തിരുവനന്തപുരം: സംസ്ഥാനത്ത് പുതുതായി പുറത്തിറക്കുന്ന ബ്രാൻഡിക്ക് പേരിടാൻ ബെവ്കോ ജനങ്ങളെ ക്ഷണിച്ചതിന് പിന്നാലെ വേറിട്ട ഒരു നാമനിർദ്ദേശവുമായി തിരുവനന്തപുരം ജില്ലാ പഞ്ചായത്ത് അംഗവും കോൺഗ്രസ് നേതാവുമായ അഡ്വ. സി.ആർ. പ്രാണകുമാർ രംഗത്ത്. കേരളം പത്ത് വർഷം ഭരിച്ചിട്ടും സ്വന്തം പേര് ചാർത്താൻ ഒരു വികസന പദ്ധതി പോലും മുഖ്യമന്ത്രി പിണറായി വിജയനില്ലെന്ന് പ്രാണകുമാർ പരിഹസിച്ചു.
”കെ. കരുണാകരന് നെടുമ്പാശേരി വിമാനത്താവളമുണ്ട്, ഉമ്മൻചാണ്ടിക്ക് വിഴിഞ്ഞവും മെട്രോയുമുണ്ട്. എന്നാൽ പിണറായി വിജയൻ തുടങ്ങിയ ഒരു പദ്ധതിയും ഇവിടെയില്ല. വരുംതലമുറ ഇങ്ങനെയൊരു മുഖ്യമന്ത്രിയെ ഓർക്കാൻ ഈ ബ്രാൻഡിക്ക് ‘പി.വി ബ്രാൻഡി’ എന്ന് പേരിടണം,” പ്രാണകുമാർ പറഞ്ഞു. മര്യാപുരം ഡിവിഷനിൽ നിന്നും 7500 വോട്ടുകളുടെ ഭൂരിപക്ഷത്തിൽ വിജയിച്ച പ്രാണകുമാറിന്റെ ഈ ഫേസ്ബുക്ക് പോസ്റ്റ് ഇതിനോടകം തന്നെ സോഷ്യൽ മീഡിയയിൽ വൈറലായിരിക്കുകയാണ്. വികസന ശൂന്യതയ്ക്കുള്ള മറുപടിയാണ് ഈ നാമകരണം എന്നാണ് അദ്ദേഹത്തിന്റെ പക്ഷം.
പ്രാണകുമാറിൻ്റെ ഫേസ് ബുക്ക് കുറിപ്പിൻ്റെ പൂർണരൂപം:
സംസ്ഥാനത്തിൻ്റെ ചരിത്രത്തിൽ ആദ്യമായി ബ്രാൻഡിക്ക് പേരിടാൻ ജനങ്ങളെ ക്ഷണിച്ചിരിക്കുകയാണല്ലോ.? എന്ത് പേരിടണം എന്ന് ഞാനും ആലോചിച്ചു..നമ്മുടെ മുഖ്യമന്ത്രി പിണറായി വിജയൻ പത്ത് വർഷം കേരളം തുടർച്ചയായിട്ട് ഭരിച്ചിട്ടും ഒരു വികസനവും നാട്ടിൽ ഉണ്ടായിട്ടില്ല. മുഖ്യമന്ത്രി തന്നെ തുടങ്ങി പൂർത്തിയാക്കിയ ഒരു പദ്ധതിയും കേരളത്തിൽ ഇല്ല. സ്വന്തം പേര് ഒരു സ്ഥലത്തും ചാർത്താൻ ഇല്ലാത്ത നിർഭാഗ്യവാനാണ് പിണറായി വിജയൻ. നെടുമ്പാശേരി എയർപോർട്ട് അടക്കമുള്ള എത്രയോ വികസന പദ്ധതികൾ ആസൂത്രണം ചെയ്ത് നടപ്പിലാക്കിയാണ് ലീഡർ കെ കരുണാകരൻ അധികാരമൊഴിഞ്ഞത്. വിഴിഞ്ഞം, കൊച്ചി മെട്രോ അടക്കമുള്ള നിരവധി പദ്ധതികൾ നടപ്പിലാക്കി ഉമ്മൻ ചാണ്ടിയും തൻ്റെ കാലം മനോഹരമാക്കി. പത്ത് വർഷം കേരളം ഭരിച്ച പിണറായിയെ ചരിത്രം ഓർക്കാതിരിക്കുന്നത് നീതികേടാകും. അതുകൊണ്ട് വരും തലമുറക്ക് ഇങ്ങനൊരു മുഖ്യമന്ത്രി കേരളം ഭരിച്ചിരുന്നു എന്ന് ഓർക്കാൻ ഈ ബ്രാൻഡിക്ക് ഞാൻ നൽകുന്നത്..
പേര് “പി.വി ബ്രാൻഡി ” .
