സാവോപോളോ : ബ്രസീലിയൻ ഫുട്ബോൾ സൂപ്പർതാരം നെയ്മർ സാവോ പോളോ ഗ്രാൻഡ് പ്രീക്കിടെ നടത്തിയ ഒരു പരാമർശം സമൂഹമാധ്യമങ്ങളിൽ ചിരിപടർത്തുന്നു. ഇന്റർലാഗോസിൽ നടന്ന F1 റേസിനിടെയുള്ള അഭിമുഖത്തിനിടയിൽ, ബ്രസീലിയൻ ഫോർമുല വൺ ഡ്രൈവർ ഗബ്രിയേൽ ബോർടോലെറ്റോയുടെ പേര് നെയ്മർ തെറ്റായി ഉച്ചരിക്കുകയായിരുന്നു. ബോർടോലെറ്റോയ്ക്ക് പകരം ‘ബെർട്ടോടൊ’ (Bertoloto) എന്നാണ് താരം വിളിച്ചത്.
ഈ രസകരമായ നാക്കുപിഴ ഗ്ലോബോ ഡോട്ട് കോം (Globo.com) പുറത്തുവിട്ടതോടെയാണ് പുറംലോകം അറിഞ്ഞത്. എന്നാൽ ഇതിൽ ദേഷ്യപ്പെടാൻ നിന്നില്ല ഫോർമുല വണ്ണിൽ ഓഡിയുടെ (Audi) ഡ്രൈവറായ ബോർടോലെറ്റോ. വീഡിയോ കണ്ടയുടൻ താരം ഇൻസ്റ്റാഗ്രാം ചാറ്റിലൂടെ സംഭവത്തെ വളരെ തമാശയോടെയാണ് എടുത്തത്.
സാവോ പോളോ ഗ്രാൻഡ് പ്രീയിൽ നെയ്മറുടെ സാന്നിധ്യം വലിയ ശ്രദ്ധ ആകർഷിച്ചിരുന്നു. പേര് മാറിവിളിച്ച ഈ സംഭവത്തിന് പുറമെ, റെഡ് ബുൾ ഗാരേജ് സന്ദർശിച്ച നെയ്മർ, F1 ചാമ്പ്യൻ മാക്സ് വെർസ്റ്റപ്പന് തന്റെ പത്താം നമ്പർ സാന്റോസ് ജേഴ്സി സമ്മാനിക്കുകയും ചെയ്തിരുന്നു. ഫുട്ബോൾ ലോകത്തെയും മോട്ടോർ സ്പോർട്സിനെയും ഒരുപോലെ രസിപ്പിച്ച ഈ സംഭവം ഇപ്പോൾ ആരാധകർ ഏറ്റെടുത്തിരിക്കുകയാണ്.
