തിരുവനന്തപുരം: സംസ്ഥാനത്തെ ഒരു പ്രമുഖ രാഷ്ട്രീയ നേതാവിൻ്റെ അസാധാരണമായ സ്വത്ത് വർദ്ധനവിൽ എൻഫോഴ്സ്മെൻ്റ് ഡയറക്ടറേറ്റ് (ഇ.ഡി) നിരീക്ഷണം ശക്തമാക്കുന്നു. സംസ്ഥാനത്തിനകത്തെ സാമ്പത്തിക ഇടപാടുകൾ അതീവ ജാഗ്രതയോടെയും നിയമവിധേയമായും സൂക്ഷിക്കുമ്പോഴും, സംസ്ഥാനത്തിന് പുറത്തെയും വിദേശത്തെയും ബിസിനസ് ഗ്രൂപ്പുകളിൽ ഇദ്ദേഹം വൻതോതിൽ പണം നിക്ഷേപിച്ചതായാണ് കേന്ദ്ര ഏജൻസിക്ക് ലഭിച്ചിരിക്കുന്ന പ്രാഥമിക സൂചന.
രണ്ട് വൻ വ്യവസായികൾ, കോടികളുടെ നിക്ഷേപം
രാജ്യത്തെ അറിയപ്പെടുന്ന രണ്ട് വൻകിട വ്യവസായ ഗ്രൂപ്പുകളുടെ ബിസിനസ് സംരംഭങ്ങളിൽ ഈ നേതാവിന് പങ്കാളിത്തമുണ്ടെന്നാണ് ഇ.ഡി സംശയിക്കുന്നത്. പ്രത്യക്ഷത്തിൽ ഇദ്ദേഹത്തിൻ്റെ പേരോ കുടുംബാംഗങ്ങളുടെ പേരോ ഈ കമ്പനികളിൽ രേഖപ്പെടുത്തിയിട്ടില്ലെങ്കിലും, ബിനാമി മാർഗ്ഗങ്ങളിലൂടെ കോടികൾ ഒഴുകിയെന്നാണ് അറിയുന്നത്.
ചുക്കാൻ പിടിക്കുന്നത് ‘വിവാദ വ്യവസായി’
ഈ രഹസ്യ നിക്ഷേപങ്ങൾക്ക് പിന്നിൽ കരുനീക്കങ്ങൾ നടത്തുന്നത് മറ്റൊരു വിവാദ വ്യവസായിയാണെന്നത് കേസിൻ്റെ ഗൗരവം വർദ്ധിപ്പിക്കുന്നു. മുൻപും പല സാമ്പത്തിക ഇടപാടുകളിലും പേര് കേട്ട ഈ വ്യവസായിയാണ് രാഷ്ട്രീയ നേതാവിൻ്റെ പണം സുരക്ഷിതമായി നിക്ഷേപിക്കാനും അത് നിയന്ത്രിക്കാനും ചുക്കാൻ പിടിക്കുന്നത്. ഇരുവരും തമ്മിലുള്ള അടുത്ത ബന്ധം അന്വേഷണ ഏജൻസികൾ നേരത്തെ തന്നെ നിരീക്ഷിച്ചു വരികയായിരുന്നു.
സംസ്ഥാനത്ത് ‘ക്ലീൻ’, പുറത്ത് ‘നിഗൂഢം’
ഇദ്ദേഹത്തിൻ്റെ സംസ്ഥാനത്തെ സാമ്പത്തിക രേഖകളെല്ലാം തികച്ചും സുതാര്യവും നിയമപരവുമാണ് എന്നത് അന്വേഷണ ഉദ്യോഗസ്ഥരെ പോലും അത്ഭുതപ്പെടുത്തുന്നുണ്ട്. ആദായനികുതി റിട്ടേണുകളോ ആസ്തി വിവരങ്ങളോ പരിശോധിച്ചാൽ ഒരു പഴുത് പോലും കണ്ടെത്താൻ കഴിയില്ല.
അന്വേഷണം പ്രാഥമിക ഘട്ടത്തിലാണെന്നും കൃത്യമായ തെളിവുകൾ ശേഖരിച്ച ശേഷം ചോദ്യം ചെയ്യലിലേക്ക് നീങ്ങാനുമാണ് ഇ.ഡിയുടെ നീക്കം. ഇത് സംബന്ധിച്ച കൂടുതൽ വിവരങ്ങൾ പുറത്തുവരുന്നതോടെ രാഷ്ട്രീയ കേരളത്തിൽ വലിയ പ്രത്യാഘാതങ്ങൾ ഉണ്ടാകുമെന്നുറപ്പാണ്.
