കോഴിക്കോട് : ഗ്രാമീണ മേഖലയുടെ ശാക്തീകരണം ലക്ഷ്യമാക്കി 2005-ൽ കോൺഗ്രസ് നേതൃത്വം നൽകിയ യുപിഎ സർക്കാർ കൊണ്ടുവന്ന മഹാത്മ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ (എംഎൻആർഇജിഎ) ഇരുപതാം വർഷത്തിൽ അതിന്റെ പേരും രൂപവും സ്വഭാവവും മാറ്റാനുള്ള ബിൽ ഇന്ന് ലോക്സഭയിൽ അവതരിപ്പിച്ചു. പദ്ധതിയിൽ നിന്ന് രാഷ്ട്രപിതാവിന്റെ പേര് ഒഴിവാക്കിയതിനൊപ്പം കാതലായ ഒട്ടേറെ മാറ്റങ്ങളും നിർദ്ദേശിക്കുന്നതാണ് മോദി സർക്കാർ അവതരിപ്പിച്ച ‘വികസിത് ഭാരത് ഗാരന്റി ഫോർ റോസ്ഗാർ ആൻഡ് അജീവിക മിഷൻ-ഗ്രാമീൺ (വിബിജിരാം- ജി)’ എന്ന പുതിയ ബിൽ.
കോൺഗ്രസ് സർക്കാർ ആവിഷ്കരിച്ച് വിജയകരമായി നടപ്പാക്കിയ പദ്ധതിയുടെ പിന്നിൽ യുപിഎ ചെയർപേഴ്സൺ സോണിയ ഗാന്ധിയുടെ സ്വപ്നവും സാമ്പത്തിക തന്ത്രജ്ഞനും ദീർഘദർശിയുമായ പ്രധാനമന്ത്രി മൻമോഹൻ സിംഗിന്റെ നിശ്ചയ ദാർഢ്യവും ഉണ്ടായിരുന്നു. കോൺഗ്രസ് നടപ്പിലാക്കിയ പദ്ധതികൾ പേര് മാറ്റി സ്വന്തം പേരിലാക്കുന്ന എൻഡിഎ സർക്കാരിന്റെ ഏറ്റവും ഒടുവിലത്തെ അടവുനയമാണിതെന്നാണ് കോൺഗ്രസിന്റെ ആരോപണം.
കോൺഗ്രസിന്റെ സ്വപ്ന പദ്ധതി
1999-2004-ലെ അടൽ ബിഹാരി വാജ്പേയി സർക്കാരിന്റെ നേട്ടങ്ങൾ അവതരിപ്പിക്കുന്ന ‘ഇന്ത്യ ഷൈനിംഗ്’ പരിപാടിക്ക് ബദലായി സാധാരണക്കാരെ ആകർഷിക്കാൻ കോൺഗ്രസ് രൂപം കൊടുത്ത സ്വപ്ന പദ്ധതിയായിരുന്നു എംപ്ലോയിമെന്റ് ഗ്യാരന്റി സ്കീം അഥവാ തൊഴിലുറപ്പ് പദ്ധതി. അധികാരത്തിൽ എത്തിയാൽ ദരിദ്രരായ ഗ്രാമീണർക്ക് പ്രതിവർഷം 100 തൊഴിൽ ദിനങ്ങൾ ഉറപ്പാക്കുന്ന പദ്ധതി നടപ്പാക്കുമെന്ന കോൺഗ്രസിന്റെ വാഗ്ദാനം രാജ്യത്താകമാനം വലിയ ഉണർവുണ്ടാക്കി. ഇത് ബിജെപിയുടെ ‘ഇന്ത്യ തിളങ്ങുന്നു’ എന്ന മുദ്രാവാക്യത്തെ തൂത്തെറിയുന്ന തലത്തിലേക്ക് സ്വീകാര്യത നേടി.
- ചരിത്രം ഇങ്ങനെ: കോൺഗ്രസ് സർക്കാരുകൾ പല ഘട്ടങ്ങളിലായി നടപ്പാക്കാൻ ശ്രമിച്ചു പരാജയപ്പെട്ട പദ്ധതിക്ക് പുതിയ രൂപവും ഭാവവും നൽകിയാണ് 2004-ലെ തിരഞ്ഞെടുപ്പ് പത്രികയിൽ അവതരിപ്പിച്ചത്.
- 1983-ൽ ഇന്ദിരാഗാന്ധി പ്രധാനമന്ത്രിയായിരുന്ന കാലത്ത് ഭൂമിയില്ലാത്ത ഗ്രാമീണർക്കായി The Rural Landless Employment Guarantee Programme (RLEGP) എന്നൊരു തൊഴിലുറപ്പ് പദ്ധതിക്ക് രൂപം നൽകിയിരുന്നുവെങ്കിലും ഉദ്ദേശിച്ച ഫലം കണ്ടില്ല.
- പിന്നീട് 1991-ലെ നരസിംഹറാവു മന്ത്രിസഭയുടെ കാലത്ത് ദേശീയ തൊഴിലുറപ്പ് നിയമത്തിന് രൂപം നൽകിയെങ്കിലും അതും ഫലവത്തായില്ല.
- തുറുപ്പുചീട്ട്: ഇന്ത്യാ ഷൈനിംഗ് ക്യാമ്പയിനുമായി ബിജെപി മുന്നേറുന്ന വേളയിലാണ് വർഷത്തിൽ മിനിമം 100 ദിവസം തൊഴിൽ ഉറപ്പാക്കുന്ന ദേശീയ തൊഴിലുറപ്പ് പദ്ധതിയെക്കുറിച്ച് കോൺഗ്രസ് വാഗ്ദാനം നൽകിയത്.
മൻമോഹൻ സിംഗിന്റെ കാഴ്ചപ്പാട്
2004-ലെ കോൺഗ്രസ് മാനിഫെസ്റ്റോയിൽ, “A National Employment Guarantee Act will be enacted immediately. This will provide a legal guarantee for at least 100 days of employment on asset creating Public works programmes every Year at minimum wages for every rural household,” എന്ന് വ്യക്തമായി എഴുതിയിരുന്നു. ഡോ. മൻമോഹൻ സിംഗിന്റെ ആദ്യ സ്വാതന്ത്ര്യദിന സന്ദേശത്തിൽത്തന്നെ ഈ പദ്ധതിയെക്കുറിച്ച് ഊന്നിപ്പറഞ്ഞിരുന്നു.
- പ്രചോദനം: ഇന്ത്യയിലാദ്യമായി 1977-ൽ മഹാരാഷ്ട്രയിലെ കോൺഗ്രസ് മുഖ്യമന്ത്രിയായിരുന്ന വസന്തദാദ പാട്ടീലാണ് ഗ്രാമീണ തൊഴിൽ സുരക്ഷാ പദ്ധതിയായ മഹാരാഷ്ട്ര എംപ്ലോയിമെന്റ് ഗ്യാരന്റി സ്കീം എന്നൊരു പദ്ധതിക്ക് രൂപം കൊടുത്തത്. 1979-ൽ ശരത് പവാർ മുഖ്യമന്ത്രി ആയ ശേഷമാണ് ഈ പദ്ധതി ഫലവത്തായത്.
- പഠനം: മഹാരാഷ്ട്രയിലെ ഈ പദ്ധതിയെക്കുറിച്ച് അക്കാലത്ത് പ്ലാനിംഗ് വൈസ് ചെയർമാനായിരുന്ന മൻമോഹൻ സിംഗ് വിശദമായി പഠിച്ചിരുന്നുവെന്ന് അദ്ദേഹത്തിന്റെ പ്രസ് സെക്രട്ടറിയായിരുന്ന സഞ്ജയ് ബാരു തന്റെ ‘ആക്സിഡന്റൽ പ്രൈം മിനിസ്റ്റർ’ എന്ന പുസ്തകത്തിൽ രേഖപ്പെടുത്തിയിട്ടുണ്ട്.
- നടപ്പാക്കൽ: ഈ പദ്ധതി മനസ്സിൽ വെച്ചുകൊണ്ടാണ് 2004-ലെ കോൺഗ്രസ് മാനിഫെസ്റ്റോ കമ്മറ്റി അംഗങ്ങളായ മൻമോഹൻ സിംഗും ജയറാം രമേശും ചേർന്ന് ഗ്രാമീണ തൊഴിലുറപ്പ് പദ്ധതി നടപ്പാക്കുമെന്ന് വാഗ്ദാനം ചെയ്തത്. ഡോ. മൻമോഹൻ സിംഗിന്റെ വ്യക്തമായ കാഴ്ചപ്പാടാണ് ഈ പദ്ധതി ഫലപ്രദമായി നടപ്പാക്കാൻ കാരണം.
