തിരുവനന്തപുരം: സംസ്ഥാനത്ത് തദ്ദേശസ്വയംഭരണ സ്ഥാപനങ്ങളിലേക്ക് തിരഞ്ഞെടുപ്പും വോട്ടെണ്ണലും നടക്കുന്ന ഡിസംബർ 9, 11, 13 തീയതികളിൽ ട്രഷറികൾ തുറന്നു പ്രവർത്തിപ്പിക്കുവാനുള്ള സർക്കാർ ഉത്തരവ് അനുചിതവും പ്രതിഷേധാർഹവുമാണെന്ന് കേരള ഗസറ്റഡ് ഓഫീസേഴ്‌സ് യൂണിയൻ (K.G.O.U.) അഭിപ്രായപ്പെട്ടു.
തിരഞ്ഞെടുപ്പ് ഡ്യൂട്ടിയിൽ ഇല്ലാത്ത ജീവനക്കാർക്ക് അവരുടെ വോട്ടവകാശം വിനിയോഗിക്കുന്നതിനുള്ള അവസരമാണ് ഈ ഉത്തരവിലൂടെ നിഷേധിക്കപ്പെടുന്നതെന്ന് യൂണിയൻ ചൂണ്ടിക്കാട്ടി. വിദൂര സ്ഥലങ്ങളിൽ ജോലിചെയ്യുന്ന ജീവനക്കാർ വൈകിട്ട് സ്വന്തം നാട്ടിലേക്ക് പോകുന്നതിനു തൊട്ടുമുമ്പാണ് ഇത്തരമൊരു സർക്കാർ ഉത്തരവ് പുറത്തിറങ്ങിയത്.
സംസ്ഥാന തിരഞ്ഞെടുപ്പ് ചരിത്രത്തിൽ ആദ്യമായാണ് തിരഞ്ഞെടുപ്പ് ദിവസങ്ങളിൽ ട്രഷറികൾ തുറന്നു പ്രവർത്തിപ്പിക്കണം എന്ന വിചിത്രമായ ഉത്തരവ് ഉണ്ടാകുന്നത്. തിരഞ്ഞെടുപ്പ് ചെലവിനുള്ള തുക മുൻകൂട്ടി ട്രഷറിയിൽ നിന്ന് അനുവദിപ്പിക്കുന്നതിന് ആവശ്യമായ ക്രമീകരണങ്ങൾ വരുത്തി, ഡിസംബർ 11, 13 തീയതികളിൽ ട്രഷറികൾക്ക് അവധി അനുവദിക്കാൻ സർക്കാർ തയ്യാറാകണമെന്ന് കെ.ജി.ഒ.യു. സംസ്ഥാന പ്രസിഡന്റ് കെ.സി. സുബ്രഹ്മണ്യനും ജനറൽ സെക്രട്ടറി ബി. ഗോപകുമാറും സംയുക്ത പ്രസ്താവനയിൽ ആവശ്യപ്പെട്ടു.
