തിരുവനന്തപുരം : മുൻ ഡി.ജി.പിയും തിരുവനന്തപുരം ശാസ്തമംഗലം വാർഡ് കൗൺസിലറുമായ ആർ. ശ്രീലേഖയുടെ സമീപകാല പ്രസ്താവനകളും കോർപ്പറേഷനിലെ രാജി നീക്കങ്ങളും രാഷ്ട്രീയ സർക്കിളുകളിൽ വലിയ വിവാദങ്ങൾക്കാണ് വഴിവെച്ചിരിക്കുന്നത്. ഉന്നത ഉദ്യോഗസ്ഥ പദവികളിൽ നിന്നു വിരമിച്ച ശേഷവും പഴയ ‘പൊലീസ് ഗമ’യും പ്രത്യേക ആനുകൂല്യങ്ങളും പ്രതീക്ഷിക്കുന്ന നിലപാടുകൾക്കെതിരെ കടുത്ത വിമർശനമാണ് ഉയരുന്നത്. ഈ പശ്ചാത്തലത്തിൽ, പ്രശസ്ത ഐ.എ.എസ് ഉദ്യോഗസ്ഥനായിരുന്ന അന്തരിച്ച ഡോ. ഡി. ബാബു പോൾ മുൻപ് നടത്തിയ തികച്ചും പ്രസക്തമായ ഒരു പരാമർശം സമൂഹമാധ്യമങ്ങളിലും ഭരണവർഗത്തിലും വീണ്ടും സജീവമായി ചർച്ച ചെയ്യപ്പെടുന്നു.
”വിരമിച്ചു കഴിഞ്ഞാൽ ചീഫ് സെക്രട്ടറിയും പ്യൂണും ഒന്ന് തന്നെയാണ്. പദവിയുടെ പത്രാസ് പദവിയിൽ ഇരിക്കുമ്പോൾ മാത്രം” എന്ന ഡോ. ബാബു പോളിന്റെ ഓർമ്മപ്പെടുത്തൽ, അധികാര കസേര വിട്ടിട്ടും പത്രാസ് നിലനിർത്താൻ ശ്രമിക്കുന്ന മുൻ ഉദ്യോഗസ്ഥർക്കുള്ള മറുപടിയായാണ് പൊതുസമൂഹം കാണുന്നത്.
തന്റെ രാജി വിശദീകരണത്തിനിടയിൽ ബി.ജെ.പി നേതൃത്വത്തിനെതിരെ ഒളിയമ്പെയ്തുകൊണ്ട് ശ്രീലേഖ നടത്തിയ പരാമർശങ്ങൾ ഈ പദവി മോഹത്തെ തെളിയിക്കുന്നതാണ്. “ഡി.ജി.പിയോട് പൊലീസ് കോൺസ്റ്റബിളിന്റെ ജോലി ചെയ്യാൻ പറഞ്ഞാൽ ബുദ്ധിമുട്ടും. ആർമി ജനറലിനോട് പട്ടാളക്കാരനായി പോയി അതിർത്തി കാക്കൂവെന്ന് പറഞ്ഞാൽ ആ പണി ചെയ്യാൻ പ്രയാസമായിരിക്കും. ആ പ്രയാസങ്ങളെല്ലാം സഹിച്ചാണ് മത്സരിച്ചതും ജോലി ചെയ്തുകൊണ്ടിരിക്കുന്നതും” എന്നായിരുന്നു ശ്രീലേഖയുടെ വാക്കുകൾ. താൻ മുൻപ് ഉത്തരവിട്ടാൽ താഴെയുള്ള ഉദ്യോഗസ്ഥർ കേട്ടിരുന്ന ശൈലി ജനപ്രതിനിധിയായ ശേഷവും പ്രതീക്ഷിച്ചതിലുണ്ടായ പാളിച്ചകളും മേയർ പദവി ലഭിക്കാത്തതിലെ അമർഷവുമാണ് ഇത്തരം പ്രസ്താവനകൾക്ക് പിന്നിലെന്നാണ് വിലയിരുത്തൽ.
ജനപ്രതിനിധിയാവുക എന്നത് ജനങ്ങളെ താഴെത്തട്ടിലിറങ്ങി സേവിക്കാനാണെന്ന യാഥാർത്ഥ്യം ഉൾക്കൊള്ളാതെ, വിരമിച്ച ശേഷവും മേലാളത്ത മനോഭാവം തുടരുന്ന ‘ശ്രീലേഖമാർക്ക്’ ഡോ. ബാബു പോളിന്റെ വാക്കുകൾ കൃത്യമായ ഒരു മുന്നറിയിപ്പാണ്.
