സാവോ പോളോ : ഫുട്ബോൾ പ്രേമികൾ ആവേശത്തോടെ കാത്തിരുന്ന ആ നിമിഷം എത്തി. മാസങ്ങൾ നീണ്ട ഇടവേളയ്ക്ക് ശേഷം ബ്രസീലിയൻ ഇതിഹാസം നെയ്മർ ജൂനിയർ വീണ്ടും പച്ചപ്പുൽ മൈതാനത്ത് പന്തുതട്ടിത്തുടങ്ങി. കാൽമുട്ടിനേറ്റ പരിക്കിനെത്തുടർന്ന് ശസ്ത്രക്രിയയ്ക്ക് വിധേയനായ നെയ്മർ, ‘കാംപിയോനാറ്റോ പോളിസ്റ്റ’ ടൂർണമെന്റിൽ വേലോ ക്ലബ്ബിനെതിരായ മത്സരത്തിലൂടെയാണ് തന്റെ സീസൺ അരങ്ങേറ്റം കുറിച്ചത്.
ഗോളടി മേളം; അസിസ്റ്റുമായി നെയ്മർ
മത്സരത്തിൽ ഏകപക്ഷീയമായ ആറ് ഗോളുകൾക്കാണ് സാന്റോസ് വിജയിച്ചത്. ഗബ്രിയേൽ ബാർബോസ (രണ്ട് ഗോൾ), മൊയ്‌സസ്, തസിയാനോ, ജി മെനിനോ, ബി റോളൈസർ എന്നിവർ സാന്റോസിനായി സ്കോർ ചെയ്തു.
രണ്ടാം പകുതിയിൽ പകരക്കാരനായി കളത്തിലിറങ്ങിയ നെയ്മർ, തന്റെ പഴയ വേഗതയും കൃത്യതയും ചോർന്നുപോയിട്ടില്ലെന്ന് തെളിയിച്ചു. കളിക്കളത്തിൽ എത്തിയ ഉടൻ തന്നെ മനോഹരമായ ഒരു അസിസ്റ്റിലൂടെ ടീമിന്റെ ഗോൾ പട്ടിക പൂർത്തിയാക്കാൻ താരം സഹായിച്ചു. പരിക്കിൽ നിന്ന് പൂർണ്ണമായി മുക്തനായി വരുന്ന താരത്തിന്റെ ഈ പ്രകടനം ആരാധകർക്ക് വലിയ ആശ്വാസമാണ് നൽകുന്നത്.
ലക്ഷ്യം 2026 ലോകകപ്പ്
അടുത്ത മാസം നടക്കാനിരിക്കുന്ന അന്താരാഷ്ട്ര മത്സരങ്ങൾക്കായി ബ്രസീൽ ടീമിൽ ഇടം പിടിക്കുക എന്നതാണ് നെയ്മറുടെ അടുത്ത പ്രധാന ലക്ഷ്യം. ഫിറ്റ്‌നസ് വീണ്ടെടുക്കാൻ ക്ലബ്ബ് മത്സരങ്ങൾ സഹായിക്കുമെന്ന് താരം നേരത്തെ വ്യക്തമാക്കിയിരുന്നു. 2026 ലോകകപ്പിന് മുൻപ് നെയ്മർ പൂർണ്ണ ഫോമിൽ തിരിച്ചെത്തുന്നത് ബ്രസീൽ ആരാധകർക്കും വലിയ പ്രതീക്ഷയാണ് നൽകുന്നത്.
