തിരുവനന്തപുരം: റിപ്പോർട്ടർ ടി.വി മുതലാളി ആൻ്റോ അഗസ്റ്റിനേയും സർക്കാരിനെയും ട്രോളി മാധ്യമ നിരീക്ഷകനും രാഷ്ട്രീയ വിമർശകനുമായ ശ്രീജിത്ത് പണിക്കർ രംഗത്ത്. നവംബർ 17-ന് തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ മെസ്സിയും അർജൻ്റീനയും കളിക്കും എന്നായിരുന്നു നേരത്തെ പുറത്തുവന്ന പ്രഖ്യാപനം. ഇത് ശുദ്ധ തട്ടിപ്പായിരുന്നു. ഈ സാഹചര്യത്തിലാണ് ശ്രീജിത്ത് പണിക്കർ ഫേസ്ബുക്കിൽ വിമർശന പോസ്റ്റ് പങ്കുവെച്ചത്.
”നവംബർ 17. തിരുവനന്തപുരം ഗ്രീൻഫീൽഡ് അന്താരാഷ്ട്ര സ്റ്റേഡിയത്തിൽ അല്പം മുൻപ് പൂർത്തിയായ സൗഹൃദ മത്സരത്തിൽ അർജന്റീന എതിരില്ലാത്ത നാല് ഗോളിന് ഓസ്ട്രേലിയയെ പരാജയപ്പെടുത്തി. വിജയികൾക്കായി ലയണൽ മെസ്സി ഹാട്രിക്ക് നേടി. രണ്ടാം പകുതിയിൽ മെസ്സിക്ക് പകരക്കാരനായി ഇറങ്ങിയ മാംഗോ അഗസ്റ്റിൻ നാലാമത്തെ ഗോളും നേടി,” എന്നാണ് പരിഹാസ രൂപേണയുള്ള ശ്രീജിത്ത് പണിക്കരുടെ ഫേസ്ബുക്ക് പോസ്റ്റിൻ്റെ തുടക്കം. ആൻ്റോ അഗസ്റ്റിൻ എന്ന പേരിനെ “മാംഗോ അഗസ്റ്റിൻ” എന്ന് മാറ്റിയാണ് അദ്ദേഹം ട്രോളുന്നത്.
ഇരു ടീമുകളെയും സ്വീകരിക്കാൻ റോഡിൻ്റെ ഇരു വശങ്ങളിലും “രണ്ട് കോടി ജനങ്ങളെ” നിർത്തിയെന്നും, വിജയികൾക്ക് “ഇരുപത് ക്യുബിക് അടി കരിവീട്ടിത്തടി” സമ്മാനമായി നൽകിയെന്നും പോസ്റ്റിൽ അദ്ദേഹം കൂട്ടിച്ചേർത്തു.
