തിരുവനന്തപുരം: ജിഎസ്ടി റിട്ടേൺ ഫയലിംഗിൽ സിസ്റ്റം അധിഷ്ഠിതമായി വരുത്തുന്ന പുതിയ മാറ്റങ്ങൾ നടപ്പിലാകുന്നതോടെ കേരളത്തിന്റെ ജിഎസ്ടി വരുമാന ചോർച്ചയിൽ വൻ കുറവുണ്ടായേക്കും. ഇൻപുട്ട് ടാക്സ് ക്രെഡിറ്റ് (ITC) തട്ടിപ്പിലൂടെ പ്രതിമാസം 100 കോടിയോളം രൂപയുടെ വരുമാന നഷ്ടമാണ് നിലവിൽ കേരളത്തിനുണ്ടാകുന്നതെന്നാണ് ജിഎസ്ടി വകുപ്പിലെ മുതിർന്ന ഉദ്യോഗസ്ഥർ കണക്കാക്കുന്നത്. വ്യാഴാഴ്ച ചേരുന്ന 57-ാമത് ജിഎസ്ടി കൗൺസിൽ യോഗത്തിന്റെ പ്രധാന അജണ്ടകളിലൊന്നാണ് ഈ ശുപാർശ.
GSTR-3B റിട്ടേൺ ഫയലിംഗിൽ നികുതി ബാധ്യതകളും ഇൻപുട്ട് ടാക്സ് ക്രെഡിറ്റും തിരുത്തുന്നതിന് പകരം കൂടുതൽ സിസ്റ്റം വാലിഡേഷൻ (System Validation) കൊണ്ടുവരാനാണ് കേന്ദ്ര സർക്കാരിന്റെയും സംസ്ഥാനങ്ങളുടെയും കൗൺസിൽ അജണ്ട നിർദ്ദേശിക്കുന്നത്.
GSTR-3B ഫയലിംഗിലെ നിലവിലെ പ്രശ്നങ്ങൾ
നിലവിൽ ജിഎസ്ടി സിസ്റ്റത്തിൽ:
GSTR-1 (വിൽപ്പന വിവരങ്ങൾ) അടിസ്ഥാനമാക്കി GSTR-3B-യിലെ നികുതി ബാധ്യത സിസ്റ്റം സ്വയം കണക്കാക്കുന്നു.
GSTR-2B അടിസ്ഥാനമാക്കി ലഭ്യമായ ഇൻപുട്ട് ടാക്സ് ക്രെഡിറ്റും (ITC) കാണിക്കുന്നു.
എന്നാൽ റിട്ടേൺ സമർപ്പിക്കുന്നതിന് മുൻപ് ഈ കണക്കുകളിൽ തിരുത്തലുകൾ (Edit) വരുത്താൻ നിലവിൽ വ്യാപാരികൾക്ക് സാധിക്കും. ഇത് വഴി GSTR-1 ഉം GSTR-3B ഉം തമ്മിലും, GSTR-2B ഉം അടിയന്തരമായി അവകാശപ്പെടുന്ന ITC യുമായി വലിയ വ്യത്യാസങ്ങൾ ഉണ്ടാകുന്നു. ഈ ക്രമക്കേടുകൾ മൂലം നികുതിദായകർക്ക് കൂട്ടത്തോടെ ഡിമാൻഡ് നോട്ടീസുകളും (Section 73) സിസ്റ്റം ജനറേറ്റഡ് നോട്ടീസുകളും (DRC-01B, DRC-01C) നൽകേണ്ടി വരുന്നുണ്ട്.
കേരളത്തിന് എങ്ങനെ പ്രയോജനപ്പെടും?
വ്യാജ ഇൻപുട്ട് ടാക്സ് ക്രെഡിറ്റ് ഉപയോഗിച്ച് ഐജിഎസ്ടി (IGST) ബാധ്യതകൾ തീർപ്പാക്കുന്നതാണ് കേരളത്തിന് വലിയ തിരിച്ചടിയാകുന്നത്.
”വ്യാജമായി നിർമ്മിക്കുന്ന എസ്‌ജിഎസ്ടി (SGST) ഐടിസി ഉപയോഗിച്ച് ഐജിഎസ്ടി ബാധ്യതകൾ തീർപ്പാക്കുന്നത് വഴി കേരളത്തിന് പ്രതിമാസം 100 കോടി രൂപയോളം നഷ്ടപ്പെടുന്നുണ്ട്. പുതിയ റൂൾ 61(1B) ഭേദഗതി വരുന്നതോടെ മനുഷ്യസഹജമായ ഇടപെടലുകൾ കുറയുകയും സിസ്റ്റം വാലിഡേഷൻ ശക്തമാകുകയും ചെയ്യും. ഇത് വരുമാന ചോർച്ച തടയാൻ സഹായിക്കും. “
തട്ടിപ്പുകൾക്ക് പുറമെ, വിവരങ്ങൾ രേഖപ്പെടുത്തുന്നതിലെ അപാകതകളും ക്ലറിക്കൽ തെറ്റുകളും മൂലം ഉണ്ടാകുന്ന നോട്ടീസുകൾ ഒഴിവാക്കാനും പുതിയ സംവിധാനം സഹായിക്കും.
മറ്റ് പ്രധാന ആവശ്യങ്ങളുമായി കേരളം
ജിഎസ്ടി കൗൺസിൽ യോഗത്തിൽ സംസ്ഥാനത്തിന്റെ മറ്റ് സാമ്പത്തിക വിഷയങ്ങളും കേരളം ഉന്നയിക്കുന്നുണ്ട്:
വരുമാന ആഘാത പഠനം: ഉപഭോഗ സംസ്ഥാനമായ കേരളത്തിൽ ഉയർന്ന ജിഎസ്ടി സ്ലാബിലുള്ള ഉൽപ്പന്നങ്ങളിൽ നിന്നാണ് കൂടുതൽ വരുമാനം ലഭിക്കുന്നത്. അതിനാൽ നികുതി നിരക്കുകളിൽ പെട്ടെന്ന് മാറ്റം വരുത്തുന്നതിന് മുൻപ് കൃത്യമായ പഠനം നടത്തണം.
സാമ്പത്തിക സംരക്ഷണം: ജിഎസ്ടി നഷ്ടപരിഹാരം തുടരുക, സംസ്ഥാനങ്ങൾക്ക് പ്രത്യേക സെസ് ചുമത്താൻ അനുമതി നൽകുക, കേന്ദ്ര-സംസ്ഥാന വരുമാന പങ്കുവെക്കൽ അനുപാതം 60:40 ആയി ഉയർത്തുക എന്നീ ആവശ്യങ്ങളും കേരളം ഉന്നയിക്കും.
ലോട്ടറി നികുതി വർദ്ധനവിനെതിരെ എതിർപ്പ്: പേപ്പർ ലോട്ടറികളുടെ ജിഎസ്ടി നിരക്ക് 28 ശതമാനത്തിൽ നിന്ന് 40 ശതമാനമായി ഉയർത്താനുള്ള നീക്കത്തെ കേരളം ശക്തമായി എതിർത്തു. രണ്ട് ലക്ഷത്തോളം ലോട്ടറി വിൽപ്പനക്കാരുടെയും വിതരണക്കാരുടെയും ജീവനെയ ബാധിക്കുന്ന തീരുമാനമാണിതെന്ന് സംസ്ഥാനം ചൂണ്ടിക്കാട്ടും.
