തിരുവനന്തപുരം: സംസ്ഥാനം വൻ കടക്കെണിയിൽ മുങ്ങിനിൽക്കുമ്പോഴും സ്വന്തം പ്രതിച്ഛായ മിനുക്കാൻ കോടികൾ വാരിയെറിഞ്ഞ് പിണറായി സർക്കാർ. സർക്കാരിന്റെ ‘അഴിമതിയും കെടുകാര്യസ്ഥതയും’ മറച്ചുവെക്കാൻ ഡിജിറ്റൽ പ്ലാറ്റ്ഫോമുകൾ വഴി പിആർ വർക്ക് നടത്താനാണ് 15 കോടി രൂപയുടെ പുതിയ പദ്ധതി. ഇതിൽ 5 കോടി രൂപ അടിയന്തരമായി അഡ്വാൻസ് നൽകിക്കൊണ്ട് മാർച്ച് 12-ന് സർക്കാർ ഉത്തരവിറക്കി.
ഖജനാവിൽ കയ്യിട്ട് ‘ഡിജിറ്റൽ’ തള്ളൽ
തെരഞ്ഞെടുപ്പ് അടുത്തിരിക്കെ, പബ്ലിക് റിലേഷൻസ് വകുപ്പിനെ മുൻനിർത്തി നടത്തുന്ന ഈ നീക്കം വോട്ടർമാരെ സ്വാധീനിക്കാനുള്ള ഗൂഢതന്ത്രമാണെന്ന ആക്ഷേപം ശക്തമാണ്. താഴെ പറയുന്ന പ്ലാറ്റ്ഫോമുകളിലൂടെയാണ് സർക്കാർ പണം ഒഴുക്കുന്നത്:
- യൂട്യൂബ് & ഗൂഗിൾ: സർക്കാർ പരസ്യങ്ങൾ കൊണ്ട് ജനങ്ങളെ വീർപ്പുമുട്ടിക്കാൻ വൻ തുക.
- മെറ്റ (ഫേസ്ബുക്ക്, ഇൻസ്റ്റാഗ്രാം): സൈബർ വിങ്ങുകളെ ഉപയോഗിച്ചുള്ള പ്രചാരണത്തിന് പുറമെ ഔദ്യോഗികമായി കോടികളുടെ പരസ്യം.
- ഒടിടി & ഡെയ്ലി ഹണ്ട്: സിനിമയ്ക്കിടയിലും വാർത്തകൾക്കിടയിലും നിർബന്ധിതമായി സർക്കാർ ‘നേട്ടങ്ങൾ’ കുത്തിനിറയ്ക്കും.
തെരഞ്ഞെടുപ്പ് ലക്ഷ്യം; അഡ്വാൻസ് നൽകിയത് ധൃതിപിടിച്ച്
പദ്ധതി പൂർത്തിയാകുന്നതിന് മുൻപേ 5 കോടി രൂപ അഡ്വാൻസ് നൽകിയത് ദുരൂഹത വർദ്ധിപ്പിക്കുന്നു. സാധാരണ ഗതിയിൽ നടക്കാത്ത ഈ അസാധാരണ നീക്കം, തെരഞ്ഞെടുപ്പ് പെരുമാറ്റച്ചട്ടം നിലവിൽ വരുന്നതിന് മുൻപ് പണം വകമാറ്റാനാണെന്ന് വ്യക്തം. സാധാരണക്കാരൻ നിത്യവൃത്തിക്ക് കഷ്ടപ്പെടുമ്പോഴാണ് ഭരണകൂടം സോഷ്യൽ മീഡിയയിൽ ലൈക്കും ഷെയറും വാങ്ങാൻ കോടികൾ പൊടിക്കുന്നത്.
