തിരുവനന്തപുരം: കേരളത്തിന്റെ ഭാവി തലമുറയെ കാർന്നുതിന്നുന്ന ലഹരി മാഫിയ സംസ്ഥാനത്ത് ആധിപത്യം ഉറപ്പിക്കുന്നു. കഴിഞ്ഞ പത്തു വർഷത്തെ കണക്കുകൾ പരിശോധിക്കുമ്പോൾ കേരള ചരിത്രത്തിലെ ഏറ്റവും ഭീതിദമായ സാഹചര്യത്തിലൂടെയാണ് സംസ്ഥാനം കടന്നുപോകുന്നതെന്ന് വ്യക്തം. വിദ്യാർത്ഥികളെയും യുവാക്കളെയും ലക്ഷ്യമിട്ട് ലഹരി മാഫിയ വലവിരിക്കുമ്പോൾ, അത് തടയുന്നതിൽ സർക്കാർ സംവിധാനങ്ങൾ പരാജയപ്പെടുന്നു എന്ന ഗുരുതരമായ ആരോപണമാണ് ഉയരുന്നത്.
നിയമസഭയെ ഞെട്ടിച്ച കണക്കുകൾ
2026 ജനുവരി 27-ന് എക്സൈസ് മന്ത്രി എം.ബി. രാജേഷ് നിയമസഭയിൽ സമർപ്പിച്ച കണക്കുകൾ കേരളത്തെ ഞെട്ടിക്കുന്നതാണ്. 2016 മുതൽ 2026 ജനുവരി 20 വരെയുള്ള കാലയളവിൽ മാത്രം വിദ്യാർത്ഥികളും യുവാക്കളും പ്രതികളായ 48,371 എൻ.ഡി.പി.എസ് (NDPS) കേസുകളാണ് സംസ്ഥാനത്ത് രജിസ്റ്റർ ചെയ്തത്.
ലഹരി മാഫിയയുടെ വേരുകൾ എത്രത്തോളം ആഴത്തിൽ ഇറങ്ങിക്കഴിഞ്ഞു എന്നതിന്റെ തെളിവാണ് പിടിച്ചെടുക്കപ്പെട്ട ലഹരിമരുന്നുകളുടെ വിപണി മൂല്യം. ഏകദേശം 554.57 കോടി രൂപയുടെ മയക്കുമരുന്നാണ് ഈ കാലയളവിൽ പിടികൂടിയത്.
പിടിച്ചെടുത്ത ലഹരിമരുന്നുകളുടെ വിപണി മൂല്യം ഒറ്റനോട്ടത്തിൽ:
| ലഹരിമരുന്ന് | വിപണി മൂല്യം (കോടിയിൽ) |
|---|---|
| ഹാഷിഷ് | 272.24 |
| മെതാംഫിറ്റമിൻ | 65.66 |
| എം.ഡി.എം.എ (MDMA) | 60.99 |
| കഞ്ചാവ് | 146.13 |
| ഹെറോയിൻ | 8.3 |
| ബ്രൗൺ ഷുഗർ | 0.54 |
| കൊക്കൈൻ | 0.42 |
| ഒപ്പിയം | 0.29 |
ഉറവിടം കണ്ടെത്താനാകാതെ സർക്കാർ
സിന്തറ്റിക് ലഹരിമരുന്നുകളുടെ കടന്നുകയറ്റം കേരളത്തെ ഒരു ‘ഡ്രഗ് ഹബ്ബ്’ ആക്കി മാറ്റിക്കൊണ്ടിരിക്കുകയാണ്. എന്നാൽ, ഈ മയക്കുമരുന്നുകളുടെ യഥാർത്ഥ ഉറവിടം (Source) കണ്ടെത്താൻ പോലീസിനോ എക്സൈസിനോ സാധിക്കുന്നില്ല എന്നത് സ്ഥിതിഗതികൾ സങ്കീർണ്ണമാക്കുന്നു. അന്തർസംസ്ഥാന ബന്ധങ്ങളുള്ള വലിയ മാഫിയകൾക്ക് മുന്നിൽ ഭരണകൂടം നിസ്സഹായരാകുകയാണോ എന്ന ചോദ്യം പൊതുസമൂഹം ഉയർത്തുന്നു.
ലഹരി സുലഭമായ ഇത്തരമൊരു കാലഘട്ടം കേരള ചരിത്രത്തിൽ ഇതിനുമുമ്പ് ഉണ്ടായിട്ടില്ല. വരും തലമുറയെ ഈ വിപത്തിൽ നിന്ന് രക്ഷിക്കാൻ കർക്കശമായ നടപടികൾ എടുക്കാത്ത പിണറായി വിജയന്റെ പത്തു വർഷത്തെ ഭരണകാലം ‘ലഹരി മാഫിയയുടെ സുവർണ്ണകാലം’ എന്നായിരിക്കും ചരിത്രം രേഖപ്പെടുത്തുക.
