തിരുവനന്തപുരം: കേരളത്തിന്റെ ഏറ്റവും വലിയ ജി.എസ്.ടി വരുമാന സ്രോതസ്സായി മോട്ടോർ വാഹന മേഖല തുടരുന്നു. അതേസമയം, ഏറ്റവും ഉയർന്ന വിറ്റുവരവുള്ള സ്വർണ്ണവ്യാപാരവും, ടൂറിസം മേഖലയുടെ പ്രാധാന്യമുള്ള ഹോട്ടൽ-റെസ്റ്റോറന്റ് വിഭാഗവും താരതമ്യേന കുറഞ്ഞ നികുതി വരുമാനമാണ് നൽകുന്നത്.
2026-27 സാമ്പത്തിക വർഷത്തിന്റെ ആദ്യ ആറുമാസത്തെ (ഏപ്രിൽ-സെപ്റ്റംബർ) 11 പ്രധാന മേഖലകളിലെ യഥാർത്ഥ ജി.എസ്.ടി ശേഖരണം സംബന്ധിച്ച വിശകലനത്തിലാണ് ഈ വൈരുദ്ധ്യങ്ങൾ വ്യക്തമാകുന്നത്. സാമ്പത്തിക പ്രവർത്തനങ്ങളുടെ നികുതി സാധ്യതകൾ കൃത്യമായി ഉപയോഗപ്പെടുത്തുന്നുണ്ടോ എന്ന ചോദ്യം ഇത് ഉയർത്തുന്നു.
പ്രധാന വിവരങ്ങൾ:
- ആകെ വരുമാനം: ഈ കാലയളവിൽ 11 മേഖലകളിൽ നിന്നായി ആകെ 19,583 കോടി രൂപയാണ് ജി.എസ്.ടി വരുമാനമായി ലഭിച്ചത്. ഇത് മുൻവർഷത്തെ അപേക്ഷിച്ച് 18.8% വളർച്ചയാണ് കാണിക്കുന്നത്.
- മോട്ടോർ വാഹനം: 18,500 കോടി രൂപയുടെ വിറ്റുവരവോടെ 3,840 കോടി രൂപ (ആകെ വരുമാനത്തിന്റെ 19.6%) സംഭാവന ചെയ്ത് മോട്ടോർ വാഹനങ്ങളും സ്പെയർ പാർട്സുകളും പട്ടികയിൽ ഒന്നാമതെത്തി.
- നിർമ്മാണ കരാർ സേവനങ്ങൾ (Works Contract): 2,660 കോടി രൂപ (13.6%) സംഭാവന ചെയ്ത് രണ്ടാം സ്ഥാനത്തെത്തി.
- മറ്റ് വ്യാപാര-നിർമ്മാണ മേഖലകൾ: 2,593 കോടി രൂപ (13.2%).
- ഇലക്ട്രോണിക്സ് & ഗാർഹികോപകരണങ്ങൾ: 2,430 കോടി രൂപ (12.4%).
- ബാങ്കിംഗ്, ഫിനാൻഷ്യൽ & ഇൻഷുറൻസ്: 2,120 കോടി രൂപ (10.8%).
- ഈ അഞ്ച് മേഖലകൾ മാത്രം ചേർന്ന് ആകെ ജി.എസ്.ടി വരുമാനത്തിന്റെ ഏകദേശം 70% സംഭാവന ചെയ്തു.
സ്വർണ്ണവും ടൂറിസവും കാട്ടുന്ന വൈരുദ്ധ്യം:
സ്വർണ്ണ മേഖല തികച്ചും വ്യത്യസ്തമായ ചിത്രമാണ് നൽകുന്നത്. ആറുമാസത്തിനിടെ 32,500 കോടി രൂപയുടെ റെക്കോർഡ് വിറ്റുവരവാണ് സ്വർണ്ണവ്യാപാര രംഗത്തുണ്ടായത്. എന്നാൽ ഇതിൽ നിന്നുള്ള ജി.എസ്.ടി സംഭാവന വെറും 1,000 കോടി രൂപ (5.1%) മാത്രമാണ്. സ്വർണ്ണത്തിന് 3% മാത്രമുള്ള കുറഞ്ഞ ജി.എസ്.ടി നിരക്കാണ് ഇതിന് കാരണം. അതുപോലെ, 10,100 കോടി രൂപ വിറ്റുവരവുള്ള ഹോ്വലുകളും റെസ്റ്റോറന്റുകളും നൽകിയത് വെറും 770 കോടി രൂപയാണ് (3.9%).
കർശന പരിശോധനയ്ക്ക് നികുതി വകുപ്പ്:
നികുതി വെട്ടിപ്പുകൾ തടയുന്നതിനായി ചില പ്രത്യേക മേഖലകളിൽ കർശന പരിശോധന നടത്താൻ ജി.എസ്.ടി വകുപ്പ് തീരുമാനിച്ചിട്ടുണ്ട്. സ്റ്റോക്ക് രേഖകളും ഇ-വേ ബില്ലുകളും തമ്മിലുള്ള വ്യത്യാസങ്ങൾ സ്വർണ്ണ വ്യാപാരത്തിൽ പരിശോധിക്കും. കൂടാതെ ഹോട്ടലുകൾ, റെസ്റ്റോറന്റുകൾ, ഓൺലൈൻ ഫുഡ് ഡെലിവറി പ്ലാറ്റ്‌ഫോമുകളുമായി ബന്ധപ്പെട്ട ക്ലൗഡ് കിച്ചനുകൾ എന്നിവടങ്ങളിലെ വിറ്റുവരവുകളും പണമിടപാടുകളും സൂക്ഷ്മമായി നിരീക്ഷിക്കും.
ടെലികോം, ഐ.ടി മേഖലകളിൽ നിന്ന് 1,540 കോടി രൂപയും, ഇലക്ട്രോണിക് ഉപകരണങ്ങളിൽ നിന്ന് 1,000 കോടി രൂപയും, ഫാർമസ്യൂട്ടിക്കൽസ് മേഖലയിൽ നിന്ന് 900 കോടി രൂപയും, റെഡിമെയ്ഡ് വസ്ത്ര മേഖലയിൽ നിന്ന് 730 കോടി രൂപയും വരുമാനമായി ലഭിച്ചിട്ടുണ്ട്.
