തിരുവനന്തപുരം: കേരള ഗവർണറുടെ ഔദ്യോഗിക വസതിയായ രാജ്ഭവൻ ഇനി ‘ലോക്ഭവൻ’ എന്നറിയപ്പെടും. ബ്രിട്ടീഷ് കൊളോണിയൽ പൈതൃകം പേറുന്ന ‘രാജ്ഭവൻ’ എന്ന പേര് ഒഴിവാക്കി സ്ഥാപനങ്ങളെ ജനങ്ങളുമായി കൂടുതൽ അടുപ്പിക്കുക എന്ന കേന്ദ്ര സർക്കാരിന്റെ നിർദ്ദേശത്തിന്റെ അടിസ്ഥാനത്തിലാണ് ഈ സുപ്രധാന മാറ്റം.
ഗവർണർ രാജേന്ദ്ര വിശ്വനാഥ് ആർലേക്കർ ഇത് സംബന്ധിച്ച ഔദ്യോഗിക നടപടികൾ ഉടൻ പൂർത്തിയാക്കാൻ ഉദ്യോഗസ്ഥർക്ക് നിർദ്ദേശം നൽകി. ‘ജനങ്ങളുടെ ഭവനം’ (Lok Bhavan) എന്ന ആശയം യാഥാർത്ഥ്യമാക്കുന്നതിലൂടെ, ഗവർണറുടെ ഓഫീസ് പൊതുജനങ്ങൾക്ക് കൂടുതൽ പ്രാപ്യമാവുകയും, ഔദ്യോഗിക വിലാസം ഇനി മുതൽ ‘ലോക്ഭവൻ, കേരള’ എന്നാവുകയും ചെയ്യും.
കേന്ദ്ര ആഭ്യന്തര മന്ത്രാലയമാണ് രാജ്യത്തെ എല്ലാ സംസ്ഥാനങ്ങളിലെയും ഗവർണർമാരുടെ വസതികളുടെ പേര് മാറ്റാൻ നിർദ്ദേശം നൽകിയത്. ഇതിന്റെ ഭാഗമായി പശ്ചിമ ബംഗാൾ, അസം തുടങ്ങിയ സംസ്ഥാനങ്ങളിൽ പേര് മാറ്റം നേരത്തെ നടപ്പാക്കിയിരുന്നു. തിരുവനന്തപുരത്തെ വെള്ളയമ്പലത്തുള്ള രാജ്ഭവന്റെ പ്രവേശന കവാടത്തിൽ ലോക്ഭവൻ എന്നെഴുതിയ ബോർഡ് ഉടൻ സ്ഥാപിക്കും.
