തിരുവനന്തപുരം: രാഷ്ട്രീയ ഭേദമന്യേ വനിതാ പ്രമുഖരും ഇടത് വനിതാ നേതാക്കളും നിറഞ്ഞ സദസ്സിനെ സാക്ഷിനിർത്തി, വേദിക്കും സദസ്സിനും അനുയോജ്യമായ പ്രസംഗത്തിലൂടെ വീണ്ടും ശ്രദ്ധേയനായി മുഖ്യമന്ത്രി വി. ഡി. സതീശൻ. വനിതാ ശിശുക്ഷേമ വകുപ്പ് സംഘടിപ്പിച്ച ‘മകള്‍ക്കൊപ്പം’ പരിപാടി ഉദ്ഘാടനം ചെയ്ത് സംസാരിക്കവേയാണ്, ലിംഗസമത്വത്തെയും സ്ത്രീ സുരക്ഷയെയും മുൻനിർത്തിയുള്ള മുഖ്യമന്ത്രിയുടെ പ്രസംഗം കയ്യടി നേടിയത്.
സംസ്ഥാനത്തെ വനിതാ നയം രൂപീകരിക്കുന്നതിന്റെ ഭാഗമായിട്ടാണ് വിവിധ മേഖലകളിൽ നിന്നുള്ള പ്രഗത്ഭരായ സ്ത്രീകളെ പങ്കാളികളാക്കി പരിപാടി സംഘടിപ്പിച്ചത്. വേദിയിൽ ഇടത് നേതാക്കളായ പി. കെ. ശ്രീമതി ടീച്ചറും പി. സതീദേവിയും മുഖ്യമന്ത്രിയോടൊപ്പം പങ്കെടുത്തു. സദസ്സിലും നിരവധി ഇടതുപക്ഷ പ്രവർത്തകരുടെയും സ്ത്രീകളുടെയും സാന്നിധ്യമുണ്ടായിരുന്നു.
ഏറെ രസകരമായ അനുഭവങ്ങൾ പങ്കുവെച്ചാണ് മുഖ്യമന്ത്രി പ്രസംഗം ആരംഭിച്ചത്. “ആണുങ്ങളോട് കളിക്കരുത്” എന്ന പഴയ പ്രയോഗം ഇന്നത്തെ കാലത്ത് ശരിയല്ലെന്ന് അദ്ദേഹം ഓർമ്മിപ്പിച്ചു. തുടർന്ന് സ്വന്തം മകളുമായി ബന്ധപ്പെട്ട ഒരു വ്യക്തിഗത അനുഭവം അദ്ദേഹം സദസ്സുമായി പങ്കുവെച്ചു.
മുമ്പൊരിക്കൽ യാത്രയ്ക്കിടെ വന്യജീവി ആക്രമണവുമായി ബന്ധപ്പെട്ട് ലഭിച്ച ഫോൺ കോളിൽ താൻ ‘Man-Animal Conflict’ എന്ന് സംസാരിച്ചപ്പോൾ മകൾ അതിനെ തിരുത്തിയ സംഭവമാണ് അദ്ദേഹം വിവരിച്ചത്. “അതെന്താ പുരുഷന്മാർക്ക് മാത്രമാണോ ഈ പ്രശ്നം?” എന്ന് ചോദിച്ച മകൾ, ഇനിമുതൽ ‘Human-Animal Conflict’ എന്ന് ഉപയോഗിക്കണമെന്ന് നിർദ്ദേശിച്ചു. ആ സംഭവത്തിന് ശേഷം താൻ ‘Human-Animal Conflict’ എന്ന് മാത്രമേ പറയാറുള്ളൂവെന്ന് മുഖ്യമന്ത്രി വ്യക്തമാക്കി.
സ്ത്രീകൾക്കെതിരായ സൈബർ ആക്രമണങ്ങൾ തടയുന്നതിനായി പ്രത്യേക നിയമനിർമ്മാണം (Special Act) കൊണ്ടുവരാൻ സർക്കാർ നടപടികൾ ആരംഭിച്ചതായും മുഖ്യമന്ത്രി പ്രസംഗത്തിൽ പ്രഖ്യാപിച്ചു. സദസ്സിന്റെ കൃത്യമായ മാനസികാവസ്ഥയും വിഷയത്തിന്റെ ഗൗരവവും ഉൾക്കൊണ്ട് നടത്തുന്ന പ്രസംഗ ശൈലിയിലൂടെ മുഖ്യമന്ത്രി വി. ഡി. സതീശൻ വീണ്ടും സദസ്സിന്റെ പ്രശംസ പിടിച്ചുപറ്റി.
