തിരുവനന്തപുരം: കേരള സ്റ്റേറ്റ് റിമോട്ട് സെൻസിംഗ് ആൻഡ് എൻവയോൺമെൻ്റ് സെൻ്ററിൽ (KSREC) സർക്കാരിന്റെ മുൻകൂർ അനുമതിയില്ലാതെ 52 പ്രൊജക്ട് ജീവനക്കാരുടെ കരാർ കാലാവധി നീട്ടി നൽകിയ നടപടി വൻ വിവാദത്തിലേക്ക്. പിണറായി സർക്കാരിന്റെ കാലത്ത് കരാർ അടിസ്ഥാനത്തിൽ പ്രവേശിച്ച ജീവനക്കാരുടെ കാലാവധിയാണ് മാനദണ്ഡങ്ങൾ കാറ്റിൽപ്പറത്തി നീട്ടി നൽകിയിരിക്കുന്നത്.
ഈ ജീവനക്കാരുടെ സർവീസ് കാലാവധി 2026 ജൂലൈ 24-ന് അവസാനിച്ചിരുന്നു. എന്നാൽ സർക്കാരിൽ നിന്ന് യാതൊരുവിധ ഔദ്യോഗിക അനുമതിയും വാങ്ങാതെ, സ്ഥാപനത്തിലെ അക്കൗണ്ട്സ് ഓഫീസർ ഇടപെട്ട് കാലാവധി 2027 മാർച്ച് 31 വരെ ദീർഘിപ്പിച്ച് ഉത്തരവിറക്കുകയായിരുന്നു.
പൊതുമേഖലാ സ്ഥാപനങ്ങളിൽ കരാർ നിയമനങ്ങളോ കാലാവധി നീട്ടലോ നടപ്പിലാക്കാൻ ഭരണവകുപ്പിന്റെയും ധനവകുപ്പിന്റെയും വ്യക്തമായ ഉത്തരവ് ആവശ്യമാണ്. എന്നാൽ ഇത്തരം നിയമനടപടികളെല്ലാം കാറ്റിൽപ്പറത്തിയാണ് അക്കൗണ്ട്സ് ഓഫീസറുടെ വിചിത്രമായ നടപടി.
