കൊല്ലം: കേരളത്തിന്റെ തനത് നാടൻകലാരൂപങ്ങളിലൊന്നായ സീതകളി നവംബർ 7 ശനിയാഴ്ച വൈകിട്ട് 6.30ന് കൊല്ലം ആശ്രാമം ശ്രീനാരായണഗുരു സാംസ്കാരിക സമുച്ചയത്തിൽ അരങ്ങേറുന്നു. കേരള ഫോക്‌ലോർ അക്കാദമിയുടെ ആഭിമുഖ്യത്തിൽ സാംസ്കാരിക വകുപ്പിന്റെ സാംസ്കാരിക കാര്യ ഡയറക്ടറേറ്റിന്റെ ഏകോപനത്തിലാണ് ഈ സാംസ്കാരിക പരിപാടി സംഘടിപ്പിച്ചിരിക്കുന്നത്.
രാമായണകഥയെ ആസ്പദമാക്കി രൂപംകൊണ്ട പരമ്പരാഗത നാടൻ കലാരൂപമാണ് കൊല്ലത്തിന്റെ സാംസ്കാരിക പാരമ്പര്യത്തിൽ വേരൂന്നിയ സീതകളി. പാട്ട്, നൃത്തം, അഭിനയാവിഷ്കാരം എന്നിവ മനോഹരമായി സമന്വയിപ്പിച്ചുകൊണ്ട് സീതയുടെ ജീവിതവും രാമായണത്തിലെ വിവിധ സന്ദർഭങ്ങളും തനതായ അവതരണശൈലിയിലൂടെ ഈ കലാരൂപത്തിലൂടെ അരങ്ങിലെത്തുന്നു.
പ്രാദേശിക കലാപാരമ്പര്യത്തിന്റെയും ജനകീയ കലാസംസ്കാരത്തിന്റെയും സവിശേഷതകൾ ഉൾക്കൊള്ളുന്ന സീതകളി പുതുതലമുറയ്ക്ക് പരിചയപ്പെടുത്തുകയെന്നതും, പൈതൃക കലാരൂപങ്ങളുടെ സംരക്ഷണവും പ്രചാരണവും ഉറപ്പാക്കുകയെന്നതുമാണ് ഈ പരിപാടിയുടെ പ്രധാന ലക്ഷ്യം. കൊല്ലത്തെ കലാസ്വാദകർക്കും പൊതുജനങ്ങൾക്കും ഇതൊരു അപൂർവ്വ സുവർണ്ണാവസരമായിരിക്കുമെന്ന് സംഘാടകർ അറിയിച്ചു.
