തിരുവനന്തപുരം: വിഴിഞ്ഞം അന്താരാഷ്ട്ര ട്രാൻസ്ഷിപ്പ്മെന്റ് തുറമുഖ പദ്ധതിക്കൊപ്പം തീരദേശവാസികളും മത്സ്യത്തൊഴിലാളികളും ദീർഘകാലമായി ആവശ്യപ്പെട്ടിരുന്ന പുതിയ ഫിഷിംഗ് ഹാർബർ നിർമ്മാണത്തിന് നിർണ്ണായക വഴിത്തിരിവ്. പദ്ധതിയുടെ ഒന്നാം പാക്കേജ് (Package-I) കൺസഷൻ കരാറിലെ വ്യവസ്ഥകൾ പ്രകാരം അദാനി വിഴിഞ്ഞം പോർട്ട് പ്രൈവറ്റ് ലിമിറ്റഡ് (AVPPL) വഴി പദ്ധതി നടപ്പാക്കുന്നതിന് സംസ്ഥാന സർക്കാർ തത്വത്തിൽ ഭരണാനുമതി നൽകി.
ഫിഷറീസ്-തുറമുഖ വകുപ്പ് പുറപ്പെടുവിച്ച സ.ഉ.(സാധാ) നം. 585/2026/F&P പ്രകാരമാണ് നടപടി. നിർമ്മാണ പ്രവർത്തനങ്ങൾ വേഗത്തിൽ ആരംഭിച്ച് നിശ്ചിത സമയപരിധിക്കുള്ളിൽ പൂർത്തിയാക്കുക എന്ന ലക്ഷ്യത്തോടെയാണ് സർക്കാർ നടപടികൾ മുന്നോട്ടുകൊണ്ടുപോകുന്നത്. വിഴിഞ്ഞം ഇന്റർനാഷണൽ സീപോർട്ട് ലിമിറ്റഡ് (VISL) മാനേജിംഗ് ഡയറക്ടറുടെ ശുപാർശയും പരിഗണിച്ചാണ് ഉത്തരവ്.
235 മീറ്റർ പുലിമുട്ടും 500 മീറ്റർ ബെർത്തും
പുതിയ ഫിഷിംഗ് ഹാർബറിന്റെ ഒന്നാം ഘട്ടത്തിൽ പ്രധാനമായും 235 മീറ്റർ നീളമുള്ള പുലിമുട്ടും 500 മീറ്റർ നീളത്തിലുള്ള L-ആകൃതിയിലുള്ള ഫിഷറി ബെർത്തും ഉൾപ്പെടും.
കടൽക്ഷോഭവും ശക്തമായ തിരമാലകളും നിയന്ത്രിച്ച് മത്സ്യബന്ധന ബോട്ടുകൾക്ക് സുരക്ഷിതമായി ഹാർബറിൽ പ്രവേശിക്കാനും നങ്കൂരമിടാനും സഹായിക്കുന്ന തരത്തിലാണ് പുലിമുട്ട് രൂപകൽപ്പന ചെയ്യുന്നത്.
പരമ്പരാഗത മത്സ്യബന്ധന വള്ളങ്ങൾക്കും യന്ത്രവത്കൃത ബോട്ടുകൾക്കും ഒരേസമയം സൗകര്യപ്രദമായി അടുക്കാനും മത്സ്യം കയറ്റിറക്കാനും കഴിയുന്ന തരത്തിലായിരിക്കും 500 മീറ്റർ L-ആകൃതിയിലുള്ള ബെർത്ത്.
ഇതിന് പുറമെ ഹാർബറിനാവശ്യമായ ഡ്രഡ്ജിംഗ്, ലൈറ്റിംഗ്, റോഡ് കണക്റ്റിവിറ്റി തുടങ്ങിയ അനുബന്ധ അടിസ്ഥാന സൗകര്യങ്ങളും പദ്ധതിയുടെ ഭാഗമായി ഒരുക്കും.
CWPRS പഠനത്തിന് പിന്നാലെ പുതിയ രൂപരേഖ
വിഴിഞ്ഞം അന്താരാഷ്ട്ര തുറമുഖത്തിന്റെ ഒന്നാം ഘട്ട പുലിമുട്ട് നിർമ്മാണം പൂർത്തിയായതിനെ തുടർന്ന് നിലവിലെ ഫിഷിംഗ് ഹാർബറിന്റെ പ്രവേശന ഭാഗത്ത് തിരയടി വർധിക്കുന്നതുമായി ബന്ധപ്പെട്ട ആശങ്കകൾ ഉയർന്നിരുന്നു. മത്സ്യത്തൊഴിലാളികളും ഹാർബർ എൻജിനീയറിംഗ് വിഭാഗവും ഇക്കാര്യം ചൂണ്ടിക്കാട്ടി.
ഇതിന്റെ അടിസ്ഥാനത്തിൽ പുണെയിലെ Central Water and Power Research Station (CWPRS) വിശദമായ ഫിസിക്കൽ വേവ് മോഡൽ പഠനം നടത്തി റിപ്പോർട്ട് സമർപ്പിച്ചു.
കടലിലെ തിരയിളക്കം കുറച്ച് ഹാർബറിനുള്ളിൽ കൂടുതൽ ശാന്തമായ ജലാവസ്ഥ ഉറപ്പാക്കാനും മത്സ്യബന്ധന ബോട്ടുകൾക്ക് സുരക്ഷിതമായി അടുക്കാനും പുതിയ ഫിഷിംഗ് ഹാർബർ നിർമ്മിക്കണമെന്നായിരുന്നു വിദഗ്ധ പഠനത്തിന്റെ അടിസ്ഥാനത്തിലുള്ള ശുപാർശ.
പദ്ധതിയുടെ സ്ഥാനം, അലൈൻമെന്റ്, പുലിമുട്ടിന്റെ ഘടന, ബെർത്ത് ക്രമീകരണം എന്നിവയിൽ മാറ്റങ്ങൾ ആവശ്യമായ സാഹചര്യത്തിൽ കൺസഷൻ കരാറിലെ വ്യവസ്ഥകൾ അനുസരിച്ച് അദാനി ഗ്രൂപ്പിന് സർക്കാർ നേരത്തെ ‘Change of Scope’ നോട്ടീസ് നൽകിയിരുന്നു.
കൺസഷൻ കരാറിലെ Article 16 പ്രകാരം Funded Works
പുതിയ ഫിഷിംഗ് ഹാർബർ നിർമ്മാണം കൺസഷൻ കരാറിലെ Article 16 പ്രകാരമുള്ള Funded Works വിഭാഗത്തിൽ ഉൾപ്പെടുത്തിയാണ് നടപ്പാക്കുന്നത്.
അതുവഴി നിർമ്മാണ ചുമതല അദാനി പോർട്സിന്റെ കീഴിലുള്ള AVPPL വഴി നിർവഹിക്കുന്നതിനുള്ള നടപടികൾക്ക് സർക്കാർ തത്വത്തിൽ അംഗീകാരം നൽകിയിരിക്കുകയാണ്.
മത്സ്യത്തൊഴിലാളികൾക്കുള്ള ഉറപ്പിന്റെ തുടർച്ച
വിഴിഞ്ഞം തുറമുഖ പദ്ധതിയുടെ ഒന്നാം ഘട്ടവുമായി ബന്ധപ്പെട്ട് തീരദേശവാസികൾക്കായി പുതിയ ഫിഷ് ലാൻഡിംഗ് സെന്ററും ഫിഷിംഗ് ഹാർബറും ഒരുക്കണമെന്ന വ്യവസ്ഥയും മത്സ്യത്തൊഴിലാളികളുടെ ആവശ്യങ്ങളും പദ്ധതിയുടെ പശ്ചാത്തലത്തിലുണ്ട്.
പുതിയ ഹാർബറിന് തത്വത്തിലുള്ള ഭരണാനുമതി ലഭിച്ചതോടെ സാങ്കേതിക അനുമതി ഉൾപ്പെടെയുള്ള തുടർ നടപടികളിലേക്ക് കടക്കാനുള്ള വഴിയാണ് തുറന്നിരിക്കുന്നത്. തുടർന്ന് ടെൻഡർ ഉൾപ്പെടെയുള്ള നടപടിക്രമങ്ങൾ പൂർത്തിയാക്കി നിർമ്മാണ പ്രവർത്തനങ്ങളിലേക്ക് നീങ്ങാനാകും.
വിഴിഞ്ഞം, അടിമലത്തുറ, പൂവാർ തുടങ്ങിയ തീരദേശ മേഖലകളിലെ മത്സ്യത്തൊഴിലാളികൾക്ക് പുതിയ ഹാർബർ കൂടുതൽ സുരക്ഷിതമായ മത്സ്യബന്ധന സൗകര്യങ്ങളും മെച്ചപ്പെട്ട അടിസ്ഥാന സൗകര്യങ്ങളും നൽകുമെന്നാണ് പ്രതീക്ഷ.
