തിരുവനന്തപുരം: കേരളത്തിലെ ദേശീയ-രാജ്യാന്തര കായിക താരങ്ങൾക്ക് നൽകാനുള്ള പാരിതോഷിക കുടിശിക ഏകദേശം 11.5 കോടി രൂപയെന്ന് കായിക വകുപ്പ് സ്പെഷ്യൽ സെക്രട്ടറി പ്രശാന്ത് IAS. 2018 മുതൽ വിവിധ ദേശീയ-രാജ്യാന്തര മത്സരങ്ങളിൽ മെഡൽ നേടിയ താരങ്ങൾക്ക് നൽകാനുള്ള തുകയാണ് ഇത്രയും വരുന്നതെന്ന് പ്രശാന്ത് IAS ഫേസ്ബുക്കിൽ പങ്കുവെച്ച കുറിപ്പിൽ വ്യക്തമാക്കി.
ഏഷ്യൻ ഗെയിംസിൽ കേരളത്തിന്റെ വിദർശ കെ. വിനോദ് വെള്ളിമെഡൽ നേടിയ പശ്ചാത്തലത്തിൽ എഴുതിയ കുറിപ്പിലാണ് പാരിതോഷിക കുടിശികയുടെ കണക്കും പ്രശാന്ത് IAS പുറത്തുവിട്ടത്.
കുടിശികയുടെ പട്ടിക തയ്യാറാക്കി തുക അനുവദിക്കുന്നതിനുള്ള നടപടികൾ ആരംഭിച്ചതായും ആദ്യഘട്ടമായി 1.5 കോടി രൂപ അനുവദിച്ചതായും കുറിപ്പിൽ പറയുന്നു.
പുതിയ മെഡൽ ജേതാക്കൾക്ക് പാരിതോഷികം പ്രഖ്യാപിക്കുന്നതിനൊപ്പം നേരത്തെ പ്രഖ്യാപിച്ച തുകകൾ സമയബന്ധിതമായി വിതരണം ചെയ്യേണ്ടതിന്റെ ആവശ്യകതയും പ്രശാന്ത് IAS ചൂണ്ടിക്കാട്ടുന്നു.
“പുതിയ വാക്കിന്റെ വില നിശ്ചയിക്കുന്നത് പഴയ വാക്ക് എത്രത്തോളം പാലിച്ചു എന്നതുകൂടി നോക്കിയാണ്” എന്ന ആശയമാണ് കുറിപ്പിൽ അദ്ദേഹം മുന്നോട്ടുവയ്ക്കുന്നത്.
കായികതാരങ്ങൾക്ക് സർക്കാർ പ്രഖ്യാപിക്കുന്ന പാരിതോഷികം വെറും പത്രക്കുറിപ്പല്ലെന്നും പരിശീലനത്തിനായി എടുത്ത കടം തീർക്കാനും പുതിയ ഉപകരണങ്ങൾ വാങ്ങാനും അടുത്ത മത്സരത്തിനുള്ള ചെലവുകൾ കണ്ടെത്താനും കുടുംബത്തിന്റെ സാമ്പത്തിക ബാധ്യത കുറയ്ക്കാനും അത് സഹായിക്കുമെന്നും കുറിപ്പിൽ പറയുന്നു.
അതേസമയം, കുടിശികയെ ആരെയെങ്കിലും കുറ്റപ്പെടുത്താനുള്ള രാഷ്ട്രീയ ആയുധമായി കാണാതെ, ഇത്തരത്തിലുള്ള കാലതാമസം ആവർത്തിക്കാതിരിക്കാനുള്ള പാഠമായി കാണണമെന്നും അദ്ദേഹം അഭിപ്രായപ്പെടുന്നു.
ഓരോ മെഡലിന്റെയും വിവരങ്ങൾ, അർഹമായ പാരിതോഷികം, ഫയലിന്റെ നിലവിലെ സ്ഥിതി, അനുവദിച്ച തുക തുടങ്ങിയവ ഒറ്റനോട്ടത്തിൽ അറിയാൻ കഴിയുന്ന ഏകീകൃത ഡിജിറ്റൽ സംവിധാനം വേണമെന്നാണ് നിർദേശം. ഫലം പ്രഖ്യാപിച്ചതിന് പിന്നാലെ താരത്തിന്റെ അപേക്ഷയ്ക്കോ ഓർമ്മപ്പെടുത്തലിനോ കാത്തുനിൽക്കാതെ സർക്കാർ നടപടികൾ സ്വമേധയാ ആരംഭിക്കുന്ന സംവിധാനവും ആവശ്യമാണ്.
വിദർശ കെ. വിനോദിന്റെ മെഡൽ നേട്ടത്തിന് പിന്നാലെ അവർക്കുള്ള പാരിതോഷികവും യോഗ്യതയ്ക്കനുസരിച്ചുള്ള ജോലി നൽകുന്നതിനുള്ള നടപടികളും വേഗത്തിൽ ആരംഭിച്ചതായും പ്രശാന്ത് IAS കുറിപ്പിൽ വ്യക്തമാക്കുന്നു.
വെള്ളിമെഡലിന് 30 ലക്ഷം രൂപ പാരിതോഷികമാണ് സർക്കാർ പ്രഖ്യാപിച്ചിട്ടുള്ളത്. സ്വർണത്തിന് 50 ലക്ഷം, വെള്ളിക്ക് 30 ലക്ഷം, വെങ്കലത്തിന് 20 ലക്ഷം എന്നിങ്ങനെയാണ് പ്രഖ്യാപിച്ചിട്ടുള്ള നിരക്കുകൾ. പരിശീലകർക്കും പ്രത്യേക പാരിതോഷികം നൽകുന്ന നയമാണ് സർക്കാർ പ്രഖ്യാപിച്ചിട്ടുള്ളത്.
വിദർശയുടെ വിജയത്തെ അഭിനന്ദിക്കുന്നതിനൊപ്പം, മെഡൽ നേടുന്ന താരങ്ങളെ മാത്രം ആഘോഷിക്കുന്നതിനപ്പുറം കായികരംഗത്ത് നിലനിൽക്കുന്ന സാമ്പത്തികവും അടിസ്ഥാനസൗകര്യപരവുമായ പ്രശ്നങ്ങൾ പരിഹരിക്കേണ്ടതുണ്ടെന്നും പ്രശാന്ത് IAS ചൂണ്ടിക്കാട്ടുന്നു.
കായികതാരങ്ങളുടെ കുടിശിക സമയബന്ധിതമായി വിതരണം ചെയ്യുകയും, പുതിയ തലമുറയിലെ താരങ്ങൾക്ക് പരിശീലനം, ഉപകരണങ്ങൾ, തൊഴിൽ, സാമ്പത്തിക സുരക്ഷ എന്നിവ ഉറപ്പാക്കുകയും ചെയ്യുന്നതാണ് മെഡൽ നേട്ടങ്ങളെ ദീർഘകാല കായിക മുന്നേറ്റമാക്കി മാറ്റാനുള്ള വഴി എന്ന സന്ദേശമാണ് കുറിപ്പിൽ ഉയരുന്നത്.
