തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിൽ കേരളം ഉറ്റുനോക്കുന്ന മണ്ഡലമായ നേമത്ത് ഇത്തവണ പ്രവചനാതീതമായ പോരാട്ടമെന്ന് ഇൻ്റലിജൻസ് റിപ്പോർട്ട്. കോൺഗ്രസ് സ്ഥാനാർത്ഥിയായി കെ.എസ് ശബരിനാഥൻ എത്തിയതോടെ മണ്ഡലത്തിൽ ശക്തമായ ത്രികോണ മൽസരത്തിനാണ് കളമൊരുങ്ങിയിരിക്കുന്നത്.
വോട്ടുകണക്കിലെ ആശങ്കയിൽ എൽഡിഎഫ്
2021-ലെ കടുത്ത ഇടതുതരംഗത്തിലും വി. ശിവൻകുട്ടിക്ക് നേമത്ത് നേടാനായത് വെറും 3949 വോട്ടുകളുടെ ഭൂരിപക്ഷം മാത്രമാണ്. അന്ന് ന്യൂനപക്ഷ വോട്ടുകൾ ഒന്നടങ്കം ഇടതുപക്ഷത്തേക്ക് കേന്ദ്രീകരിച്ചതാണ് ശിവൻകുട്ടിക്ക് തുണയായത്. എന്നാൽ ഇത്തവണ സാഹചര്യം മാറിയിരിക്കുന്നു.
- ഭരണവിരുദ്ധ വികാരം: സർക്കാരിനെതിരെയുള്ള ജനവികാരം മണ്ഡലത്തിൽ പ്രതിഫലിക്കുമെന്നാണ് സൂചന.
- വിവാദങ്ങൾ: ശബരിമല വിഷയവും സ്വർണ്ണക്കള്ളക്കടത്ത് അടക്കമുള്ള ആരോപണങ്ങളും ഗ്രാമീണ മേഖലകളിൽ ചർച്ചയാകുന്നു.
- ആരോഗ്യപ്രശ്നങ്ങൾ: സിറ്റിംഗ് എംഎൽഎ ആയ വി. ശിവൻകുട്ടിയെ അലട്ടുന്ന അനാരോഗ്യം അദ്ദേഹത്തിൻ്റെ പ്രചാരണത്തെ ബാധിക്കുന്നുണ്ട്.
ശബരിനാഥൻ എന്ന ‘ഫാക്ടർ’
യുവനേതാവായ ശബരിനാഥൻ്റെ വരവ് നേമത്തെ സമവാക്യങ്ങൾ മാറ്റിമറിച്ചു. ന്യൂനപക്ഷ വോട്ടുകൾ ഇത്തവണ ശബരിനാഥനിലേക്ക് തിരിയുമെന്നാണ് ഇന്റലിജൻസ് വിലയിരുത്തൽ. കൂടാതെ, പരമ്പരാഗതമായി ബിജെപിയിലേക്ക് പോയിരുന്ന സവർണ്ണ വോട്ടുകളിൽ ഒരു വിഹിതം ശബരിനാഥൻ്റെ വ്യക്തിപ്രഭാവത്തിലൂടെ തിരിച്ചുപിടിക്കാൻ കോൺഗ്രസിന് സാധിക്കുമെന്ന് കരുതപ്പെടുന്നു. ഇതോടെ മൽസരം പ്രധാനമായും ശബരിനാഥനും ബിജെപി സ്ഥാനാർത്ഥി രാജീവ് ചന്ദ്രശേഖറും തമ്മിലാകാനാണ് സാധ്യത.
ആര്യ രാജേന്ദ്രനും പാളിയ തന്ത്രവും
ശിവൻകുട്ടിക്ക് പകരം മേയർ ആര്യ രാജേന്ദ്രനെ ഇറക്കി മണ്ഡലം പിടിക്കാനായിരുന്നു സിപിഎം ആദ്യം ലക്ഷ്യമിട്ടിരുന്നത്. എന്നാൽ തിരുവനന്തപുരം കോർപ്പറേഷനിലെ പരാജയം ആര്യയുടെ ‘ഗ്ലാമർ’ കുറച്ചതായി പാർട്ടി വിലയിരുത്തുന്നു. മറ്റ് ഓപ്ഷനുകൾ ഇല്ലാത്തതിനാലാണ് ഒടുവിൽ ശിവൻകുട്ടിക്ക് തന്നെ വീണ്ടും നറുക്ക് വീണത്.
ശക്തമായ ഭരണവിരുദ്ധ വികാരവും സ്ഥാനാർത്ഥികളുടെ മികവും മണ്ഡലത്തെ പ്രവചനാതീതമാക്കുന്നു.” – ഇന്റലിജൻസ് റിപ്പോർട്ടിലെ സൂചന
