തിരുവനന്തപുരം:
സംസ്ഥാന സർക്കാർ ജീവനക്കാരുടെയും പെൻഷൻകാരുടെയും കണ്ണീരൊപ്പി എന്ന പേരിൽ നടപ്പിലാക്കിയ മെഡിസെപ് പദ്ധതി ഇപ്പോൾ ‘പച്ചയായ പകൽക്കൊള്ള’യായി മാറുന്നു. അർഹമായ ചികിത്സാ ആനുകൂല്യങ്ങൾക്കായി സമർപ്പിച്ച 1.25 ലക്ഷം ക്ലെയിമുകളാണ് സാങ്കേതിക കാരണങ്ങൾ പറഞ്ഞ് ഇൻഷുറൻസ് കമ്പനികൾ വലിച്ചെറിഞ്ഞത്. ഇത്തരത്തിൽ ജീവനക്കാർക്ക് ലഭിക്കേണ്ട 100 കോടിയോളം രൂപയാണ് കമ്പനികൾ വെട്ടിച്ചത്. സർക്കാരാകട്ടെ, ഈ കൊള്ളയ്ക്ക് കൂട്ടുനിൽക്കുന്ന കാഴ്ചക്കാരനായി മാറി നിൽക്കുകയാണ്.
1.25 ലക്ഷം പേരുടെ കണ്ണീര്; സർക്കാരിന് പുച്ഛം!
”ഇതുവരെ തള്ളിയത് 1.25 ലക്ഷം ക്ലെയിമുകൾ” – ഇത് വെറുമൊരു കണക്കല്ല, മരുന്നിനും ശസ്ത്രക്രിയയ്ക്കും പണമില്ലാതെ വലയുന്ന പതിനായിരക്കണക്കിന് കുടുംബങ്ങളുടെ നിലവിളിയാണ്. നിസ്സാരമായ സാങ്കേതിക പിഴവുകൾ പർവ്വതീകരിച്ചും, അനാവശ്യ ചോദ്യങ്ങൾ ഉന്നയിച്ചും ഇൻഷുറൻസ് കമ്പനികൾ നടത്തുന്ന ഈ തേർവാഴ്ചയ്ക്ക് തടയിടാൻ അധികൃതർ തയ്യാറാകുന്നില്ല. സർക്കാരിനെ തെറ്റിദ്ധരിപ്പിക്കാൻ വ്യാജ കണക്കുകൾ നിരത്തുന്ന ടി.പി.എ (TPA) കമ്പനികൾക്കെതിരെ ഒരു നടപടിയും എടുക്കാത്തത് ആരെ സഹായിക്കാനാണെന്ന ചോദ്യം ഉയരുന്നു.
സോഫ്റ്റ്വെയർ ‘തകരാർ’ എന്ന തട്ടിപ്പ്
ആശുപത്രികളിൽ ചെന്നാൽ കേൾക്കുന്ന സ്ഥിരം പല്ലവിയാണ് ‘സോഫ്റ്റ്വെയർ തകരാർ’. ഇത് കമ്പനികളും ആശുപത്രികളും ചേർന്ന് നടത്തുന്ന ആസൂത്രിത നാടകമാണ്. പദ്ധതിപ്രകാരം പണമില്ലാതെ ചികിത്സ ലഭിക്കേണ്ട രോഗികളിൽ നിന്ന്, സോഫ്റ്റ്വെയർ പണിമുടക്ക് എന്ന വ്യാജേന വൻതുക കൈക്കലാക്കുന്നു. നിസ്സഹായരായ രോഗികൾ ഡിസ്ചാർജ് കിട്ടാൻ വേണ്ടി കടം വാങ്ങിയും സ്വർണ്ണം പണയം വെച്ചും ആശുപത്രിയുടെ പണപ്പെട്ടികൾ നിറയ്ക്കുകയാണ്.
പക്ഷാഘാതം വന്നവനോട് ‘കിടക്കണോ’ എന്ന് ചോദ്യം!
മനുഷ്യത്വമില്ലാത്ത സമീപനത്തിന്റെ ഏറ്റവും ഒടുവിലത്തെ ഉദാഹരണമാണ് റിട്ട. അഡീഷണൽ ലേബർ കമ്മീഷണർ കെ. രവീന്ദ്രനോട് കമ്പനി കാട്ടിയ ക്രൂരത. പക്ഷാഘാതം വന്ന് ശരീരം തളർന്ന അവസ്ഥയിൽ ശ്രീചിത്ര ഇൻസ്റ്റിറ്റ്യൂട്ടിൽ ചികിത്സ തേടിയ അദ്ദേഹത്തിന്റെ 2.8 ലക്ഷം രൂപയുടെ ക്ലെയിം തള്ളാൻ കമ്പനി പറഞ്ഞ മറുപടി “കിടത്തിച്ചികിത്സയുടെ ആവശ്യമുണ്ടായിരുന്നില്ല” എന്നാണ്. ഒരു മനുഷ്യൻ മരണത്തോട് മല്ലിടുമ്പോൾ പോലും ലാഭം കൊയ്യാൻ നോക്കുന്ന ഈ ഇൻഷുറൻസ് മാഫിയയ്ക്ക് കടിഞ്ഞാണിടാൻ ആരുമില്ലേ?
കരാർ ലംഘനം പതിവാകുന്നു
സർക്കാരുമായി ഒപ്പിട്ട കരാറുകൾ ഇൻഷുറൻസ് കമ്പനികളും സ്വകാര്യ ആശുപത്രികളും പരസ്യമായി ലംഘിക്കുന്നു. നിശ്ചിത പാക്കേജ് തുകയേ ഈടാക്കാവൂ എന്ന നിയമം നിലനിൽക്കെ, രോഗികളിൽ നിന്ന് അധിക തുക ഈടാക്കുന്നത് പതിവായിട്ടും ആരോഗ്യവകുപ്പോ ഭരണകൂടമോ ഇടപെടുന്നില്ല.
ജനരോഷം ഉയരുന്നു:
ശമ്പളത്തിൽ നിന്ന് കൃത്യമായി പ്രീമിയം പിടിക്കുന്ന സർക്കാർ, ചികിത്സ ഉറപ്പാക്കേണ്ട ബാധ്യതയിൽ നിന്ന് ഒഴിഞ്ഞുമാറുന്നത് വഞ്ചനയാണെന്ന് സംഘടനകൾ ആരോപിക്കുന്നു. ഇൻഷുറൻസ് കമ്പനികളുടെ ലാഭക്കൊതിക്ക് ജീവനക്കാരെ എറിഞ്ഞുകൊടുക്കുന്ന ഈ നിലപാട് തിരുത്തിയില്ലെങ്കിൽ വരും ദിവസങ്ങളിൽ സെക്രട്ടേറിയറ്റിന് മുന്നിൽ പ്രക്ഷോഭം ഇരമ്പുമെന്നുറപ്പാണ്.
