കൊച്ചി: മലയാളിയുടെ നിത്യജീവിതത്തിലെ പൊള്ളുന്ന യാഥാർത്ഥ്യങ്ങളെ ഹാസ്യത്തിന്റെ മേമ്പൊടിയോടെ വെള്ളിത്തിരയിൽ എത്തിച്ച സമാനതകളില്ലാത്ത പ്രതിഭ ശ്രീനിവാസൻ (66) ഓർമ്മയായി. തൃപ്പൂണിത്തുറ താലൂക്ക് ആശുപത്രിയിലായിരുന്നു അന്ത്യം.
സാധാരണക്കാരുടെ ജീവിതത്തെ അസാധാരണ മിഴിവോടെ അവതരിപ്പിച്ച അദ്ദേഹം, നടൻ, തിരക്കഥാകൃത്ത്, സംവിധായകൻ എന്നീ നിലകളിൽ ദശകങ്ങളോളം മലയാള സിനിമയുടെ ഗതിനിർണ്ണയിച്ചു.
നിസ്സഹായരായ മനുഷ്യരുടെ ജീവിതവേവലാതികൾ സൂക്ഷ്മമായി അവതരിപ്പിച്ചതാണ് ശ്രീനിവാസൻ ചിത്രങ്ങളെ ജനപ്രിയമാക്കിയത്. അദ്ദേഹം രചനയും സംവിധാനവും നിർവ്വഹിച്ച ‘വടക്കുനോക്കിയന്ത്രം’, ‘ചിന്താവിഷ്ടയായ ശ്യാമള’ എന്നീ ചിത്രങ്ങൾ ദേശീയ, സംസ്ഥാന ചലച്ചിത്ര പുരസ്കാരങ്ങൾ കരസ്ഥമാക്കിയിട്ടുണ്ട്. 1991-ൽ പുറത്തിറങ്ങിയ ‘സന്ദേശം’ എന്ന ചിത്രത്തിലെ രാഷ്ട്രീയ ആക്ഷേപഹാസ്യം ഇന്നും കേരളീയ സമൂഹത്തിൽ വലിയ ചർച്ചാവിഷയമായി തുടരുന്നു.
സിനിമാ യാത്ര: 1956 ഏപ്രിൽ 4-ന് തലശേരിക്കടുത്തുള്ള പാട്യത്താണ് ശ്രീനിവാസൻ ജനിച്ചത്. കതിരൂർ ഗവ. സ്കൂൾ, പഴശ്ശിരാജ എൻഎസ്എസ് കോളേജ് എന്നിവിടങ്ങളിലെ പഠനത്തിന് ശേഷം മദ്രാസ് ഫിലിം ചേംബർ ഇൻസ്റ്റിറ്റ്യൂട്ടിൽ നിന്ന് അഭിനയത്തിൽ ഡിപ്ലോമ നേടി. തമിഴ് സൂപ്പർ താരം രജനികാന്ത് ഇൻസ്റ്റിറ്റ്യൂട്ടിൽ അദ്ദേഹത്തിന്റെ സഹപാഠിയായിരുന്നു. 1977-ൽ പി.എ. ബക്കർ സംവിധാനം ചെയ്ത ‘മണിമുഴക്കം’ ആയിരുന്നു ആദ്യ ചിത്രം. പിന്നീട് ‘മേള’ എന്ന ചിത്രത്തിലൂടെ ശ്രദ്ധേയനായി. 1984-ൽ ‘ഓടരുതമ്മാവാ ആളറിയും’ എന്ന ചിത്രത്തിന് കഥയെഴുതിക്കൊണ്ടാണ് തിരക്കഥാരംഗത്തേക്ക് അദ്ദേഹം കടന്നുവന്നത്.
സിനിമയിലെ എല്ലാ മേഖലകളിലും തന്റെ വ്യക്തിമുദ്ര പതിപ്പിച്ച അദ്ദേഹം മലയാളിക്ക് നൽകിയത് എണ്ണമറ്റ ഹിറ്റ് ചിത്രങ്ങളാണ്. വിമലയാണ് ഭാര്യ. പ്രശസ്ത ഗായകനും സംവിധായകനുമായ വിനീത് ശ്രീനിവാസൻ, നടൻ ധ്യാൻ ശ്രീനിവാസൻ എന്നിവർ മക്കളാണ്.
