തിരുവനന്തപുരം: സംസ്ഥാനത്തെ ഐടി പാർക്കുകളെ ‘ടെക്നോ ബാറുകളാക്കി’ മാറ്റാൻ വഴിവെക്കാൻ പിണറായി സർക്കാർ കൊണ്ട് വന്ന ചട്ടഭേദഗതി നീക്കത്തിന് താൽക്കാലിക വിരാമം. ഐടി പാർക്കുകളിൽ ഡെവലപ്പർമാർക്ക് പുറമെ കോ-ഡെവലപ്പർമാർക്കും, ഡെവലപ്പർ ചുമതലപ്പെടുത്തുന്ന മൂന്നാമതൊരാൾക്കും ഒന്നിലധികം മദ്യലൈസൻസുകൾ (FL-4C) അനുവദിക്കാൻ ലക്ഷ്യമിട്ടുള്ള കരടുചട്ടത്തിന്റെ പരിഗണന മുഖ്യമന്ത്രി വി.ഡി സതീശൻ്റെയും എക്സൈസ് മന്ത്രി എം.ലിജുവിൻ്റെയും ഇടപെടലിനെത്തുടർന്ന് മാറ്റിവച്ചു.
സംഭവത്തിന്റെ പശ്ചാത്തലം ഇങ്ങനെ:
സംസ്ഥാനത്തെ ഐടി പാർക്കുകളിൽ വിദേശമദ്യ ലോഞ്ചുകൾ തുടങ്ങുന്നതിനായി 2025 ഏപ്രിലിലാണ് പിണറായി സർക്കാർ വിദേശമദ്യ ചട്ടങ്ങളിൽ ഭേദഗതി വരുത്തി FL-4C (Foreign Liquor Information Technology Park Lounge Licence) ലൈസൻസ് ഏർപ്പെടുത്തിയത്. അന്നത്തെ വ്യവസ്ഥ പ്രകാരം, ഒരു ഐടി പാർക്ക് ഡെവലപ്പർക്ക് ഒരു ലൈസൻസ് മാത്രമേ നൽകാൻ പാടുള്ളൂ എന്ന കർശന നിബന്ധനയുണ്ടായിരുന്നു.
എന്നാൽ, 2026 ജനുവരിയിൽ ഈ നിബന്ധനകളിൽ വൻ ഇളവുകൾ വരുത്തുന്നതിനായി പിണറായി സർക്കാർ പുതിയ കരടുചട്ടം തയ്യാറാക്കി. ഇതിലെ പ്രധാന നിർദ്ദേശങ്ങൾ ഇവയായിരുന്നു:
- ഐടി പാർക്ക് ഡെവലപ്പർക്ക് പുറമെ കോ-ഡെവലപ്പർമാർക്കും FL-4C ലൈസൻസ് അനുവദിക്കുക.
- ഡെവലപ്പർ ചുമതലപ്പെടുത്തുന്ന മൂന്നാമത് ഏതൊരാൾക്കും ലൈസൻസ് നേടാൻ അനുമതി നൽകുക.
- ഒരാളുടെ പേരിൽ തന്നെ ഒന്നിലധികം ലൈസൻസുകൾ അനുവദിക്കുക.
സബ്ജക്റ്റ് കമ്മിറ്റിയിലെ വഴിത്തിരിവ്:
ഈ കരടുചട്ടം ധനകാര്യ സബ്ജക്റ്റ് കമ്മിറ്റിയുടെ പരിഗണനയ്ക്ക് ഇന്ന് എത്തിയപ്പോഴാണ് നിർണ്ണായക തീരുമാനമുണ്ടായത്. ഡെവലപ്പർ ചുമതലപ്പെടുത്തുന്ന ‘മൂന്നാമത് ഏതൊരാൾക്കും’ ലൈസൻസ് നൽകാമെന്ന വ്യവസ്ഥയിലടക്കം വലിയ അവ്യക്തതകളുണ്ടെന്നും, ഇത് ദുരുപയോഗം ചെയ്യപ്പെടാൻ സാധ്യതയുണ്ടെന്നും വിലയിരുത്തലുണ്ടായി.
തുടർന്ന്, സംസ്ഥാനത്തിന്റെ പുതിയ മദ്യനയം (2026-27) പ്രഖ്യാപിച്ചതിന് ശേഷം മാത്രം ഈ കരടുചട്ടം പരിഗണിച്ചാൽ മതിയെന്ന് മുഖ്യമന്ത്രി നിർദ്ദേശിക്കുകയായിരുന്നു. എക്സൈസ് വകുപ്പ് മന്ത്രിയും മുഖ്യമന്ത്രിയുടെ ഈ നിലപാടിനോട് പൂർണ്ണമായും യോജിച്ചതോടെ ചട്ടഭേദഗതിയുടെ തുടർനടപടികൾ മാറ്റിവയ്ക്കാൻ സബ്ജക്റ്റ് കമ്മിറ്റി തീരുമാനിച്ചു. മുൻ ധനകാര്യമന്ത്രി കെ.എൻ. ബാലഗോപാൽ ഒന്നിലധികം ലൈസൻസുകൾ നൽകുന്നതുൾപ്പെടെയുള്ള ഭേദഗതികൾ നിർദ്ദേശിക്കാനുണ്ടായ സാഹചര്യം യോഗത്തിൽ വിശദീകരിക്കുകയും തന്റെ അഭിപ്രായം രേഖപ്പെടുത്തുകയും ചെയ്തിരുന്നു.
നിലവിൽ സംസ്ഥാനത്ത് പുതിയ മദ്യനയം രൂപീകരിക്കുന്നതുവരെ പുതിയ ബാറുകൾക്കും മദ്യലൈസൻസുകൾക്കും സർക്കാർ താൽക്കാലിക വിലക്കേർപ്പെടുത്തിയിട്ടുണ്ട്. ഇതിനിടയിലാണ് ഐടി പാർക്കുകളിലെ മദ്യശാലകളുടെ എണ്ണം കുത്തനെ വർദ്ധിപ്പിക്കാൻ ഇടയാക്കുന്ന ചട്ടഭേദഗതിക്കും ഇപ്പോൾ ‘ചെക്ക്’ വീണിരിക്കുന്നത്.