കൊച്ചി: സംവിധായകൻ സനൽകുമാർ ശശിധരനെതിരെ മാനനഷ്ടക്കേസ് ഫയൽ ചെയ്ത് നടി മഞ്ജു വാര്യർ. എറണാകുളം മുൻസിഫ് കോടതിയിലാണ് മഞ്ജു വാര്യർ നിയമനടപടി സ്വീകരിച്ചിരിക്കുന്നത്. സനൽകുമാർ ശശിധരൻ തനിക്കെതിരെ സമൂഹമാധ്യമങ്ങളിലൂടെയും മറ്റും തെറ്റായതും അപകീർത്തികരവുമായ പരാമർശങ്ങൾ നടത്തുന്നതായി ചൂണ്ടിക്കാട്ടിയാണ് ഹർജി.
സനൽകുമാർ ശശിധരൻ നടത്തിയതായി പറയുന്ന അപകീർത്തികരമായ സോഷ്യൽ മീഡിയ പോസ്റ്റുകൾ നീക്കം ചെയ്യണമെന്നും, ഇത്തരത്തിലുള്ള പരാമർശങ്ങൾ ആവർത്തിക്കുന്നത് തടയണമെന്നും മാനനഷ്ടത്തിന് നഷ്ടപരിഹാരം നൽകണമെന്നും മഞ്ജു വാര്യരുടെ ഹർജിയിൽ ആവശ്യപ്പെട്ടു. മഞ്ജുവിന് വേണ്ടി അഭിഭാഷക ശാന്തി മായാദേവിയാണ് ഹാജരായത്.
മഞ്ജു വാര്യർ ചില റാക്കറ്റുകളുടെ നിയന്ത്രണത്തിലാണെന്ന തരത്തിലുള്ള ആരോപണങ്ങളും താനുമായി മഞ്ജുവിന് പ്രണയബന്ധമുണ്ടെന്ന തരത്തിലുള്ള അവകാശവാദങ്ങളും സനൽകുമാർ ശശിധരൻ നേരത്തെ സമൂഹമാധ്യമങ്ങളിലൂടെ ഉന്നയിച്ചിരുന്നു. ഈ പരാമർശങ്ങളാണ് പുതിയ നിയമനടപടിയുടെ പശ്ചാത്തലത്തിൽ പ്രധാനമായും ചർച്ചയാകുന്നത്.
