മാവേലിക്കര: കേരളത്തിന്റെ മതേതര സാംസ്കാരിക പൈതൃകത്തിന്റെ പ്രതീകമായ മാവേലിക്കര പുതിയകാവ് സെന്റ് മേരീസ് ഓർത്തഡോക്സ് കത്തീഡ്രലിന്റെ നവീകരിച്ച ദേവാലയ കൂദാശയിൽ പങ്കെടുക്കാൻ കഴിഞ്ഞത് ഒരു ദൈവനിയോഗമായി കരുതുന്നുവെന്ന് മുഖ്യമന്ത്രി വി.ഡി. സതീശൻ പറഞ്ഞു. ലഭ്യമായ രേഖകൾ പ്രകാരം എ.ഡി. 943-ൽ സ്ഥാപിക്കപ്പെട്ട, പോർച്ചുഗീസ്-കേരളീയ വാസ്തുശില്പ ശൈലികൾ സമ്മേളിക്കുന്ന ഈ ദേവാലയം നിരവധി ചരിത്ര മുഹൂർത്തങ്ങൾക്കാണ് സാക്ഷ്യം വഹിച്ചിട്ടുള്ളത്.
സഭാംഗവും മുൻ മുഖ്യമന്ത്രിയുമായിരുന്ന ഉമ്മൻ ചാണ്ടിയുടെ മൂന്നാം ചരമവാർഷിക ദിനത്തിലും, നെൽസൺ മണ്ടേല അന്താരാഷ്ട്ര ദിനത്തിലും നടന്ന ഈ കൂദാശ ചടങ്ങിൽ ഈ ദേവാലയവുമായി ബന്ധപ്പെട്ട ദേശീയ നേതാക്കളുടെ ചരിത്രസ്മരണകൾ മുഖ്യമന്ത്രി പങ്കുവെച്ചു.
ഇന്ത്യൻ പാർലമെന്റിനെ വിറപ്പിച്ച സി.എം. സ്റ്റീഫന്റെ പ്രസംഗം
ഈ ഇടവകയിലെ അംഗവും കോൺഗ്രസിന്റെ മുൻ പ്രതിപക്ഷ നേതാവുമായിരുന്ന സി.എം. സ്റ്റീഫൻ ഇന്ത്യൻ പാർലമെന്റിന്റെ ചരിത്രത്തിൽ നടത്തിയ ഏറ്റവും പ്രശസ്തമായ ‘ഉയിർത്തെഴുന്നേൽപ്പ്’ (Resurrection) പ്രസംഗം മുഖ്യമന്ത്രി അനുസ്മരിച്ചു. 1977-ൽ അടിയന്തരാവസ്ഥയ്ക്ക് ശേഷം ഇന്ദിരാഗാന്ധിയെ തടവിലിടാൻ ജനതാ സർക്കാർ ശ്രമിച്ചപ്പോൾ, ക്രിസ്തുവിന്റെ കുരിശുമരണത്തെയും ഉത്ഥാനത്തെയും മുൻനിർത്തി സ്റ്റീഫൻ ഗർജിച്ചു:
”നിങ്ങൾ ഇന്ദിരാഗാന്ധിയെ കുരിശിൽ തറച്ചിരിക്കുന്നു. പക്ഷേ, കുരിശിൽനിന്ന് ഒരു ഉയിർത്തെഴുന്നേൽപുണ്ടെന്നു മറക്കരുത്.”
ഈ പ്രവചനം പോലെ തന്നെ 1980-ൽ ഇന്ദിരാഗാന്ധി വൻ ഭൂരിപക്ഷത്തോടെ അധികാരത്തിൽ തിരിച്ചെത്തി. ഈ ഇടവക പകർന്നുനൽകിയ ക്രൈസ്തവ മൂല്യങ്ങളാണ് പാർലമെന്റിൽ അത്തരമൊരു പ്രസംഗം നടത്താൻ അദ്ദേഹത്തിന് ഊർജ്ജം നൽകിയതെന്ന് മുഖ്യമന്ത്രി പറഞ്ഞു.
പി.സി. അലക്സാണ്ടറും ഡെന്മാർക്കിലെ അത്താഴവിരുന്നും
ഈ ഇടവകയിലെ മറ്റൊരു പ്രമുഖ അംഗവും ഇന്ദിരാഗാന്ധിയുടെ പ്രിൻസിപ്പൽ സെക്രട്ടറിയുമായിരുന്ന പി.സി. അലക്സാണ്ടറുടെ ‘My Years with Indira Gandhi’ എന്ന പുസ്തകത്തിലെ ഒരു രസകരമായ സംഭവവും മുഖ്യമന്ത്രി വിവരിച്ചു. 1983-ൽ ഡെന്മാർക്ക് സന്ദർശനത്തിനിടെ അവിടുത്തെ ഉദ്യോഗസ്ഥന്റെ ഭാര്യ, ഹിന്ദുവായ താങ്കൾക്ക് എങ്ങനെ ‘അലക്സാണ്ടർ’ എന്ന പേര് വന്നു എന്ന് ചോദിച്ചപ്പോൾ, യൂറോപ്പിനേക്കാൾ മുൻപേ കേരളത്തിൽ ക്രിസ്തുമതം എത്തിയ ചരിത്രവും സെന്റ് തോമസിന്റെ ആഗമനവും അദ്ദേഹം വിശദീകരിച്ചു നൽകി. സ്വന്തം സംസ്ഥാനത്തു നിന്നോ മതത്തിൽ നിന്നോ അല്ലാതെ, കഴിവ് മാത്രം നോക്കി ഒരു ക്രൈസ്തവനായ അലക്സാണ്ടറെ ഇന്ദിരാഗാന്ധി പ്രിൻസിപ്പൽ സെക്രട്ടറിയാക്കിയതിലെ വിസ്മയം പാശ്ചാത്യർക്ക് അത്ഭുതമായിരുന്നുവെന്നും അദ്ദേഹം ഓർമ്മിപ്പിച്ചു.
സാമൂഹിക പ്രതിസന്ധികൾക്കെതിരെ സഭ കൈകോർക്കണം
യുവജനതയ്ക്കിടയിലെ മയക്കുമരുന്ന് ഉപയോഗവും വയോജനങ്ങളുടെ ഒറ്റപ്പെടലും നിലവിലെ വലിയ പ്രതിസന്ധികളാണെന്ന് മുഖ്യമന്ത്രി ചൂണ്ടിക്കാട്ടി. മയക്കുമരുന്നിനെതിരെയുള്ള സർക്കാരിന്റെ ‘തൂഫാൻ’ പദ്ധതിയിലൂടെ ഇതിനകം 7,000-ത്തോളം പേർ ജയിലിലായിക്കഴിഞ്ഞു, ഇതിൽ 75%-വും യുവാക്കളാണ്. ഈ നാശത്തിൽ നിന്ന് തലമുറകളെ രക്ഷിക്കാൻ സഭാ നേതൃത്വവും കുടുംബങ്ങളും തമ്മിലുള്ള ബന്ധം ദൃഢമാകണം.
കുടുംബങ്ങൾ ശക്തമാകുമ്പോഴേ രാജ്യം ശക്തമാകൂ എന്ന് അദ്ദേഹം ഓർമ്മിപ്പിച്ചു. യോശുവ പ്രവാചകൻ പറഞ്ഞതുപോലെ “ഞാനും എന്റെ കുടുംബവുമോ ഞങ്ങൾ യഹോവയെ സേവിക്കും” എന്ന ബോധ്യം ഓരോ കുടുംബത്തിനും ഉണ്ടാകണമെന്നും മുഖ്യമന്ത്രി ആഹ്വാനം ചെയ്തു.
