തിരുവനന്തപുരം: ക്രിസ്മസ് മധുരത്തിന് പകരം തലസ്ഥാനവാസിക്ക് ലഭിച്ചത് ഞെട്ടിക്കുന്ന അനുഭവം. മണ്ണന്തലയിലെ പ്രമുഖ ബേക്കറിയായ ‘ടേസ്റ്റ് വേൾഡിൽ’ (Taste World) നിന്നും വാങ്ങിയ കേക്കിലാണ് ചത്ത പല്ലിയെ കണ്ടെത്തിയത്. ക്രിസ്മസ് ആഘോഷത്തിന്റെ ഭാഗമായി സഹോദരിക്ക് സമ്മാനമായി നൽകിയ കേക്കിലാണ് ഈ ക്രൂരമായ അനാസ്ഥ ശ്രദ്ധയിൽപ്പെട്ടത്.
കേക്ക് മുറിച്ച് ആദ്യ കഷണം കഴിച്ചതിന് ശേഷമാണ് രണ്ടാമത്തെ കഷണത്തിൽ പല്ലി പറ്റിപ്പിടിച്ചിരിക്കുന്നത് കണ്ടത്. ഉടൻ തന്നെ വീട്ടുകാർ ഭക്ഷ്യസുരക്ഷാ വകുപ്പിനെ വിവരം അറിയിച്ചു. തലസ്ഥാന നഗരിയിൽ പോലും ഭക്ഷ്യസുരക്ഷാ പരിശോധനകൾ എത്രത്തോളം പ്രഹസനമാണെന്ന് തെളിയിക്കുന്നതാണ് ഈ സംഭവം. സംഭവത്തിൽ വീട്ടുകാർ ഭക്ഷ്യസുരക്ഷാ കമ്മീഷന്റെ ടോൾ ഫ്രീ നമ്പറിൽ പരാതി നൽകിയിട്ടുണ്ട്.
ഉത്സവ സീസണുകളിൽ വ്യാപകമായി കേക്കുകൾ വിറ്റഴിക്കപ്പെടുമ്പോൾ, നിർമ്മാണ യൂണിറ്റുകളിലെ ശുചിത്വമില്ലായ്മ ജനങ്ങളുടെ ജീവന് ഭീഷണിയാകുകയാണ്. പരാതിയുടെ അടിസ്ഥാനത്തിൽ ഭക്ഷ്യസുരക്ഷാ ഉദ്യോഗസ്ഥർ ബേക്കറിയിൽ പരിശോധന നടത്തുമെന്നാണ് സൂചന.
