തിരുവനന്തപുരം: സംസ്ഥാനത്ത് ഭരണമാറ്റം ഉണ്ടാകുമെന്ന സൂചനകൾ ശക്തമായതോടെ, പുതിയ സർക്കാരിൻ്റെ പേഴ്സണൽ സ്റ്റാഫിൽ ഇടംപിടിക്കാൻ കേരള അഡ്മിനിസ്ട്രേറ്റിവ് സർവീസിലെ (KAS) ഒരു വിഭാഗം ഉദ്യോഗസ്ഥർ കരുനീക്കം തുടങ്ങുന്നു. മുഖ്യമന്ത്രി പിണറായി വിജയൻ്റെ സ്വപ്ന പദ്ധതിയായി അറിയപ്പെടുന്ന KAS-ലെ ഉദ്യോഗസ്ഥർ കൂട്ടത്തോടെ ചുവടുമാറ്റുന്നത് രാഷ്ട്രീയ വൃത്തങ്ങളിൽ വലിയ ചർച്ചയായിരിക്കുകയാണ്.
നേതാക്കളെ കണ്ട് ‘മനസാന്തര’ പ്രഖ്യാപനം
മുൻ സർവീസിൽ താൻ കോൺഗ്രസ് അനുഭാവിയായിരുന്നുവെന്നും ഇപ്പോഴും മനസ്സ് കൊണ്ട് കോൺഗ്രസുകാരനാണെന്നും അവകാശപ്പെട്ട് ഒരു KAS ഉദ്യോഗസ്ഥൻ കെ.പി.സി.സി ഓഫീസിലെത്തി. തെക്കൻ കേരളത്തിൽ നിന്നുള്ള നിയമസഭയിൽ മൽസരിക്കാത്ത ഒരു നേതാവിനെയാണ് ഇദ്ദേഹം നേരിട്ട് കണ്ടത്. തൻ്റെ കൂടെ മറ്റ് 14 KAS ഉദ്യോഗസ്ഥർ കൂടിയുണ്ടെന്നും, അടുത്ത സർക്കാർ അധികാരത്തിൽ വരുമ്പോൾ തങ്ങളെ മുഖ്യമന്ത്രിയുടെയും മറ്റ് മന്ത്രിമാരുടെയും പേഴ്സണൽ സ്റ്റാഫിൽ ഉൾപ്പെടുത്തണമെന്നുമായിരുന്നു ആവശ്യം.
പിണറായിയുടെ ‘ചാരന്മാരോ’?
KAS ഉദ്യോഗസ്ഥരുടെ ഈ നീക്കത്തിന് പിന്നിൽ ഗൂഢലക്ഷ്യങ്ങളുണ്ടെന്ന ആക്ഷേപം ശക്തമാണ്. പിണറായി വിജയൻ്റെ വിശ്വസ്തരായ ‘സഖാക്കൾ’ ആണ് ഈ സർവീസിൽ ഭൂരിഭാഗവും എന്നതിനാൽ, പുതിയ സർക്കാരിൻ്റെ രഹസ്യങ്ങൾ ചോർത്താനുള്ള ചാരപ്പണിയാണോ ഇതെന്ന സംശയം കോൺഗ്രസിനുള്ളിലെ ഒരു വിഭാഗം ഉയർത്തുന്നുണ്ട്. ഭരണസിരാകേന്ദ്രങ്ങളിൽ പിണറായിയുടെ സ്വാധീനം നിലനിർത്താനുള്ള രഹസ്യ അജണ്ടയുടെ ഭാഗമാണിതെന്നാണ് ആരോപണം.
നേതാക്കൾ കൈവിടുന്നു
പ്രമുഖരായ പല കോൺഗ്രസ് നേതാക്കളെയും കാണാൻ ഈ ഉദ്യോഗസ്ഥൻ ശ്രമിച്ചെങ്കിലും ആരും കൂടിക്കാഴ്ചയ്ക്ക് അനുവാദം നൽകിയില്ല. ഒടുവിൽ തെക്കൻ ജില്ലയിലെ നേതാവിനെ ശരണം പ്രാപിക്കുകയായിരുന്നു. എന്നാൽ ഈ നേതാവ് വഴി നടത്തുന്ന നീക്കങ്ങൾ എത്രത്തോളം വിജയിക്കുമെന്നത് കണ്ടറിയണം. സംശയകരമായ പശ്ചാത്തലമുള്ള ഉദ്യോഗസ്ഥരെ നിർണ്ണായക തസ്തികകളിൽ നിയമിക്കുന്നതിനെതിരെ കോൺഗ്രസിനുള്ളിൽ തന്നെ പ്രതിഷേധം പുകയുന്നുണ്ട്.
