ന്യൂഡൽഹി: ആഗോള ടെക് ഭീമനായ എൻവിഡിയയുടെ (Nvidia) സിഇഒ ജെൻസൻ ഹുവാങ്ങുമായുള്ള അടുപ്പത്തിലൂടെയും ചൈനീസ് ചാരവൃത്തി ആരോപണങ്ങളിലൂടെയും ലോകശ്രദ്ധ നേടുന്നതിന് വർഷങ്ങൾക്ക് മുൻപേ, ചൈനയിലെ സാമ്പത്തിക മേഖലയിൽ ആലീസ് ഹുവാങ് (Alice Huang) ശക്തവും എന്നാൽ വിവാദപരവുമായ ഒരു സാമ്രാജ്യം കെട്ടിപ്പടുത്തിരുന്നു.
’ഫിനാൻഷ്യൽ ടൈംസ്’ (Financial Times) പുറത്തുവിട്ട റിപ്പോർട്ട് പ്രകാരം, ചൈനീസ് ഫിനാൻഷ്യർ കാങ് വെയ്‌യുമായി (Kang Wei) ഏകദേശം ഒരു ദശാബ്ദക്കാലം ആലീസ് അടുത്ത് പ്രവർത്തിച്ചിരുന്നു. ബിസിനസ് പങ്കാളികൾ എന്നതിലുപരി പ്രണയബന്ധത്തിലായിരുന്ന ഇരുവരും ചൈനീസ് സാമ്പത്തിക വൃത്തങ്ങളിലെ ‘പവർ കപ്പിൾ’ എന്നാണ് അറിയപ്പെട്ടിരുന്നത്. ഇരുവരും വിവാഹിതരാണെന്ന് പോലും പലരും കരുതിയിരുന്നു. എന്നാൽ, ഓഹരി വിപണിയിലെ ക്രമക്കേടുകളുടെ പേരിൽ കാങ് വെയ് തുടർച്ചയായി നിയമനടപടികൾ നേരിട്ടതോടെ, നിർമ്മിത ബുദ്ധി (AI) മേഖലയിലേക്ക് കടക്കുന്നതിന് മുൻപ് ആലീസ് ഭാഗമായിരുന്ന ബിസിനസ് ശൃംഖലകളെക്കുറിച്ച് ഇപ്പോൾ വലിയ സംശയങ്ങളാണ് ഉയരുന്നത്.
മാധ്യമപ്രവർത്തനത്തിൽ നിന്ന് സാമ്പത്തിക ലോകത്തേക്ക്
ചൈനയിലെ ഹുനാൻ പ്രവിശ്യയിലെ ഒരു ഗ്രാമത്തിൽ ജനിച്ച ആലീസ്, ചൈനയുടെ ഔദ്യോഗിക മാധ്യമമായ സിസിടിവിയിൽ (CCTV) മാധ്യമപ്രവർത്തകയായാണ് ഔദ്യോഗിക ജീവിതം ആരംഭിച്ചത്. 2000-ങ്ങളുടെ മധ്യത്തിൽ ഹോങ്കോങ് ബാപ്റ്റിസ്റ്റ് യൂണിവേഴ്സിറ്റിയിൽ മീഡിയ പഠനത്തിനായി എത്തിയ ആലീസ്, വളരെ സൗമ്യയും എന്നാൽ വലിയ ലക്ഷ്യബോധമുള്ളവളുമായിരുന്നുവെന്ന് സഹപാഠികൾ ഓർക്കുന്നു.
തുടർന്ന് എച്ച്എസ്ബിസി (HSBC), സിറ്റിക് സെക്യൂരിറ്റീസ് (Citic Securities) എന്നിവിടങ്ങളിൽ പ്രവർത്തിച്ച ശേഷം 2015-ലാണ് കാങ് വെയ് സ്ഥാപിച്ച ‘ഹെക്സി ക്യാപിറ്റൽ’ (Hexi Capital) എന്ന പ്രൈവറ്റ് ഇക്വിറ്റി സ്ഥാപനത്തിൽ ആലീസ് ചേരുന്നത്. ഗെയിമിംഗ്, ടെക്നോളജി, ഡാറ്റാ സെന്ററുകൾ എന്നീ മേഖലകളിലായിരുന്നു ഈ കമ്പനിയുടെ പ്രധാന നിക്ഷേപം.
നിയമക്കുരുക്കിൽപ്പെട്ട ബിസിനസ് പങ്കാളി
ഓഹരി വിപണിയിലെ ചട്ടലംഘനങ്ങളുടെ പേരിൽ 2018-ലും 2025-ലും ചൈനീസ് റെഗുലേറ്റർമാർ കാങ് വെയ്ക്ക് പിഴ ചുമത്തിയിരുന്നു. ഏകദേശം 2.9 ദശലക്ഷം യുവാൻ (4.07 കോടിയിലധികം ഇന്ത്യൻ രൂപ) ആയിരുന്നു പിഴത്തുക. വിവരങ്ങൾ മറച്ചുവെച്ച് വിവിധ നിക്ഷേപക കമ്പനികളിലൂടെ മറ്റു സ്ഥാപനങ്ങളുടെ നിയന്ത്രണം ഏറ്റെടുത്തു എന്നതായിരുന്നു കുറ്റം. ഓഹരി വിപണിയിൽ കൃത്രിമം കാണിച്ചതിന് ഈ വർഷം ആദ്യം കാങ് വെയ്‌യെ പോലീസ് കസ്റ്റഡിയിലെടുത്തതായും ചൈനീസ് മാധ്യമങ്ങൾ റിപ്പോർട്ട് ചെയ്യുന്നു. 2017-ൽ ആലീസ് ഹെക്സി ക്യാപിറ്റൽ വിട്ടെന്നാണ് കമ്പനി അവകാശപ്പെടുന്നതെങ്കിലും, കഴിഞ്ഞ വർഷം വരെയും അവർ കമ്പനിയുടെ വിസിറ്റിംഗ് കാർഡുകൾ ഉപയോഗിച്ചിരുന്നതായി നിക്ഷേപകർ വെളിപ്പെടുത്തുന്നു.
സിംഗപ്പൂരിലെ എഐ ഡാറ്റാ സെന്ററുകളും പേരുമാറ്റവും
അമേരിക്കയുടെ കയറ്റുമതി നിയന്ത്രണങ്ങൾ കാരണം എൻവിഡിയയുടെ അത്യാധുനിക എഐ ചിപ്പുകൾ നേരിട്ട് ചൈനയിലേക്ക് എത്തിക്കാൻ കഴിയാതായതോടെ, തെക്കുകിഴക്കൻ ഏഷ്യയിലെ ഡാറ്റാ സെന്ററുകൾ വഴി കമ്പ്യൂട്ടിംഗ് പവർ വാടകയ്ക്ക് എടുക്കുന്ന രീതി ചൈനീസ് കമ്പനികൾ വ്യാപകമാക്കി.
ഈ അവസരം മുതലെടുത്ത് 2023-ൽ ആലീസും പങ്കാളികളും ചേർന്ന് സിംഗപ്പൂർ ആസ്ഥാനമായുള്ള ‘മെഗാസ്പീഡ്’ (Megaspeed) എന്ന കമ്പനി ഏറ്റെടുത്ത് എഐ ഡാറ്റാ സെന്റർ മേഖലയിലേക്ക് തിരിഞ്ഞു. ഇതേ കാലയളവിൽ തന്നെ, തന്റെ ചൈനീസ് പശ്ചാത്തലം മറച്ചുവെക്കാനായി ‘ആലീസ് ഹുവാങ്’ എന്ന പേരിന് പകരം കന്റോണീസ് ഉച്ചാരണമായ ‘ആലീസ് വോങ്’ (Alice Wong) എന്ന പേരാണ് അവർ ഉപയോഗിച്ചിരുന്നത്. ആലീസിന്റെ സഹോദരി ഹുവാങ് യുവിനും ഇവരുടെ കമ്പനികളിൽ നിക്ഷേപമുണ്ടായിരുന്നു.
കാങ് വെയ്‌യുമായുള്ള പ്രണയബന്ധം മറച്ചുവെച്ചുകൊണ്ട്, ഷാങ്ഹായിലെ ഒരു സ്വകാര്യ ക്ലബ്ബിൽ വെച്ച് ഇരുവരും ചൈനീസ് നിക്ഷേപകരിൽ നിന്ന് പണം സമാഹരിച്ചിരുന്നു. എൻവിഡിയയുടെ ജിപിയു (GPU) ചിപ്പുകൾ സംഘടിപ്പിക്കാനുള്ള തങ്ങളുടെ കഴിവും, ചൈനീസ് ഭീമനായ ആലിബാബയുമായുള്ള (Alibaba) ബിസിനസ് ബന്ധവുമാണ് ഇവർ നിക്ഷേപകർക്ക് മുന്നിൽ പ്രധാന ആകർഷണമായി അവതരിപ്പിച്ചത്. 2024-ൽ സിംഗപ്പൂരിലെ ഒരു സ്ഥാപനം വഴി ആലിബാബ മെഗാസ്പീഡിന് വായ്പയും നൽകിയിരുന്നു.
ചാരവൃത്തി ആരോപണവും തിരോധാനവും
ചൈനയുടെ രഹസ്യാന്വേഷണ ഏജൻസിയായ മിനിസ്ട്രി ഓഫ് സ്റ്റേറ്റ് സെക്യൂരിറ്റിക്ക് (MSS) വേണ്ടി ആലീസ് പ്രവർത്തിച്ചിരിക്കാം എന്ന അമേരിക്കൻ രഹസ്യാന്വേഷണ ഏജൻസികളുടെ സംശയമാണ് ഇപ്പോൾ വലിയ വിവാദമായിരിക്കുന്നത്. ചൈനയിലേക്ക് അനധികൃതമായി എഐ ചിപ്പുകൾ കടത്തിയെന്ന സംശയത്തിൽ 2025 ഒക്ടോബറിൽ സിംഗപ്പൂർ അധികൃതർ മെഗാസ്പീഡിനെതിരെ അന്വേഷണം പ്രഖ്യാപിച്ചതിന് പിന്നാലെ ആലീസ് പൊതുവേദികളിൽ നിന്ന് അപ്രത്യക്ഷയായിരിക്കുകയാണ്. അവർ ചൈനയിലേക്ക് മടങ്ങിയിരിക്കാമെന്നാണ് അടുത്ത വൃത്തങ്ങൾ കരുതുന്നത്. അതേസമയം, ചാരവൃത്തി ആരോപണങ്ങൾ അടിസ്ഥാനരഹിതവും അപകീർത്തികരവുമാണെന്ന് ചൈനീസ് വിദേശകാര്യ മന്ത്രാലയം പ്രതികരിച്ചു.
