തിരുവനന്തപുരം: ലോക്സഭാ പ്രതിപക്ഷ നേതാവ് രാഹുല് ഗാന്ധിക്കെതിരെ ഉത്തരാഖണ്ഡില് എഫ്.ഐ.ആര് രജിസ്റ്റര് ചെയ്ത നടപടിക്കെതിരെ രൂക്ഷ വിമര്ശനവുമായി മുഖ്യമന്ത്രി വി.ഡി സതീശന്. രാഷ്ട്രീയ എതിരാളികളെ നിയമ സംവിധാനങ്ങളിലൂടെ ഭയപ്പെടുത്താനുള്ള ശ്രമം ജനാധിപത്യത്തിനും ഭരണഘടനാ മൂല്യങ്ങള്ക്കും നേരെയുള്ള വെല്ലുവിളിയാണെന്ന് അദ്ദേഹം ആരോപിച്ചു.
അനീതിക്കും അയിത്താചാരത്തിനുമെതിരെ ശക്തമായി ശബ്ദമുയര്ത്തുന്ന രാഹുല് ഗാന്ധിയെ കേസുകള് രജിസ്റ്റര് ചെയ്ത് നിശബ്ദനാക്കാമെന്നത് സംഘപരിവാറിന്റെ വ്യാമോഹം മാത്രമാണെന്ന് മുഖ്യമന്ത്രി പറഞ്ഞു.
ഉത്തരാഖണ്ഡിലെ ഹല്ദ്വാനിയിലെ രാംലീല മൈതാനത്ത് കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ പങ്കെടുത്ത പൊതുയോഗത്തിന് ശേഷം സംഘപരിവാര് പ്രവര്ത്തകര് നടത്തിയതായി ആരോപിക്കപ്പെടുന്ന ‘ശുദ്ധീകരണ’ നടപടിയെയും വി.ഡി സതീശന് ശക്തമായി വിമര്ശിച്ചു. ഖാര്ഗെയെപ്പോലൊരു മുതിര്ന്ന ദേശീയ നേതാവ് പങ്കെടുത്ത വേദിയുമായി ബന്ധപ്പെട്ട് നടന്ന സംഭവവികാസങ്ങള് ജനാധിപത്യത്തിനും ഭരണഘടനാ മൂല്യങ്ങള്ക്കും എതിരായ വെല്ലുവിളിയാണെന്ന് അദ്ദേഹം വ്യക്തമാക്കി.
‘അയിത്തത്തിന്റെ ആധുനിക രൂപം’
മുതിര്ന്ന രാഷ്ട്രീയ നേതാവ് പങ്കെടുത്ത വേദിയോട് സംഘപരിവാര് സ്വീകരിച്ച സമീപനം അയിത്തത്തിന്റെ ആധുനിക രൂപമാണെന്ന് മുഖ്യമന്ത്രി ആരോപിച്ചു. ഇന്ത്യന് ഭരണഘടന ഉയര്ത്തിപ്പിടിക്കുന്ന സമത്വം, സാമൂഹിക നീതി, മനുഷ്യന്റെ അന്തസ് തുടങ്ങിയ അടിസ്ഥാന മൂല്യങ്ങള്ക്ക് വിരുദ്ധമായ നടപടികളാണിവയെന്നും അദ്ദേഹം പറഞ്ഞു.
സമത്വത്തിനും മനുഷ്യന്റെ അന്തസിനും വേണ്ടിയാണ് രാഹുല് ഗാന്ധി സംസാരിക്കുന്നതെന്ന് വി.ഡി സതീശന് വ്യക്തമാക്കി. രാഷ്ട്രീയവും സാമൂഹികവുമായ ചോദ്യങ്ങള്ക്ക് മറുപടി നല്കുന്നതിന് പകരം നിയമനടപടികള് ഉപയോഗിച്ച് രാഷ്ട്രീയ എതിരാളികളെ നേരിടാനുള്ള ശ്രമം ജനാധിപത്യ സമൂഹത്തിന് അംഗീകരിക്കാനാകില്ലെന്നും അദ്ദേഹം പറഞ്ഞു.
നിയമ സംവിധാനങ്ങളെ രാഷ്ട്രീയ ആയുധമാക്കരുത്
പട്ടികജാതി/പട്ടികവര്ഗ പീഡനനിരോധന നിയമങ്ങള് രാഷ്ട്രീയ ലക്ഷ്യങ്ങള്ക്കായി ദുരുപയോഗം ചെയ്ത് രാഹുല് ഗാന്ധിക്കെതിരെ കേസ് എടുത്തുവെന്ന ആരോപണവും മുഖ്യമന്ത്രി ഉന്നയിച്ചു. നിയമങ്ങളുടെ ലക്ഷ്യം ദുര്ബല വിഭാഗങ്ങള്ക്ക് സംരക്ഷണം ഉറപ്പാക്കുന്നതാണ്; അവ രാഷ്ട്രീയ എതിരാളികളെ സമ്മര്ദത്തിലാക്കാനുള്ള ആയുധമായി മാറരുതെന്നും അദ്ദേഹം പറഞ്ഞു.
രാഷ്ട്രീയ എതിരാളികള്ക്കെതിരെ അന്വേഷണ-നിയമ സംവിധാനങ്ങളെ ആയുധമാക്കുന്ന പ്രവണത രാജ്യത്തെ ജനാധിപത്യ സ്ഥാപനങ്ങളുടെ വിശ്വാസ്യതയെ ബാധിക്കുമെന്നും വി.ഡി സതീശന് മുന്നറിയിപ്പ് നല്കി.
കേരള ജനത ഒപ്പമുണ്ടാകുമെന്ന് പ്രഖ്യാപനം
രാജ്യത്ത് അയിത്തവും വിവേചനവും അടിച്ചേല്പ്പിക്കാനുള്ള ശ്രമങ്ങള്ക്കെതിരായ പോരാട്ടത്തില് രാഹുല് ഗാന്ധിക്കും കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെക്കുമൊപ്പം കേരള ജനത ഉറച്ചുനില്ക്കുമെന്ന് മുഖ്യമന്ത്രി പറഞ്ഞു.
ജനാധിപത്യത്തെയും അഭിപ്രായ സ്വാതന്ത്ര്യത്തെയും ഭരണഘടനാ മൂല്യങ്ങളെയും ദുര്ബലപ്പെടുത്താനുള്ള ഏതൊരു നീക്കത്തെയും മതേതര സമൂഹം ശക്തമായി ചെറുക്കുമെന്നും അദ്ദേഹം വ്യക്തമാക്കി.
രാഹുല് ഗാന്ധിക്കെതിരായ കേസും ഹല്ദ്വാനി സംഭവവുമായി ബന്ധപ്പെട്ട രാഷ്ട്രീയ വിവാദങ്ങളും ദേശീയ രാഷ്ട്രീയത്തില് പുതിയ ചര്ച്ചകള്ക്ക് വഴിവെച്ചിരിക്കുകയാണ്.
