തിരുവനന്തപുരം: കേരള രാഷ്ട്രീയത്തെ പിടിച്ചുലയ്ക്കുന്ന പുതിയ വെളിപ്പെടുത്തലുമായി പി.വി. അൻവർ. മുഖ്യമന്ത്രി പിണറായി വിജയനും കുടുംബവും പത്ത് വർഷത്തേക്കുള്ള അമേരിക്കൻ വിസ സ്വന്തമാക്കിയെന്നും അധികാരം ഒഴിയുന്നതോടെ നാടുവിടാൻ പദ്ധതിയിടുന്നുവെന്നുമാണ് അൻവറിന്റെ ആരോപണം. വി.ഡി. സതീശൻ നയിക്കുന്ന ‘പുതുയുഗ യാത്ര’യുടെ വേദിയിൽ വെച്ചായിരുന്നു അൻവർ ഈ ആറ്റം ബോംബ് പൊട്ടിച്ചത്.
പത്ത് വർഷത്തെ വിസ, തയാറായി നിൽക്കുന്ന ചാർട്ടേർഡ് വിമാനം!
ക്ലിഫ് ഹൗസിലെ രഹസ്യങ്ങൾ ഓരോന്നായി പുറത്തുവിട്ടു കൊണ്ടിരിക്കുന്ന അൻവർ, ഇത്തവണ മുഖ്യമന്ത്രിയുടെ വിദേശ യാത്രയെക്കുറിച്ചുള്ള കൃത്യമായ വിവരങ്ങളാണ് പങ്കുവെച്ചത്.
”കേരളത്തിന്റെ മുഖ്യമന്ത്രിയും കുടുംബവും പത്ത് വർഷത്തേക്കുള്ള അമേരിക്കൻ വിസ അടിച്ചു വെച്ച് കാത്തിരിക്കുകയാണ്. ഒരു ചാർട്ടേർഡ് വിമാനം തിരുവനന്തപുരത്ത് വന്ന് അവരെ കൊണ്ടുപോകാൻ വേണ്ട സമയത്തിന്റെ ഗ്യാപ്പേ ഇനി ബാക്കിയുള്ളൂ,” അൻവർ പ്രസംഗത്തിൽ പറഞ്ഞു.
ഭരണമാറ്റം ഭയന്നുള്ള നീക്കമെന്ന് ആരോപണം
സംസ്ഥാനത്ത് ഉടൻ തന്നെ ഭരണമാറ്റം ഉണ്ടാകുമെന്ന് ഉറപ്പായതോടെയാണ് മുഖ്യമന്ത്രി ഈ നീക്കം നടത്തുന്നതെന്നാണ് അൻവർ അവകാശപ്പെടുന്നത്. രണ്ട് മാസം കഴിഞ്ഞാൽ പിണറായി വിജയനെയും കുടുംബത്തെയും കാണണമെങ്കിൽ കേരളത്തിലല്ല, മറിച്ച് അമേരിക്കയിൽ പോകേണ്ടി വരുമെന്നും അദ്ദേഹം പരിഹസിച്ചു.
നേരത്തെ ചികിത്സയ്ക്കായി മുഖ്യമന്ത്രി അമേരിക്ക സന്ദർശിച്ചിരുന്നെങ്കിലും, സ്ഥിരമായി അവിടെ താമസിക്കാൻ പോകുന്നുവെന്ന ആരോപണം രാഷ്ട്രീയ കേന്ദ്രങ്ങളിൽ വലിയ ചർച്ചയായിട്ടുണ്ട്. സ്വർണ്ണക്കടത്ത് കേസും മറ്റ് അഴിമതി ആരോപണങ്ങളും മുറുകുന്ന സാഹചര്യത്തിൽ, സുരക്ഷിതമായ ഒരു താവളം കണ്ടെത്താനാണ് ഈ നീക്കമെന്നാണ് പ്രതിപക്ഷ അനുകൂലികളുടെ വാദം.
