കാസർകോട്: കേരളം മാറ്റം ആഗ്രഹിക്കുന്നു എന്നതിൻ്റെ വ്യക്തമായ സൂചനകൾ നൽകി എൽ.ഡി.എഫിൻ്റെ വടക്കൻ മേഖല വികസന മുന്നേറ്റ ജാഥ പരാജയത്തിലേക്ക്. സി.പി.എം സംസ്ഥാന സെക്രട്ടറി എം.വി ഗോവിന്ദൻ നയിക്കുന്ന ജാഥയിൽ മുഖ്യമന്ത്രി പിണറായി വിജയൻ ഉദ്ഘാടന പ്രസംഗം നടത്തുമ്പോൾ തന്നെ ജനങ്ങൾ കൂട്ടത്തോടെ എഴുന്നേറ്റു പോകുന്നത് ഭരണവിരുദ്ധ വികാരത്തിൻ്റെ ആഴം വ്യക്തമാക്കുന്നു. ജാഥാ ക്യാപ്റ്റൻ എം.വി ഗോവിന്ദൻ സംസാരിക്കുമ്പോൾ സദസ്സിലെ ഭൂരിഭാഗം കസേരകളും ഒഴിഞ്ഞു കിടക്കുകയായിരുന്നു.
ഭരണത്തോടുള്ള മടുപ്പ്; ജനം മുഖം തിരിക്കുന്നു
തുടർച്ചയായ പത്തു വർഷത്തെ പിണറായി ഭരണത്തിൽ ജനങ്ങൾ അങ്ങേയറ്റം മടുത്തിരിക്കുന്നു എന്നാണ് ജാഥയിലെ തണുപ്പൻ പ്രതികരണം സൂചിപ്പിക്കുന്നത്. അഴിമതിയും ധൂർത്തും മുഖമുദ്രയാക്കിയ സർക്കാരിനോടുള്ള പ്രതിഷേധം സി.പി.എമ്മിൻ്റെ ഉറച്ച കോട്ടകളിൽ പോലും ദൃശ്യമാണ്. മുഖ്യമന്ത്രി സംസാരിക്കവേ ജനം എഴുന്നേറ്റു പോകുന്നത് പാർട്ടിയെയും അണികളെയും ഒരുപോലെ പ്രതിരോധത്തിലാക്കിയിരിക്കുകയാണ്.
ശബരിമലയിലെ സ്വർണ്ണക്കൊള്ളയും സി.പി.എം ബന്ധവും
കേരളത്തെ നടുക്കിയ ശബരിമല സ്വർണ്ണ മോഷണ കേസ് സർക്കാരിൻ്റെ പ്രതിച്ഛായ പാടെ തകർത്തിരിക്കുകയാണ്. പുണ്യമായ ശബരിമലയിൽ പോലും മോഷണം നടത്തിയ സി.പി.എം നേതാക്കൾ മാസങ്ങളായി ജയിലിൽ കഴിയുമ്പോഴും അവരെ പുറത്താക്കാൻ പാർട്ടി തയ്യാറായിട്ടില്ല. ഈ സംരക്ഷണ നിലപാടിൽ വിശ്വാസികൾക്കിടയിൽ ശക്തമായ അമർഷമുണ്ട്.
വെന്റിലേറ്ററിൽ ആരോഗ്യ കേരളം; വിദേശത്തേക്ക് ചേക്കേറി യുവത്വം
ആരോഗ്യ മേഖലയിൽ ‘നമ്പർ വൺ’ എന്ന് അവകാശപ്പെടുമ്പോഴും കേരളത്തിലെ സർക്കാർ ആശുപത്രികൾ വെന്റിലേറ്ററിലാണെന്ന ആക്ഷേപം ശക്തമാണ്. ചികിത്സാ പിഴവുകൾ നിത്യസംഭവമായി മാറുന്നു. ഇതിനിടയിൽ ഉന്നത വിദ്യാഭ്യാസ രംഗത്തെ തകർച്ച മൂലം കേരളത്തിലെ വിദ്യാർത്ഥികൾ വൻതോതിൽ വിദേശത്തേക്ക് പലായനം ചെയ്യുകയാണ്. കേരളം വയോജനങ്ങളുടെ നാടായി മാറിക്കൊണ്ടിരിക്കുമ്പോഴും ഭരണകൂടത്തിന് കൃത്യമായ കാഴ്ചപ്പാടില്ലാത്തത് വലിയ വിപത്തായി മാറുന്നു.
പ്രതീക്ഷയായി സതീശൻ്റെ ‘പുതുയുഗ യാത്ര’
ഇടതുപക്ഷ ഭരണത്തിൻ്റെ അന്ധകാരത്തിൽ നിന്നും കേരളത്തെ മോചിപ്പിക്കുക എന്ന ലക്ഷ്യത്തോടെ പ്രതിപക്ഷ നേതാവ് വി.ഡി. സതീശൻ നയിക്കുന്ന ‘പുതുയുഗ യാത്ര’ ഫെബ്രുവരി 6-ന് കാസർകോട് കുമ്പളത്ത് നിന്ന് ആരംഭിക്കും. പേരിൽ തന്നെ പുതുമ കൊണ്ടുവന്ന യാത്ര, വരും തലമുറയ്ക്ക് ഐശ്വര്യപൂർണ്ണമായ ഒരു കേരളം കെട്ടിപ്പടുക്കുക എന്ന ലക്ഷ്യത്തോടെയാണ് വിഭാവനം ചെയ്തിരിക്കുന്നത്. ലോക്സഭ, തദ്ദേശ സ്വയംഭരണ തെരഞ്ഞെടുപ്പുകളിൽ കണ്ട ജനരോഷം നിയമസഭയിലും ആവർത്തിക്കുമെന്ന ഉറച്ച വിശ്വാസത്തിലാണ് യു.ഡി.എഫ് ക്യാമ്പ്.
കേരളത്തെ അഴിമതിയിൽ നിന്നും ലഹരി മാഫിയകളിൽ നിന്നും മോചിപ്പിക്കാനുള്ള ജനകീയ മുന്നേറ്റമായി സതീശൻ്റെ യാത്ര മാറുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
