തിരുവനന്തപുരം: അധികാരത്തിലേറി അഞ്ചാം മാസം തന്നെ സർക്കാർ ജീവനക്കാർക്ക് ക്ഷാമബത്ത (DA) അനുവദിച്ച വി.ഡി. സതീശൻ സർക്കാരിനെതിരെ നാളെ സെക്രട്ടറിയേറ്റ് വളയൽ സമരവുമായി പ്രതിപക്ഷ സർവീസ് സംഘടനയായ കേരള എൻജിഒ യൂണിയൻ. 2021-26 കാലയളവിലെ പിണറായി വിജയൻ സർക്കാർ ക്ഷാമബത്ത അനുവദിക്കാൻ 34 മാസമെടുത്തപ്പോൾ മിണ്ടാതിരുന്ന സംഘടനയാണ് ഇപ്പോൾ അഞ്ചാം മാസം തന്നെ ആനുകൂല്യം നൽകിയ സർക്കാരിനെതിരെ പ്രക്ഷോഭവുമായി രംഗത്തെത്തുന്നത്.
കഴിഞ്ഞ പത്ത് വർഷത്തെ ഇടതുഭരണകാലത്ത് സർക്കാർ ജീവനക്കാരുടെ ആനുകൂല്യങ്ങളും അവകാശങ്ങളും തടഞ്ഞുവെക്കപ്പെട്ടപ്പോഴെല്ലാം യാതൊരു പ്രതിഷേധവുമുയർത്താതെ ഭരണകൂടത്തിന് വേണ്ടി സ്തുതിപാടുകയായിരുന്നു എൻജിഒ യൂണിയൻ. 34 മാസത്തോളം ക്ഷാമബത്ത കുടിശ്ശികയാക്കി ജീവനക്കാരെ ദുരിതത്തിലാക്കിയ മുൻ സർക്കാരിനെതിരെ ചെറുവിരൽ പോലും അനക്കാതിരുന്നവർ, പുതിയ യുഡിഎഫ് സർക്കാർ അധികാരത്തിൽ വന്ന് അഞ്ചാം മാസം തന്നെ ക്ഷാമബത്ത അനുവദിച്ചിട്ടും സമരത്തിനിറങ്ങുന്നത് രാഷ്ട്രീയ പ്രേരിതമാണെന്ന ആക്ഷേപം ശക്തമാണ്.
ജീവനക്കാരുടെ യഥാർത്ഥ താൽപ്പര്യങ്ങളേക്കാൾ ഉപരിയായി രാഷ്ട്രീയ ലക്ഷ്യങ്ങൾ മുൻനിർത്തിയാണ് നാളത്തെ സെക്രട്ടറിയേറ്റ് വളയൽ സമരം ആസൂത്രണം ചെയ്തിരിക്കുന്നതെന്ന് വ്യക്തം.