തിരുവനന്തപുരം: മുഖ്യമന്ത്രി വി.ഡി സതീശൻ്റെ ധനകാര്യ മാനേജ്‌മെന്റിൽ ശ്രദ്ധേയമായ നേട്ടം കൈവരിച്ച് കേരളം കുതിക്കുന്നു. 2026 ഓഗസ്റ്റ് വരെയുള്ള കണക്കുകൾ പ്രകാരം സംസ്ഥാനത്തിന്റെ ആകെ വരുമാനം 27,896.01 കോടി രൂപയായി ഉയർന്നു. കഴിഞ്ഞ വർഷം ഇതേ കാലയളവിൽ (2025 ഓഗസ്റ്റ് വരെ) ഇത് 24,101.68 കോടി രൂപയായിരുന്നു. വാർഷിക വരുമാനത്തിൽ 15.74 ശതമാനത്തിന്റെ മികച്ച വളർച്ചയാണ് രേഖപ്പെടുത്തിയിരിക്കുന്നത്.
ജി.എസ്.ടി വരുമാനത്തിലെ കുതിപ്പ്:
ജി.എസ്.ടി വരുമാനത്തിൽ (GST Revenue) മുൻവർഷത്തെ അപേക്ഷിച്ച് 21.78% വളർച്ചയാണ് രേഖപ്പെടുത്തിയത്. 2025 ഓഗസ്റ്റ് വരെ 13,312.23 കോടി രൂപയായിരുന്ന ജി.എസ്.ടി വരുമാനം, 2026 ഓഗസ്റ്റിൽ 16,211.26 കോടിയായി വർദ്ധിച്ചു. 2026 ഓഗസ്റ്റ് മാസത്തിൽ മാത്രം 3,268 കോടി രൂപയുടെ ജി.എസ്.ടി വരുമാനമാണ് ലഭിച്ചത്. ഇതിൽ പണമായി ലഭിച്ച എസ്.ജി.എസ്.ടി (SGST Paid in Cash) 1,368 കോടി രൂപയും ഐ.ജി.എസ്.ടി സെറ്റിൽമെന്റ് (IGST Settlement) 1,899 കോടി രൂപയുമാണ്.
ജി.എസ്.ടി കളക്ഷൻ (GST Collection) 2025 ഓഗസ്റ്റിലെ 14,939.50 കോടിയിൽ നിന്ന് 9.94% വർദ്ധിച്ച് 16,424.09 കോടി രൂപയിലുമെത്തി.
വാറ്റ് വരുമാനം:
(VAT): വാറ്റ് വരുമാനത്തിൽ 10.89% വളർച്ചയുണ്ടായി. കഴിഞ്ഞ വർഷത്തെ 141.09 കോടി രൂപയിൽ നിന്ന് 156.45 കോടി രൂപയായി ഇത് വർദ്ധിച്ചു.
കെ.ജി.എസ്.ടി (KGST): കെ.ജി.എസ്.ടി വരുമാനം 8.26% വർദ്ധിച്ച് 11,528.30 കോടി രൂപയായി ഉയർന്നു. (2025 ഓഗസ്റ്റ് വരെ ഇത് 10,648.36 കോടി രൂപയായിരുന്നു).
2026 ഓഗസ്റ്റ് മാസത്തിലെ ആകെ നോൺ-ജി.എസ്.ടി വരുമാനം 2,292 കോടി രൂപയും, ഓഗസ്റ്റിലെ മാത്രം ആകെ വരുമാനം 5,559 കോടി രൂപയുമാണ്. നികുതി പിരിവിലെ കൃത്യതയും സാമ്പത്തിക മാനേജ്‌മെന്റിലെ ദീർഘവീക്ഷണവുമാണ് സംസ്ഥാനത്തിന്റെ ഈ സുസ്ഥിര വളർച്ചയ്ക്ക് പിന്നിൽ.
