തിരുവനന്തപുരം: പിണറായി സർക്കാരിന്റെ വഴിവിട്ട നിയമന നീക്കങ്ങൾക്കെതിരെ വീണ്ടും നിയമപോരാട്ടം. തദ്ദേശ സ്വയംഭരണ സ്ഥാപനങ്ങളിലെ ഓംബുഡ്സ്മാനായി മുൻ ഉപലോകായുക്ത ജസ്റ്റിസ് ബാബു മാത്യു പി. ജോസഫിനെ നിയമിക്കാനുള്ള മന്ത്രിസഭാ തീരുമാനത്തിനെതിരെ ആർ.എസ്. ശശികുമാർ ഗവർണറെ സമീപിക്കുന്നു. മുഖ്യമന്ത്രി പിണറായി വിജയനെതിരായ ദുരിതാശ്വാസ നിധി വകമാറ്റൽ കേസിൽ ക്ലീൻ ചിറ്റ് നൽകിയതിനുള്ള പ്രത്യുപകാരമാണ് ഈ നിയമനമെന്ന് അദ്ദേഹം ആരോപിച്ചു.
വിവാദ നിയമനം; പിന്നിൽ ‘ഉപകാരസ്മരണ’?
മുഖ്യമന്ത്രിയും മറ്റ് മന്ത്രിമാരും പ്രതികളായ സി.എം.ഡി.ആർ.എഫ് കേസിൽ നിർണ്ണായക വിധി പുറപ്പെടുവിച്ച ജസ്റ്റിസ് ബാബു മാത്യു പി. ജോസഫിനെ പുതിയ പദവിയിലേക്ക് പരിഗണിക്കുന്നത് ജനാധിപത്യ മര്യാദകളുടെ ലംഘനമാണെന്ന് ശശികുമാർ ചൂണ്ടിക്കാട്ടി. മുൻപ് ലോകായുക്ത പദവി വഹിച്ചിരുന്ന ഒരാൾക്ക് ഇത്തരം തസ്തികകൾ നൽകുന്നത് ധാർമ്മികമായി തെറ്റാണെന്നും അദ്ദേഹം വാദിക്കുന്നു.
ഗവർണർക്ക് പരാതി നൽകും
നേരത്തെ ഇദ്ദേഹത്തെ ഫീ റെഗുലേറ്ററി കമ്മീഷൻ ചെയർമാനായി നിയമിക്കാൻ നീക്കം നടന്നിരുന്നെങ്കിലും കടുത്ത പ്രതിഷേധത്തെത്തുടർന്ന് സർക്കാർ പിന്മാറുകയായിരുന്നു. ഇപ്പോൾ ഓംബുഡ്സ്മാൻ നിയമനത്തിലൂടെ ആ കടപ്പാട് തീർക്കാനാണ് സർക്കാർ ശ്രമിക്കുന്നതെന്ന് സേവ് യൂണിവേഴ്സിറ്റി ക്യാമ്പയിൻ കമ്മിറ്റി പ്രസിഡന്റ് കൂടിയായ ആർ.എസ്. ശശികുമാർ പറഞ്ഞു. ഈ നിയമന നീക്കം തടയണമെന്നാവശ്യപ്പെട്ട് ഉടൻ തന്നെ ഗവർണർക്ക് പരാതി നൽകുമെന്ന് അദ്ദേഹം വ്യക്തമാക്കി.
