തിരുവനന്തപുരം: കേരളത്തിന്റെ നവോത്ഥാന നായകൻ ശ്രീനാരായണ ഗുരുദേവന്റെ പ്രതിമയും സാംസ്കാരിക കേന്ദ്രവും രാജ്യതലസ്ഥാനമായ ഡൽഹിയിൽ സ്ഥാപിക്കാനുള്ള സർക്കാരിന്റെ ബജറ്റ് പ്രഖ്യാപനത്തിന് സംസ്ഥാനത്ത് വൻ സ്വീകാര്യത. ധനവകുപ്പിന്റെ ചുമതലയേന്തി മുഖ്യമന്ത്രി വി.ഡി. സതീശൻ നിയമസഭയിൽ അവതരിപ്പിച്ച ബജറ്റിലെ ഏറ്റവും ശ്രദ്ധേയമായ പ്രഖ്യാപനങ്ങളിൽ ഒന്നാണിത്. താൻ ഒരു യഥാർത്ഥ ശ്രീനാരായണീയനാണെന്ന മുഖ്യമന്ത്രിയുടെ മുൻ നിലപാടുകളുടെ കൃത്യമായ തുടർച്ചയായാണ് ഈ ചരിത്രപരമായ തീരുമാനം വിലയിരുത്തപ്പെടുന്നത്.
ഗുരുദേവന്റെ ദർശനങ്ങൾക്കും മാനവിക വചനങ്ങൾക്കും ലോകമെമ്പാടും പ്രസക്തിയേറിവരുന്ന ഈ കാലഘട്ടത്തിൽ, രാജ്യത്തിന്റെ ഹൃദയഭാഗത്ത് ഗുരുവിന് ഉചിതമായ ഒരു സ്മാരകം നിർമ്മിക്കുന്നത് കേരളം നവോത്ഥാന നായകനോട് കാട്ടുന്ന ഏറ്റവും വലിയ ആദരവാണ്.
ശ്രീനാരായണ ഗുരുദേവൻ വിഭാവനം ചെയ്ത, ജാതി-മത വേർതിരിവുകൾ ഇല്ലാത്ത മാതൃകാ ലോകം (മാതൃകാ സ്ഥാനം) കേരളത്തിൽ യാഥാർത്ഥ്യമാക്കുക എന്നതാണ് ഈ സർക്കാരിന്റെ ലക്ഷ്യമെന്ന് മുൻപ് ശിവഗിരി സന്ദർശിച്ച വേളയിൽ മുഖ്യമന്ത്രി വി.ഡി. സതീശൻ വ്യക്തമാക്കിയിരുന്നു. ആ പ്രഖ്യാപനങ്ങളെ പ്രാവർത്തികമാക്കുന്ന നടപടികളിലേക്കാണ് ഇപ്പോൾ സർക്കാർ കടന്നിരിക്കുന്നത്.
കേരളത്തിന്റെ സാമൂഹിക, രാഷ്ട്രീയ, സാംസ്കാരിക മണ്ഡലങ്ങളിൽ വിപ്ലവകരമായ മാറ്റങ്ങൾ കൊണ്ടുവന്ന നവോത്ഥാന പ്രസ്ഥാനത്തെക്കുറിച്ചും ശ്രീനാരായണ ഗുരുവിന്റെ ദാർശനിക സംഭാവനകളെക്കുറിച്ചും രാജ്യത്തെ പൊതുസമൂഹത്തെ ബോധ്യപ്പെടുത്താൻ ഡൽഹിയിൽ ഒരുങ്ങുന്ന സാംസ്കാരിക കേന്ദ്രത്തിനും പ്രതിമയ്ക്കും സാധിക്കും. നാനാഭാഗങ്ങളിൽ നിന്നുമുള്ള സാംസ്കാരിക പ്രവർത്തകർക്കും ചരിത്ര വിദ്യാർത്ഥികൾക്കും ഒരുപോലെ പ്രയോജനപ്പെടുന്ന രീതിയിലാകും ഡൽഹിയിലെ കേന്ദ്രം വിഭാവനം ചെയ്യുകയെന്നാണ് സൂചന. ബജറ്റ് പ്രഖ്യാപനത്തെ വിവിധ സാമൂഹിക-സാംസ്കാരിക സംഘടനകളും ജനപ്രതിനിധികളും ഹൃദയപൂർവ്വം സ്വാഗതം ചെയ്തു.
