തിരുവനന്തപുരം: ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട് നിലവിലെ തിരുവിതാംകൂർ ദേവസ്വം ബോർഡ് ഗുരുതരമായ കുറ്റകൃത്യം നടത്തിയെന്ന് ഹൈക്കോടതി കണ്ടെത്തിയ സാഹചര്യത്തിൽ, ബോർഡ് പ്രസിഡന്റിനെയും അംഗങ്ങളെയും പ്രതിപ്പട്ടികയിൽ ഉൾപ്പെടുത്തണമെന്ന് പ്രതിപക്ഷ നേതാവ് വി.ഡി. സതീശൻ ആവശ്യപ്പെട്ടു. പ്രത്യേക അന്വേഷണ സംഘം (എസ്.ഐ.ടി) ഇവരെ ഉടൻ ചോദ്യം ചെയ്യണം.
”ചവിട്ടി പുറത്താക്കേണ്ട കാട്ടുകള്ളന്മാര്ക്കാണ് കാലാവധി നീട്ടി നല്കാന് സര്ക്കാര് ശ്രമിക്കുന്നത്. സര്ക്കാരിന്റെയും സി.പി.എമ്മിന്റെയും അറിവോടെയാണ് ശബരിമലയിലെ എല്ലാ തട്ടിപ്പുകളും നടന്നത് എന്നതുകൊണ്ടാണ് അമ്പലകള്ളന്മാര്ക്ക് കുടപിടിക്കുന്നത്,” സതീശൻ ആരോപിച്ചു.
📝 ഗുരുതര നിയമലംഘനങ്ങൾ
- ഉണ്ണികൃഷ്ണൻ പോറ്റിയുടെ തട്ടിപ്പ് അറിഞ്ഞിട്ടും കോടതി വിധി ലംഘിച്ചാണ് സ്വർണ്ണം പൂശാനുള്ള ശിൽപ്പങ്ങൾ വീണ്ടും അയാളെ ഏൽപ്പിച്ചത്.
- നിലവിലെ ദേവസ്വം പ്രസിഡന്റിന്റെയും ബോർഡിന്റെയും ഭാഗത്തുനിന്ന് നിയമ വിരുദ്ധമായ ഇടപെടലുണ്ടായി എന്ന് വ്യക്തം. കോടതിയെ കബളിപ്പിക്കാൻ ബോർഡ് ശ്രമിച്ചെന്ന സംശയവും ഹൈക്കോടതി വിധിയിൽ പ്രകടിപ്പിക്കുന്നുണ്ട്.
- ശബരിമലയിലെ അമൂല്യ വസ്തുക്കൾ അന്താരാഷ്ട്ര മാർക്കറ്റിൽ കോടികൾക്ക് വിറ്റോയെന്ന ഗുരുതര സംശയവും കോടതി ഉന്നയിക്കുന്നു.
🔍 എല്ലാ വസ്തുക്കളും പരിശോധിച്ച് ഉറപ്പുവരുത്തണം
ഈ സാഹചര്യത്തിൽ ശബരിമലയിലെ സ്വർണ്ണം ഉൾപ്പെടെയുള്ള എല്ലാ വസ്തുക്കളും കോടതി നിരീക്ഷണത്തിൽ പരിശോധിച്ച് മൂല്യനിർണ്ണയം നടത്തണം. എല്ലാ വസ്തുക്കളും ‘ഒർജിനൽ’ ആണോയെന്ന് ഉറപ്പുവരുത്തണമെന്നും അദ്ദേഹം ആവശ്യപ്പെട്ടു.
