തിരുവനന്തപുരം: സംസ്ഥാന ധനമന്ത്രി കെ.എൻ. ബാലഗോപാലിന് മാറ്റമോ?. ധനകാര്യ വകുപ്പുമായി ബന്ധപ്പെട്ട ഒരു സുപ്രധാന ഫയൽ ധന അഡീഷണൽ ചീഫ് സെക്രട്ടറി ജ്യോതിലാൽ ഇന്നലെ മന്ത്രി എം.ബി. രാജേഷിന് കൈമാറിയതോടെയാണ് സെക്രട്ടറിയേറ്റിലെ ഇടനാഴികളിൽ ഈ ചോദ്യം ഉയർന്നത്.
ജി.എസ്.ടി വകുപ്പിലെ ജോയിൻ്റ് കമ്മീഷണറുടെ ഗ്രേഡ് പ്രൊമോഷൻ സംബന്ധിച്ച ഫയലാണ് ഇന്നലെ രാവിലെ 10.36-ന് എം.ബി. രാജേഷിന് കൈമാറിയത്. എക്സൈസ്, തദ്ദേശ സ്വയംഭരണം എന്നീ വകുപ്പുകളുടെ ചുമതല വഹിക്കുന്ന മന്ത്രിയായ എം.ബി. രാജേഷിന് നികുതി വകുപ്പുമായി ബന്ധപ്പെട്ട ഫയൽ കൈമാറിയതിലെ അസ്വാഭാവികതയാണ് ഇപ്പോൾ ചർച്ചയാകുന്നത്.
സാധാരണഗതിയിൽ ധനമന്ത്രി കെ.എൻ. ബാലഗോപാൽ തീർപ്പാക്കേണ്ട ഫയൽ, എക്സൈസ്-തദ്ദേശ വകുപ്പ് മന്ത്രിക്ക് കൈമാറിയത് എന്തുകൊണ്ടാണ് എന്ന ചോദ്യമാണ് ഉദ്യോഗസ്ഥ തലത്തിൽ ഉയരുന്നത്. ജ്യോതിലാലിന് പറ്റിയ അബദ്ധം ആണെന്നാണ് ലഭിക്കുന്ന സൂചന. എന്തായാലും ഇന്നലെ രാവിലെ എത്തിയ ഫയൽ ഇതുവരെ തുറന്ന് നോക്കാൻ പോലും എം.ബി രാജേഷ് തയ്യാറായിട്ടില്ല. ഫയലുകൾ ഉറങ്ങുന്ന സെക്രട്ടറിയേറ്റിൽ ജ്യോതിലാൽ കാണിച്ച അബദ്ധം മൂലം ഇതും ഉറങ്ങി പോകുമോ എന്ന ആശങ്കയാണ് ഉദ്യോഗസ്ഥർക്കിടയിൽ നിന്ന് ഉയരുന്നത്.
