തിരുവനന്തപുരം: സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോഴും മുഖ്യമന്ത്രി പിണറായി വിജയന്റെ ഹെലികോപ്റ്റർ യാത്രകൾക്കായി ചെലവായത് കോടികൾ. ഹെലികോപ്റ്റർ വാടകയിനത്തിൽ ഇതുവരെ 46.36 കോടി രൂപ ചെലവായതായാണ് പുറത്തുവരുന്ന കണക്കുകൾ വ്യക്തമാക്കുന്നത്. എന്നാൽ, സാമ്പത്തിക പ്രതിസന്ധി രൂക്ഷമായതോടെ കഴിഞ്ഞ മാസത്തെ വാടക നൽകാൻ പോലും സർക്കാരിന്റെ പക്കൽ പണമില്ലാത്ത സ്ഥിതിയാണ്.
വാടക മുടങ്ങി; സാമ്പത്തിക പ്രതിസന്ധി വില്ലൻ
2026 ഫെബ്രുവരി 20 മുതൽ മാർച്ച് 19 വരെയുള്ള കാലയളവിലെ ഹെലികോപ്റ്റർ വാടകയാണ് ഫണ്ടിന്റെ ലഭ്യതക്കുറവ് മൂലം സർക്കാർ തീർപ്പാക്കാത്തത്. പോലീസിന്റെ പക്കൽ ആവശ്യത്തിന് ഫണ്ട് ഇല്ലാത്തതാണ് കുടിശ്ശിക വരാൻ കാരണമെന്ന് പോലീസ് ആസ്ഥാനത്ത് നിന്നുള്ള മറുപടിയിൽ പറയുന്നു. ഈ മാസം നാലാം തീയതിയാണ് പോലീസ് ആസ്ഥാനത്ത് നിന്നും ഇത് സംബന്ധിച്ച ഔദ്യോഗിക വിശദീകരണം നൽകിയത്.
വിവരാവകാശ രേഖ പുറത്ത്
കെ.പി.സി.സി സെക്രട്ടറിയും തിരുവനന്തപുരം ജില്ലാ പഞ്ചായത്ത് അംഗവുമായ അഡ്വ. സി.ആർ. പ്രാണകുമാർ നൽകിയ വിവരാവകാശ ചോദ്യത്തിനാണ് പോലീസ് ആസ്ഥാനത്ത് നിന്ന് ഈ ഞെട്ടിപ്പിക്കുന്ന വിവരങ്ങൾ ലഭ്യമായത്. ഭരണനിർവ്വഹണത്തിന് ഹെലികോപ്റ്റർ അത്യാവശ്യമാണെന്ന വാദമുയർത്തിയാണ് സർക്കാർ കരാർ തുടരുന്നത്.
കരാർ വ്യവസ്ഥകൾ ഇങ്ങനെ:
നിലവിൽ ഡൽഹി ആസ്ഥാനമായ ചിപ്സൺ ഏവിയേഷനിൽ നിന്നാണ് സർക്കാർ ഹെലികോപ്റ്റർ വാടകയ്ക്ക് എടുത്തിരിക്കുന്നത്.
- പ്രതിമാസ വാടക: 80 ലക്ഷം രൂപ.
- പറക്കൽ സമയം: മാസം 25 മണിക്കൂർ പറക്കാൻ ഈ തുക മതിയാകും.
- അധിക തുക: 25 മണിക്കൂറിൽ കൂടുതൽ പറക്കുന്ന ഓരോ മണിക്കൂറിനും 90,000 രൂപ വീതം അധികമായി നൽകണം.
ആദ്യഘട്ടത്തിൽ പവൻഹാൻസ് ലിമിറ്റഡിൽ നിന്നായിരുന്നു മുഖ്യമന്ത്രിയുടെ യാത്രകൾക്കായി ഹെലികോപ്റ്റർ വാടകയ്ക്ക് എടുത്തിരുന്നത്.
