തിരുവനന്തപുരം: ഔദ്യോഗിക തിരക്കുകൾക്കിടയിലും ഒരു കുരുന്നിനെ അക്ഷരമുറ്റത്തേക്ക് ആനയിച്ച് പ്രതിപക്ഷ നേതാവ് വി.ഡി സതീശൻ. കാട്ടാക്കട സ്വദേശികളായ ജിനു – ജിൻസി ദമ്പതികളുടെ മകൻ ഡൈനനാണ് പ്രതിപക്ഷ നേതാവിന്റെ ഔദ്യോഗിക വസതിയായ കന്റോൻമെന്റ് ഹൗസിൽ വെച്ച് അക്ഷരലോകത്തേക്ക് ചുവടുവെച്ചത്.
ഇന്ന് രാവിലെയായിരുന്നു ഹൃദ്യമായ ഈ വിദ്യാരംഭ ചടങ്ങ് നടന്നത്. കുഞ്ഞിനെ മടിയിലിരുത്തി ഹരിശ്രീ കുറിപ്പിച്ച വി.ഡി സതീശൻ, അറിവിന്റെ ലോകത്തേക്ക് പ്രവേശിക്കുന്ന ഡൈനന് എല്ലാവിധ ഭാവുകങ്ങളും നേർന്നു. ലളിതമായ അന്തരീക്ഷത്തിൽ നടന്ന ഈ ചടങ്ങ് കണ്ടുനിന്നവർക്കും സന്തോഷമായി.
തങ്ങളുടെ മകനെ പ്രതിപക്ഷ നേതാവ് തന്നെ ഹരിശ്രീ കുറിപ്പിക്കണമെന്ന ആഗ്രഹവുമായാണ് ജിനുവും ജിൻസിയും കന്റോൻമെന്റ് ഹൗസിലെത്തിയത്. മാതാപിതാക്കളുടെ താല്പര്യത്തെ നിറഞ്ഞ മനസ്സോടെ സ്വീകരിച്ച വി.ഡി സതീശൻ, കുഞ്ഞിന് മധുരം നൽകിയ ശേഷമാണ് യാത്രയാക്കിയത്. ചടങ്ങിന്റെ ചിത്രങ്ങൾ സോഷ്യൽ മീഡിയയിൽ ഇതിനോടകം തന്നെ ശ്രദ്ധിക്കപ്പെട്ടിട്ടുണ്ട്.
