തിരുവനന്തപുരം: മുതിര്‍ന്ന പൗരന്മാരുടെ സംരക്ഷണം കേവലം ഒരു സര്‍ക്കാര്‍ ബാധ്യതയല്ലെന്നും, അത് സമൂഹത്തിന്റെ ആകെ സംസ്കാരമായി വളര്‍ത്തിയെടുക്കണമെന്നും മുഖ്യമന്ത്രി വി. ഡി. സതീശൻ. അച്ഛനമ്മമാരെ ഉപേക്ഷിക്കുകയോ വീട്ടിൽ നിന്ന് ഇറക്കിവിടുകയോ ചെയ്യുന്നവർക്കെതിരെ പ്രോസിക്യൂഷൻ ഉൾപ്പെടെയുള്ള കർശന നിയമനടപടികൾ സ്വീകരിക്കും. മുഖ്യമന്ത്രിയുടെ കോൺഫറൻസ് ഹാളിൽ നടന്ന ചടങ്ങിൽ സംസാരിക്കുകയായിരുന്നു അദ്ദേഹം.
ചടങ്ങിൽ വച്ച് ഡിപ്പാര്‍ട്ട്മെന്റ് ഓഫ് സീനിയര്‍ സിറ്റിസണുമായി (മുതിർന്ന പൗരന്മാരുടെ ക്ഷേമ വകുപ്പ്) സംസ്ഥാനത്തിനകത്തും പുറത്തുമുള്ള 12 പ്രമുഖ സ്ഥാപനങ്ങൾ അക്കാദമിക, ഗവേഷണ, സാങ്കേതിക സഹകരണങ്ങൾക്കായി ധാരണാപത്രം (MoU) ഒപ്പുവെച്ചു.
പ്രധാന പ്രഖ്യാപനങ്ങളും കർമ്മപദ്ധതികളും:
- തദ്ദേശീയ ഡാറ്റാ ശേഖരണം: പഞ്ചായത്ത് തലത്തിൽ പരിചരണം ആവശ്യമായ മുതിർന്ന പൗരന്മാർ, അവരുടെ മാനസികാരോഗ്യം, രോഗവിവരങ്ങൾ എന്നിവ ഉൾക്കൊള്ളുന്ന കൃത്യമായ ഡാറ്റാബേസ് തയ്യാറാക്കുകയും കാലാനുസൃതമായി പുതുക്കുകയും ചെയ്യും.
- പ്രത്യേക കെയർ ഗീവേഴ്‌സ് കോഴ്‌സ്: ജർമ്മനി, യുകെ, ഓസ്ട്രേലിയ എന്നീ രാജ്യങ്ങളിലെ സിലബസുകൾ പഠിച്ച് കേരളത്തിന് അനുയോജ്യമായ രീതിയിൽ നഴ്‌സിംഗിന് തൊട്ടുതാഴെ വരുന്ന 1 വർഷത്തെ പ്രായോഗിക കോഴ്‌സ് ചിട്ടപ്പെടുത്തും.
- വിദ്യാർത്ഥി വോളണ്ടിയർ കോർ: പ്ലസ് ടു വിദ്യാർത്ഥികളെ ഉൾപ്പെടുത്തി ഒരു ‘വോളണ്ടിയർ കോർ’ രൂപീകരിച്ച് മുതിർന്ന പൗരന്മാരുടെ ഏകാന്തതയകറ്റാൻ വീട്ടിൽ സന്ദർശനം നടത്തുന്ന സംവിധാനം ഒരുക്കും.
- സിൽവർ ഇക്കോണമി (Silver Economy): വിരമിച്ചവരുടെ അറിവും പരിചയസമ്പത്തും പുതിയ സ്റ്റാർട്ടപ്പുകൾക്കും വ്യവസായങ്ങൾക്കും മെന്ററിങ്ങിനായി ഉപയോഗപ്പെടുത്തും.
ധാരണാപത്രം ഒപ്പുവെച്ച 12 സ്ഥാപനങ്ങൾ:
ഇംഹാൻസ് (IMHANS), ഡിമെൻഷ്യ ഇന്ത്യ അലയൻസ്, പബ്ലിക് ഹെൽത്ത് ആൻഡ് സോഷ്യൽ ഡെവലപ്‌മെന്റ് ഫൗണ്ടേഷൻ, ഹെൽത്ത് ആക്ഷൻ ബൈ പീപ്പിൾ, രാജഗിരി കോളേജ് ഓഫ് സോഷ്യൽ സയൻസസ്, കേരള അസോസിയേഷൻ ഓഫ് പ്രൊഫഷണൽ സോഷ്യൽ വർക്കേഴ്സ്, ലയോള കോളേജ് ഓഫ് സോഷ്യൽ സയൻസസ്, സ്വസ്തി ദ ഹെൽത്ത് കാറ്റലിസ്റ്റ്, സെന്റർ ഫോർ മാനേജ്‌മെന്റ് ഡെവലപ്‌മെന്റ്, സെന്റർ ഫോർ സോഷ്യോ ഇക്കണോമിക് ആൻഡ് എൻവയോൺമെന്റൽ സ്റ്റഡീസ്, ഭാരത മാതാ എക്സ്റ്റൻഷൻ ഫോർ ഓർഗാനിക് റിസർച്ച് ആൻഡ് എൻവയോൺമെന്റ്, നുവാൽസ് (NUALS).
2026 മേയ് 19-ന് രൂപീകരിച്ച ഡിപ്പാര്‍ട്ട്മെന്റ് ഓഫ് സീനിയര്‍ സിറ്റിസണ്‍ രാജ്യത്ത് തന്നെ ആദ്യത്തേതാണ്. കൂടിക്കാഴ്ചയിൽ ഡിപ്പാർട്ട്മെന്റ് സെക്രട്ടറി ഡോ. രത്തൻ യു. ഖേൽക്കർ, ഡയറക്ടർ ഡോ. അരുൺ എസ്. നായർ എന്നിവരും പങ്കെടുത്തു.
