തിരുവനന്തപുരം: സംസ്ഥാനത്തെ പാവപ്പെട്ട രോഗികൾക്ക് ആശ്വാസമേകുന്ന കാരുണ്യ ആരോഗ്യ പദ്ധതികൾക്കായി 600 കോടി രൂപയുടെ അധിക ഫണ്ട് അനുവദിച്ച് മുഖ്യമന്ത്രി വി.ഡി. സതീശൻ. സാമ്പത്തിക പ്രതിസന്ധിയും കുടിശികയും കാരണം താളംതെറ്റിയ ആരോഗ്യ സുരക്ഷാ പദ്ധതികളെ വീണ്ടും സജീവമാക്കാനും ക്ലെയിമുകൾ തടസ്സമില്ലാതെ സെറ്റിൽ ചെയ്യാനുമാണ് തുക അനുവദിച്ചത്.
അനുവദിച്ച 600 കോടി രൂപയുടെ അധിക ഫണ്ട് താഴെ പറയുന്ന രീതിയിലാണ് വിഭജിച്ചിരിക്കുന്നത്:
കാരുണ്യ ആരോഗ്യ സുരക്ഷാ പദ്ധതി (KASP): ക്ലെയിമുകൾ തീർപ്പാക്കുന്നതിനായി 300.71 കോടി രൂപ അധിക അനുമതിയായി നൽകി.
കാരുണ്യ ബെനവലന്റ് ഫണ്ട് (KBF): പദ്ധതിക്കായി 293.62 കോടി രൂപ അനുവദിച്ചു.
നടപ്പു സാമ്പത്തിക വർഷത്തിലെ ധനസഹായ തുകയുടെ വിവരണം
കാരുണ്യ ആരോഗ്യ സുരക്ഷാ പദ്ധതി (KASP): ബജറ്റ് വിഹിതം (592 കോടി രൂപ) + അധിക അനുമതി (307.10 കോടി രൂപ) = 899.10 കോടി രൂപ
കാരുണ്യ ബെനവലന്റ് ഫണ്ട്: 293.62 കോടി രൂപ
മുൻ എൽ.ഡി.എഫ് സർക്കാരിന്റെ കാലത്ത് കൃത്യമായി ഫണ്ട് വിതരണം ചെയ്യാതിരുന്നതിനെ തുടർന്ന് സംസ്ഥാനത്തെ കാരുണ്യ ചികിത്സാ പദ്ധതികളുടെ പ്രവർത്തനം പൂർണ്ണമായും താളം തെറ്റിയ നിലയിലായിരുന്നു. 2,111.89 കോടി രൂപയുടെ കുടിശികയാണ് മുൻ സർക്കാർ വരുത്തിവെച്ചിരുന്നത്.
ഇതിനെ തുടർന്ന് സ്വകാര്യ-സർക്കാർ ആശുപത്രികളിൽ പദ്ധതി വഴിയുള്ള ചികിത്സാ ആനുകൂല്യങ്ങൾ രോഗികൾക്ക് ലഭിക്കുന്നതിൽ വൻ പ്രതിസന്ധി രൂപപ്പെട്ടിരുന്നു. എന്നാൽ പുതിയ തുക അനുവദിച്ചതോടെ ആശുപത്രി കുടിശികകൾ തീർപ്പാക്കി രോഗികൾക്ക് കൃത്യമായ ചികിത്സ ഉറപ്പാക്കാൻ സാധിക്കുമെന്നാണ് വിലയിരുത്തൽ.
