ന്യൂഡൽഹി: പാർലമെൻ്റിൽ പ്രസംഗിക്കുമ്പോൾ ഇംഗ്ലീഷിലോ ഹിന്ദിയിലോ വാക്കുകൾ കിട്ടാതെ കുഴങ്ങുന്ന എം.പിമാർക്ക് ഇനി ആശ്വസിക്കാം. ലോകസഭയിൽ മാതൃഭാഷയിൽ സംസാരിക്കാനുള്ള വിപുലമായ സംവിധാനങ്ങൾ ഒരുങ്ങുന്നു. ഇംഗ്ലീഷും ഹിന്ദിയും വശമില്ലാത്ത എം.പിമാർക്ക് സഭാനടപടികളിൽ കൂടുതൽ സജീവമായി ഇടപെടാൻ ഈ നീക്കം സഹായകമാകും.
ഭാഷാപ്രശ്നം ഇനി തടസ്സമാകില്ല
മുൻകാലങ്ങളിൽ കേരളത്തിൽ നിന്നുള്ള പല ജനപ്രതിനിധികളും ഇംഗ്ലീഷ് പ്രസംഗങ്ങളുടെ പേരിൽ വലിയ രീതിയിലുള്ള സൈബർ ആക്രമണങ്ങൾക്കും ട്രോളുകൾക്കും ഇരയായിട്ടുണ്ട്. 2014-19 കാലയളവിൽ സി.പി.എം നേതാവ് പി.കെ. ശ്രീമതി നടത്തിയ ഇംഗ്ലീഷ് പ്രസംഗം സോഷ്യൽ മീഡിയയിൽ വലിയ പരിഹാസങ്ങൾക്ക് വഴിവെച്ചിരുന്നു. പുതിയ മാറ്റം വരുന്നതോടെ, ഭാഷാപരമായ പരിമിതികൾ ഭയക്കാതെ തന്നെ പി.കെ ശ്രീമതിയെപ്പോലുള്ളവർക്ക് സഭയിൽ മികച്ച രീതിയിൽ സംവദിക്കാൻ സാധിക്കും.
ട്രോളന്മാർക്ക് ഇനി വിശ്രമം?
രാജ്യസഭാ എം.പി എ.എ. റഹീമിൻ്റെ ഇംഗ്ലീഷ് പ്രസംഗവും സമാനമായ രീതിയിൽ ട്രോളുകൾക്ക് വിധേയമായിരുന്നു. നിലവിൽ ലോകസഭയിലാണ് ഈ സംവിധാനം കർശനമായി നടപ്പിലാക്കുന്നത് എങ്കിലും, രാജ്യസഭയിലും സമാനമായ സൗകര്യം ഉറപ്പാക്കിയാൽ റഹീമിനെപ്പോലുള്ള യുവനേതാക്കൾക്ക് മലയാളത്തിൽ തന്നെ മികച്ച പ്രകടനം കാഴ്ചവെക്കാൻ കഴിയും.
അതുപോലെ തന്നെ ‘കെ-ഇംഗ്ലീഷ്’ പ്രസംഗങ്ങളിലൂടെ ശ്രദ്ധേയരായ ചിന്ത ജെറോം, മന്ത്രി ഡോ. ആർ. ബിന്ദു തുടങ്ങിയവർക്കും ഈ തീരുമാനം വലിയ ആശ്വാസമായേക്കും. പാണ്ഡിത്യം തെളിയിക്കാൻ അരോചകമായ രീതിയിൽ ഇംഗ്ലീഷ് ഉപയോഗിക്കുന്നതിനേക്കാൾ, മാതൃഭാഷയായ മലയാളത്തിൽ ആശയങ്ങൾ വ്യക്തമായി അവതരിപ്പിക്കാൻ ഇത് ഇവർക്ക് കരുത്തുപകരും. ലോക സഭയിലേക്ക് ധൈര്യമായി ഇവർക്കും മൽസരിക്കാം.
സ്പീക്കറുടെ നിർണ്ണായക തീരുമാനം
ലോകസഭാ സ്പീക്കറുടെ ഈ തീരുമാനം പ്രാദേശിക ഭാഷകൾക്ക് നൽകുന്ന വലിയൊരു അംഗീകാരമായാണ് വിലയിരുത്തപ്പെടുന്നത്. തർജ്ജിമ സംവിധാനങ്ങൾ കൂടുതൽ കാര്യക്ഷമമാക്കുന്നതോടെ, കേരളത്തിൽ നിന്നുള്ള എം.പിമാർക്ക് തങ്ങളുടെ മണ്ഡലത്തിലെ പ്രശ്നങ്ങൾ കൂടുതൽ വ്യക്തതയോടെയും ആത്മവിശ്വാസത്തോടെയും സഭയുടെ ശ്രദ്ധയിൽപ്പെടുത്താൻ സാധിക്കും.
