കൊച്ചി: മകൾ വിസ്മയ മോഹൻലാലിന്റെ ആദ്യ ചിത്രമായ ‘തുടക്കം’ തിയേറ്ററുകളിൽ വൻ സ്വീകാര്യത നേടി മുന്നേറുമ്പോൾ, വൈകാരികമായ കുറിപ്പുമായി മലയാളത്തിന്റെ പ്രിയ താരം മോഹൻലാൽ. ജൂഡ് ആന്റണി ജോസഫ് സംവിധാനം ചെയ്ത ചിത്രത്തിലൂടെ വിസ്മയ മോഹൻലാലും നിർമ്മാതാവ് ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയുമാണ് വെള്ളിത്തിരയിലേക്ക് ചുവടുവെച്ചത്.
പ്രേക്ഷകർ ഇരുവരുടെയും പ്രകടനത്തിന് നൽകുന്ന സ്നേഹത്തിന് നന്ദി പറഞ്ഞുകൊണ്ട് മോഹൻലാൽ ഫെയ്‌സ്ബുക്കിൽ കുറിച്ച വാക്കുകൾ ആരാധകർ ഏറ്റെടുത്തിരിക്കുകയാണ്.
”ഒരു അച്ഛന്റെ മനസ്സിന് ഇതിലും വലിയ സന്തോഷം ഇനി ചോദിക്കാനില്ല. ‘തുടക്കം’ എന്ന ചിത്രത്തിലൂടെ വിസ്മയ തന്റെ യാത്ര ആരംഭിക്കുന്നത് കാണുന്നതും, നിങ്ങൾ അവളോട് കാണിക്കുന്ന സ്നേഹവും ഞാൻ എപ്പോഴും കാത്തുസൂക്ഷിക്കുന്ന അനുഗ്രഹമാണ്. ചെറുപ്പം മുതലേ എനിക്കറിയാവുന്ന, ഞാൻ ഏറെ സ്നേഹിക്കുന്ന ആശിഷ് ജോ ആന്റണി അവളോടൊപ്പം ഈ മനോഹരമായ യാത്ര പങ്കിടുന്നത് കാണുമ്പോൾ എന്റെ ഹൃദയം വലിയ സന്തോഷത്താൽ നിറയുന്നു. രണ്ടുപേരെയും ഇത്രയും ഊഷ്മളതയോടെ സ്വീകരിച്ചതിന് നന്ദി 🙏”
തിയേറ്ററുകളിൽ ‘തുടക്കം’ തരംഗം
ആശീർവാദ് സിനിമാസിന്റെ ബാനറിൽ നിർമ്മിച്ച ‘തുടക്കം’ എന്ന ഇമോഷണൽ ആക്ഷൻ ത്രില്ലറിൽ മീനു എന്ന കേന്ദ്ര കഥാപാത്രത്തെയാണ് വിസ്മയ അവതരിപ്പിക്കുന്നത്. ചിത്രത്തിലെ തകർപ്പൻ ആക്ഷൻ രംഗങ്ങളിലൂടെ പ്രേക്ഷകരെ അതിശയിപ്പിക്കാൻ വിസ്മയക്ക് സാധിച്ചിട്ടുണ്ട്. ഒപ്പം ആശിഷ് ജോ ആന്റണിയുടെ മികച്ച പ്രകടനവും വലിയ രീതിയിൽ ശ്രദ്ധിക്കപ്പെട്ടു കഴിഞ്ഞു.
മലയാള സിനിമയിൽ പതിറ്റാണ്ടുകളായി ഒപ്പമുള്ള മോഹൻലാൽ – ആന്റണി പെരുമ്പാവൂർ സൗഹൃദത്തിന്റെ തുടർച്ചയെന്നോണം, ഇവരുടെ അടുത്ത തലമുറയും വെള്ളിത്തിരയിൽ ഒന്നിച്ച് എത്തുമ്പോൾ വലിയ പിന്തുണയോടെയാണ് സിനിമാലോകവും ആരാധകരും ഇതിനെ വരവേൽക്കുന്നത്.
