തിരുവനന്തപുരം: കേരളത്തിലെ മുഖ്യമന്ത്രി, മന്ത്രിമാർ, സ്പീക്കർ, ഡെപ്യൂട്ടി സ്പീക്കർ, പ്രതിപക്ഷ നേതാവ്, ചീഫ് വിപ്പ്, നിയമസഭാംഗങ്ങൾ (എം.എൽ.എമാർ) എന്നിവരുടെ ശമ്പളവും മറ്റ് ക്ലെയിമുകളുമായി ബന്ധപ്പെട്ട ബില്ലുകൾ 2027 ജനുവരി മുതൽ ‘സ്പാർക്ക്’ (SPARK) സോഫ്റ്റ്വെയർ മുഖേന പ്രോസസ്സ് ചെയ്യാൻ സർക്കാർ തീരുമാനിച്ചു. ഇതുസംബന്ധിച്ച് ധനകാര്യ വകുപ്പ് ഔദ്യോഗിക ഉത്തരവ് (സ.ഉ.(അച്ചടി) നം.115/2026/ധന) പുറപ്പെടുവിച്ചു.
ഭരണഘടനാപരമായ പദവികൾ വഹിക്കുന്ന ഉന്നത വ്യക്തികളുടെ ശമ്പള ബില്ലുകൾ കൂടുതൽ സുതാര്യവും വേഗത്തിലുമാക്കുന്നതിന്റെ ഭാഗമായാണ് ഈ നടപടി. പദവി വഹിക്കുന്നവരുടെ പ്രൈവറ്റ് സെക്രട്ടറിമാർ നൽകുന്ന വിവരങ്ങളുടെ അടിസ്ഥാനത്തിൽ സ്പാർക്ക് സോഫ്റ്റ്വെയറിൽ ‘Constitutional Authorities’ എന്ന പ്രത്യേക ഇനത്തിൽ പുതിയ ‘SPARK ID’ രജിസ്ട്രേഷൻ പൂർത്തീകരിക്കേണ്ടതാണ്. ഇതിനായി ബന്ധപ്പെട്ട പദവികൾ, നിയമസഭാ നിയോജകമണ്ഡലം, പദവി വഹിക്കുന്ന കാലയളവ് എന്നിവ സോഫ്റ്റ്വെയറിൽ രേഖപ്പെടുത്തണം.
വരുന്ന 2027 ജനുവരിയോടെ ഈ പുതിയ വ്യവസ്ഥ പൂർണ്ണമായും പ്രാബല്യത്തിൽ വരും. ഇതിനുള്ള തുടർനടപടികൾ സ്വീകരിക്കുന്നതിനും ഡ്രോയിംഗ് ആൻഡ് ഡിസ്ബേഴ്സിംഗ് ഓഫീസർമാരുമായി (DDO) ചർച്ച നടത്തി വിശദമായ നിർദ്ദേശങ്ങൾ സമർപ്പിക്കുന്നതിനുമായി സ്പാർക്ക് ചീഫ് പ്രോജക്ട് മാനേജരെ ചുമതലപ്പെടുത്തിയിട്ടുണ്ട്. അഡീഷണൽ ചീഫ് സെക്രട്ടറി മിൻഹാജ് ആലം ഐ.എ.എസിന്റെ ഉത്തരവിലാണ് ഇക്കാര്യങ്ങൾ വ്യക്തമാക്കിയത്.