തിരുവനന്തപുരം: കേരളത്തിൽ സൈബർ രംഗത്ത് നിർണായകമായ മാറ്റങ്ങൾക്ക് തുടക്കമിട്ട് കോൺഗ്രസ്. കെപിസിസി ഡിജിറ്റൽ മീഡിയ സെല്ലിന്റെ (സോഷ്യൽ മീഡിയ സെൽ) തലവനായി എറണാകുളം എം.പി. ഹൈബി ഈഡനെ നിയമിച്ചു. നിലവിലെ തലവനായിരുന്ന വി.ടി. ബൽറാമിനെ മാറ്റിയാണ് ദേശീയ നേതൃത്വം ഈ നിർണായക ചുമതല ഹൈബി ഈഡന് കൈമാറിയത്.
സൈബർ രംഗത്ത് എതിരാളികളുടെ ‘തേരോട്ടം’ ശക്തമായ സാഹചര്യത്തിൽ, കോൺഗ്രസിന്റെ ഡിജിറ്റൽ പ്രതിരോധം ശക്തിപ്പെടുത്തുക എന്ന ലക്ഷ്യത്തോടെയാണ് ഈ മാറ്റം.
നേരത്തെ, സി.പി.എമ്മിലേക്ക് പോയ പി. സരിന്റെ അനുയായികളെ ഉൾപ്പെടുത്തി ഡിജിറ്റൽ മീഡിയ സെൽ മുന്നോട്ട് കൊണ്ടുപോകാനുള്ള നീക്കം കോൺഗ്രസ് നേതൃത്വത്തിന് തിരിച്ചടിയായിരുന്നു. ഈ പശ്ചാത്തലത്തിൽ, ദേശീയ നേതൃത്വം നേരിട്ട് ഇടപെട്ടാണ് ഹൈബി ഈഡന് ചുമതല നൽകിയിരിക്കുന്നത്. ഇതോടെ, സമൂഹമാധ്യമങ്ങളിൽ കോൺഗ്രസിന് കൂടുതൽ ശക്തവും ഏകോപിതവുമായ പ്രചാരണം പ്രതീക്ഷിക്കാം.
