ മാധ്യമങ്ങളിൽ വാർത്തകൾ വന്നിരുന്നു. എന്നാൽ ഇതിന് പിന്നിൽ കെ.എസ്.ഇ.ബിയിലെ ചില താൽപ്പര്യക്കാരുടെ ദുരൂഹ നീക്കങ്ങളായിരുന്നു.
രാജസ്ഥാൻ റെഗുലേറ്ററി കമ്മീഷൻ രേഖകൾ പ്രകാരം ഒക്ടോബർ 17-ന് തന്നെ ഹിമാചൽ വൈദ്യുതി വാങ്ങാൻ രാജസ്ഥാൻ വൈദ്യുതി ബോർഡ് തീരുമാനമെടുത്തിരുന്നു. അതിനുശേഷം ഒക്ടോബർ 18-ലെ ഡിജിറ്റൽ ഒപ്പോടു കൂടി ഹിമാചൽ വൈദ്യുതി രാജസ്ഥാനിലേക്ക് കൈമാറിയതായുള്ള രേഖ പുറത്തുവന്നിട്ടും, കെ.എസ്.ഇ.ബി മാനേജ്‌മെന്റ് കേരള മുഖ്യമന്ത്രിക്ക് മുൻപിൽ ഹിമാചൽ കരാറിനായി സമ്മർദ്ദം തുടർന്നു.
വിഷയത്തിന്റെ ഗുരുതാവസ്ഥയും രേഖകളുടെ സുതാര്യതയും കൃത്യമായി പരിശോധിച്ച മുഖ്യമന്ത്രി വി.ഡി. സതീശൻ, സംസ്ഥാനത്തിന് ഭീമമായ സാമ്പത്തിക ബാധ്യത വരുത്തിവെക്കുന്നതും നിലവിലില്ലാത്തതുമായ ഈ ഓഫറിന് പിന്നിലെ കളികൾ തിരിച്ചറിയുകയായിരുന്നു. KSEB യുടെ ഗൂഢനീക്കങ്ങൾ ഇതോടെ പൊളിഞ്ഞു.
